ຫວ່າງກ່ອນນີ້ບໍ່ດົນ, ທ່ານນາງ ວັນດີ ບຸດທະສະວົງ ເອກອັກຄະລັດຖະທູດ ສປປ ລາວປະຈຳຈີນໄດ້ໃຫ້ສຳພາດຕໍ່ນັກຂ່າວຈີນວ່າ: "ພັກກອມມູນິດແລະລັດຖະບານຈີນໄດ້ເຕົ້າໂຮມຈິດໃຈແລະກຳລັງໃນການເອົາຊະນະບັ້ນຮົບຫຼຸດຜ່ອນຄວາມທຸກຍາກ, ໝາກຜົນດັ່ງກ່າວບໍ່ເຄີຍມີມາກ່ອນໃນປະຫວັດການພັດທະນາຂອງມວນມະນຸດ." ທ່ານນາງ ວັນດີ ບຸດທະສະວົງ ກ່າວວ່າ: ຂ້າພະເຈົ້າສົນໃຈຫຼາຍຕໍ່ບົດລາຍງານວຽກງານລັດຖະບານຈີນໃນປີນີ້. ບົດລາຍງານສະບັບນີ້ ໄດ້ບັນລະຍາຍຜົນງານທີ່ຈີນໄດ້ຮັບໃນການພັດທະນາເສດຖະກິດ-ສັງຄົມໃນ 5 ປີຜ່ານມາຢ່າງເຕັມສ່ວນ ພ້ອມດ້ວຍບັນຫາສຳຄັນຈຳນວນໜຶ່ງທີ່ຜະເຊີນໜ້າໃນວຽກງານປີນີ້. ຂະນະດຽວກັນ, ບົດລາຍງານໄດ້ຢ້ຳເຖິງຄວາມຕັດສິນໃຈຂອງລັດຖະບານຈີນໃນການສືບຕໍ່ຊຸກຍູ້ການປະຕິຮູບແລະໄຂປະຕູສູ່ພາຍນອກ. ບົດລາຍງານວຽກງານລັດຖະບານສະບັບນີ້ ມີເນື້ອໃນອຸດົມສົມບູນ, ໃນນັ້ນ, 3 ດ້ານໜ້າສົນໃຈເປັນພິເສດ, ຄື:
ອັນທີໜຶ່ງ, ໃນ 5 ປີຜ່ານມາ, ພັກກອມມູນິດແລະລັດຖະບານຈີນ ໄດ້ເຕົ້າໂຮມຈິດໃຈແລະກຳລັງ ໂດຍໄດ້ຮັບຜົນງານທີ່ສຳຄັນໃນການເອົາຊະນະບັ້ນຮົບຫຼຸດຜ່ອນຄວາມທຸກຍາກ, ໄດ້ຍົກລະດັບຊີວິດການເປັນຢູ່ຂອງປະຊາຊົນໃຫ້ສູງຂຶ້ນຕື່ມອີກ, ເຮັດໃຫ້ປະຊາກອນຜູ້ທຸກຍາກຫຼຸດໜ້ອຍລົງ 68 ລ້ານກວ່າຄົນ, ອັດຕາການເກີດຄວາມທຸກຍາກໄດ້ຫຼຸດຈາກ 10,2% ລົງເປັນ 3,1%, ເຊິ່ງຜົນງານທີ່ສຳຄັນດັ່ງກ່າວບໍ່ເຄີຍມີມາກ່ອນໃນປະຫວັດການພັດທະນາຂອງມວນມະນຸດ.
ອັນທີສອງ, ຈີນໄດ້ຮັບຄວາມຄືບໜ້າໃນວຽກງານການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນຢ່າງຮອບດ້ານ. ໃນຖານະເປັນປະເທດໃຫຍ່, ຈີນໄດ້ເສີມຂະຫຍາຍບົດບາດລັກສະນະສ້າງສັນທີ່ສຳຄັນໃນການແກ້ໄຂບັນຫາພາກພື້ນແລະສາກົນ ແລະໄດ້ປະກອບສ່ວນໃໝ່ທີ່ສຳຄັນເພື່ອສັນຕິພາບແລະການພັດທະນາຂອງໂລກ.
ແລະອັນສຸດທ້າຍ, ກ່ຽວກັບວຽກງານໃນປີ 2018. ຈີນໄດ້ວາງເປົ້າໝາຍການພັດທະນາຢ່າງຈະແຈ້ງ ຄື ຮັກສາຈັງຫວະການເຕີບໂຕທາງເສດຖະກິດໃຫ້ຢູ່ໃນລະຫວ່າງ 6,5% ແລະພະຍາຍາມຫຼຸດຜ່ອນປະຊາຊົນຜູ້ທຸກຍາກຢູ່ຊົນນະບົດໃຫ້ໜ້ອຍລົງອີກ 10 ລ້ານຄົນ. ຂ້າພະເຈົ້າເຊື່ອວ່າ ຈີນສາມາດບັນລຸເປົ້າໝາຍດັ່ງກ່າວນີ້ໄດ້ ແລະນີ້ຈະເປັນການໃຫ້ກຳລັງໃຈແລະເປັນບົດຮຽນອັນປະເສີດສຳລັບປະເທດລາວ.