ປະທານປະເທດຈີນພົບປະກັບປະທານເວທີປຶກສາຫາລືເສດຖະກິດໂລກ
ວັນທີ 16 ເມສານີ້ຢູ່ນະຄອນຫຼວງປັກກິ່ງ ສປ ຈີນ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານຄຼາວສ໌ ສະວັບ, ປະທານເວທີປຶກສາຫາລືເສດຖະກິດໂລກ.
ທ່ານສີຈິ້ນຜິງ ກ່າວວ່າ, ຈີນແລະເວທີປຶກສາຫາລືເສດຖະກິດໂລກຄວນກ້າວໄປໜ້າພ້ອມກັບຍຸກສະໄໝ, ເພີ່ມທະວີການຮ່ວມມື, ຮ່ວມກັນພະຍາຍາມຊອກຫາພະລັງແຮງໃໝ່ທີ່ຊຸກຍູ້ເສດຖະກິດໂລກເຕີບໂຕ, ແລະຊອກຫາແຜນການທີ່ເປັນໄປໄດ້ເພື່ອແກ້ໄຂການທ້າທາຍແບບທົ່ວໂລກ. ຈີນໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ, ຍິນດີຮ່ວມກັບປະຊາຄົມໂລກ, ເສີມຂະຫຍາຍບົດບາດຢ່າງຕັ້ງໜ້າເພື່ອອະນາຄົດທີ່ດີງາມຂອງໂລກ, ແລະຈະປະກອບສ່ວນທີ່ມີລັກສະນະສ້າງສັນຫຼາຍກວ່າເກົ່າ.
ທ່ານສະວັບ ກ່າວວ່າ, ຈີນລິເລີ່ມກໍ່ສ້າງປະຊາຄົມຮ່ວມຊາຕາກຳມວນມະນຸດ, ສ້າງເສດຖະກິດໂລກແບບເປີດປະຕູ, ໃນໄລຍະເສດຖະກິດໂລກາພິວັດແລະລະບົບການຄ້າຫຼາຍຝ່າຍຜະເຊີນກັບການທ້າທາຍ, ໄດ້ຊີ້ແຈ້ງທິດທາງໃຫ້ແກ່ການຮ່ວມມືແລະພັດທະນາຂອງປະເທດຕ່າງໆໃນໂລກ, ໄດ້ເພີ່ມກຳລັງຂັບເຄື່ອນທີ່ເຂັ້ມແຂງ. ເວທີປຶກສາຫາລືເສດຖະກິດໂລກຍິນດີເພີ່ມທະວີການຮ່ວມມືໄລຍະຍາວກັບຈີນໃນດ້ານການສະໜັບສະໜູບການສ້າງ "ໜຶ່ງແລວໜຶ່ງເສັ້ນທາງ", ຊຸກຍູ້ການພັດທະນາແບບປະດິດສ້າງໃໝ່ແລະອື່ນໆ, ຮ່ວມກັນພະຍາຍາມເພື່ອເພີ່ມທະວີການປັບປຸງລະບົບຄຸ້ມຄອງໂລກໃຫ້ດີຂຶ້ນແລະຊຸກຍູ້ການແກ້ໄຂບັນຫາຕ່າງໆຂອງໂລກ.