ຕອນບ່າຍວັນທີ 8 ພຶດສະພານີ້ຕາມເວລາທ້ອງຖິ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານ ຊິນໂຈ ອາເບະ ນາຍົກລັດຖະມົນຕີຍີ່ປຸ່ນໂດຍເນັ້ນວ່າສອງຝ່າຍຄວນເຄົາລົບແລະປະຕິບັດຕາມຄວາມຮັບຮູ້ທີ່ເປັນເອກະພາບກັນລະຫວ່າງສອງປະເທດກໍ່ຄືຫຼັກການເອກະສານການເມືອງ 4 ສະບັບ,ຊຸກຍູ້ສາຍພົວພັນລະຫວ່າງຈີນ-ຍີ່ປຸ່ນໃຫ້ກັບຄືນສູ່ວົງໂຄຈອນທີ່ເປັນປົກກະຕິ.
ທ່ານ ຫຼີເຄີ້ສຽງ ຊີ້ວ່າ, ຈີນແລະຍີ່ປຸ່ນເປັນປະເທດບ້ານໃກ້ເຮືອນຄຽງທີ່ສຳຄັນແລະເປັນກຸ່ມເສດຖະກິດທີ່ສຳຄັນໃນໂລກ, ການພົວພັນລະຫວ່າງສອງປະເທດມີການພັດທະນາຢ່າງໝັ້ນທ່ຽງ,ຍາວນານແລະປອດໃສ ໄດ້ສອດຄ່ອງກັບຜົນປະໂຫຍດຂອງສອງຝ່າຍ, ແລະກໍ່ເປັນຜົນດີຕໍ່ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນກໍ່ຄືຂອງໂລກເຊັ່ນດຽວກັນ ປີນີ້ຖືກກັບປີເຊັນສົນທິສັນຍາວ່າດ້ວຍສັນຕິພາບແລະໄມຕີຈິດມິດຕະພາບຈີນ-ຍີ່ປຸ່ນຄົບຮອບ 40 ປີພໍດີ, ການພັດທະນາແລະການປັບປຸງສາຍພົວພັນລະຫວ່າງສອງປະເທດໃຫ້ດີຂຶ້ນນັ້ນແມ່ນຢູ່ໃນໄລຍະທີ່ສຳຄັນ. ດັ່ງນັ້ນ,ສອງຝ່າຍຄວນກຳໂອກາດແລະພິຈາລະນາສະຖານະການໃນປັດຈຸບັນ,ທົບຄວນຄືນຈິດໃຈສົນທິສັນຍາດັ່ງກ່າວ,ປັບປຸງພື້ນຖານການເມືອງໃຫ້ມີຄວາມໝັ້ນຄົງຂະໜົງແກ່ນ,ເປີດກວ້າງການຮ່ວມມືທີ່ມີໄມຕີຈິດມິດຕະພາບ,ຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບທາງການເມືອງທີ່ເປັນຄູ່ຮ່ວມມືແລະບໍ່ນາບຂູ່ກັນໃຫ້ດີ,ຊຸກຍູ້ສາຍພົວພັນລະຫວ່າງສອງປະເທດໃຫ້ກັບຄືນສູ່ວົງໂຄຈອນທີ່ເປັນປົກກະຕິ,ເພື່ອບັນລຸການພັດທະນາໃຫ້ມີຄວາມໝັ້ນທ່ຽງ,ຍາວນານແລະປອດໃສ.