ວັນທີ 13 ພຶດສະພານີ້ຢູ່ນະຄອນຫຼວງປັກກິ່ງ, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ພົບປະຫາລືກັບທ່ານໂມຮາເມັດ ຈາວັດ ຈາຣິຟ ລັດຖະມົນຕີກະຊວງການຕ່າງປະເທດອີຣານ.
ທ່ານວາງຢີ້ຢືນຢັນວ່າ: ຈີນຖືອີຣານເປັນຄູ່ຮ່ວມມືສຳຄັນໃນການຮ່ວມສ້າງ "ໜຶ່ງແລວໜຶ່ງເສັ້ນທາງ", ຍິນດີຮ່ວມກັບອີຣານຈັດຕັ້ງປະຕິບັດຄວາມເປັນເອກະພາບກັນທີ່ສຳຄັນຂອງປະມຸກລັດສອງປະເທດຢ່າງຮອບດ້ານ, ປົກປັກຮັກສາແລະເສີມຂະຫຍາຍການຮ່ວມມືໃນຂົງເຂດຕ່າງໆ. ສັນຍາຮອບດ້ານວ່າດ້ວຍບັນຫານິວເຄລຍອີຣານເປັນໝາກຜົນລັດທິຫຼາຍຝ່າຍທີ່ໄດ້ມາບໍ່ແມ່ນເລື່ອງງ່າຍ ເຊິ່ງມີຜົນດີຕໍ່ການຮັກສາລະບົບປ້ອງກັນບໍ່ແຜ່ຜາຍອາວຸດນິວເຄລຍສາກົນແລະຮັກສາສັນຕິພາບ,ສະຖຽນລະພາບຢູ່ເຂດຕາເວັນອອກກາງ. ໃນໄລຍະຕໍ່ໄປ, ຈີນຍິນດີຮ່ວມກັບບັນດາຝ່າຍເຊິ່ງລວມທັງອີຣານຮັກສາການແລກປ່ຽນແລະປະສານງານກັນ, ປະຕິບັດຕາມຈິດໃຈພາວະວິໄສ,ຍຸດຕິທຳແລະມີຄວາມຮັບຜິດຊອບ, ສືບຕໍ່ພະຍາຍາມຮັກສາສັນຍາຮອບດ້ານວ່າດ້ວຍບັນຫານິວເຄລຍອີຣານ.
ໂອກາດນີ້,ທ່ານຈາຣິຟໄດ້ຍ້ອງຍໍຊົມເຊີຍຢ່າງສູງຕໍ່ຈຸດຢືນຂອງຈີນໃນການຮັກສາສັນຍາຮອບດ້ານ ແລະເນັ້ນວ່າ ອີຣານຍິນດີສືບຕໍ່ແລກປ່ຽນຄວາມເຫັນແລະປະສານງານກັບບັນດາຝ່າຍທີ່ສະໜັບສະໜູນສັນຍາຮອບດ້ານ. ອີຣານເຫັນວ່າ: ການທີ່ຮັບປະກັນໃຫ້ສັນຍາຮອບດ້ານໄດ້ຮັບການປະຕິບັດຢ່າງຕໍ່ເນື່ອງ,ຮອບດ້ານແລະມີປະສິດທິຜົນນັ້ນເປັນໜ້າທີ່ແລະພັນທະຮ່ວມຂອງບັນດາຝ່າຍ. ສ່ວນອີຣານກໍຍິນດີຈະເຮັດສຸດຄວາມສາມາດຂອງຕົນເພື່ອໃຫ້ບັນລຸເປົ້າໝາຍນີ້.