ໃນການເລືອກຕັ້ງດ້ວຍການລົງຄະແນນສຽງແບບປິດລັບຂອງກອງປະຊຸມເທື່ອທີ 1 ສະພາປະຊາຊົນແຫ່ງຊາດຈີນຊຸດທີ 13 ທີ່ຈັດຂຶ້ນໃນຕອນເຊົ້າວັນທີ 17 ມີນານີ້, ທ່ານສີຈິ້ນຜິງໄດ້ຮັບເລືອກຕັ້ງເປັນປະທານປະເທດແຫ່ງສາທາລະນະລັດປະຊາຊົນຈີນ, ປະທານຄະນະກຳມະການການທະຫານສູນກາງ ສາທາລະນະລັດປະຊາຊົນຈີນໂດຍໄດ້ຮັບຄະແນນສຽງເຫັນດີ 100%, ຂະນະດຽວກັນ, ກອງປະຊຸມຍັງໄດ້ເລືອກຕັ້ງທ່ານລີ້ຈ້ານຊູ່ ເປັນປະທານສະພາປະຊາຊົນແຫ່ງຊາດຈີນຊຸດທີ 13, ເລືອກຕັ້ງທ່ານຫວາງສີຊ່ານ ເປັນຮອງປະທານປະເທດແຫ່ງສາທາລະນະລັດປະຊາຊົນຈີນ.
ຫຼັງຈາກສຳເລັດວາລະປະຊຸມທຸກປະການແລ້ວ, ກອງປະຊຸມເທື່ອທີ 1 ຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ຈັດພິທີສາບານຕົວຕໍ່ລັດຖະທຳມະນູນເປັນຄັ້ງທຳອິດ ເຊິ່ງເປັນເທື່ອທຳອິດທີ່ອົງການອຳນາດສູງສຸດຂອງຈີນຈັດພິທີສາບານຕົວຕໍ່ລັດຖະທຳມະນູນນັບແຕ່ຈີນປະຕິບັດລະບຽບການສາບານຕົວຕໍ່ລັດຖະທຳມະນູນໃນປີ 2014 ເປັນຕົ້ນມາ. ພາຍໃຕ້ການເປັນສັກຂີພິຍານຂອງຜູ້ແທນສະພາປະຊາຊົນແຫ່ງຊາດເກືອບ 3000 ຄົນ, ທ່ານສີຈິ້ນຜິງໄດ້ສາບານຕົວຕໍ່ລັດຖະທຳມະນູນໃນນາມປະມຸກລັດເປັນຄັ້ງທຳອິດໃນປະຫວັດສາດຂອງສະພາປະຊາຊົນແຫ່ງຊາດຈີນ.
ທ່ານສີຈິ້ນຜິງວາງມືຊ້າຍເທິງປຶ້ມລັດຖະທຳມະນູນ, ມືຂວາຍົກກຳປັ້ນແລະສາບານຕົວຢ່າງເຄັ່ງຂຶມວ່າ: "ຂ້າພະເຈົ້າ ສີຈິ້ນຜິງ ຂໍສາບານຕົວ ຈົງຮັກພັກດີຕໍ່ລັດຖະທຳມະນູນສາທາລະນະລັດປະຊາຊົນຈີນ,ປົກປັກຮັກສາຄວາມສັກສິດຂອງລັດຖະທຳມະນູນ, ປະຕິບັດໜ້າທີ່ຕຳແໜ່ງຕາມກົດໝາຍ, ຈົງຮັກພັກດີຕໍ່ປະເທດຊາດ,ຈົງຮັກພັກດີຕໍ່ປະຊາຊົນ, ປະຕິບັດໜ້າທີ່ຕຳແໜ່ງດ້ວຍຄວາມຮັບຜິດຊອບສູງແລະປອດໃສຂາວສະອາດ, ຮັບການຕິດຕາມກວດກາຈາກປະຊາຊົນ, ພະຍາຍາມສູ້ຊົນເພື່ອສ້າງສາປະເທດສັງຄົມນິຍົມທີ່ທັນສະໄໝ,ເຂັ້ມແຂງຮັ່ງມີ,ປະຊາທິປະໄຕ,ສີວິໄລ, ກົມກຽວປອງດອງ ແລະສວຍງາມ!"
ສຽງສາບານຕົວທີ່ເຂັ້ມແຂງມີພະລັງຂອງທ່ານສີຈິ້ນຜິງໄດ້ດັງກ້ອງໄປທົ່ວຫ້ອງປະຊຸມໃຫຍ່ຂອງຫໍສະພາປະຊາຊົນແລະຫຼັງສຳເລັດການສາບານຕົວ, ທ່ານສີຈິ້ນຜິງກໍກົ້ມຫົວສະແດງຄວາມຂອບໃຈຕໍ່ຜູ້ແທນຮ່ວມປະຊຸມທັງຫຼາຍແລະບັນດາຜູ້ແທນກໍໄດ້ຕົບມືຊົມເຊີຍຢ່າງຟົດຟື້ນເປັນເວລາດົນເຕີບ.