ຜູ້ນຳລາວຕ້ອນຮັບລັດຖະມົນຕີກະຊວງປ້ອງກັນຄວາມສະຫງົບຈີນ
ວັນທີ 14 ພຶດສະພານີ້ຢູ່ນະຄອນຫຼວງວຽງຈັນ, ທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ,ປະທານປະເທດແຫ່ງ ສປປ ລາວ ແລະທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວຕ່າງໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຈ້າວເຄີ້ຈື້ ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນຄວາມສະຫງົບຈີນ.
ທ່ານຈ້າວເຄີ້ຈື້ຢືນຢັນວ່າ: ປີ 2017ຜ່ານມາ, ທ່ານເລຂາທິການໃຫຍ່ ປະທານປະເທດສີຈິ້ນຜິງໄດ້ຢ້ຽມຢາມລາວຢ່າງສຳເລັດຜົນ, ຜູ້ນຳສອງພັກ-ລັດໄດ້ບັນລຸຄວາມເປັນເອກະພາບກັນສຳຄັນກ່ຽວກັບການຮ່ວມກັນສ້າງຄູ່ຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດ. ຈີນ-ລາວເປັນປະເທດສັງຄົມນິຍົມຖານເພື່ອນບ້ານທີ່ດີ, ມິດຕະພາບບ້ານໃກ້ເຮືອນຄຽງທີ່ມີມູນເຊື້ອນັບມື້ນັບແໜ້ນແຟ້ນຍິ່ງຂຶ້ນ. ຈີນຍິນດີພະຍາຍາມຮ່ວມກັບລາວປະຕິບັດຕາມຄວາມເປັນເອກະພາບຂອງຜູ້ນຳສອງພັກ-ລັດ, ເພີ່ມທະວີການແລກປ່ຽນດ້ານຍຸດທະສາດ, ລົງເລິກການເຊື່ອມຕໍ່ຍຸດທະສາດ, ເປີດກວ້າງການຮ່ວມມືຕົວຈິງ, ຮ່ວມກັນຮັກສາຄວາມປອດໄພຂອງໂຄງການສຳຄັນກໍ່ສ້າງ "ໜຶ່ງແລວໜຶ່ງເສັ້ນທາງ", ຍົກລະດັບການຮ່ວມມືປະຕິບັດກົດໝາຍເພື່ອຄວາມໝັ້ນຄົງຈີນ-ລາວໃຫ້ສູງຂຶ້ນຢ່າງຕໍ່ເນື່ອງ, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໃຫ້ຂະຫຍາຍຕົວກ້າວສູ່ລວງເລິກເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດຫຼາຍກວ່າເກົ່າ.
ທ່ານບຸນຍັງວໍລະຈິດແລະທ່ານທອງລຸນສີສຸລິດໄດ້ຊົມເຊີຍຈີນທີ່ຍາດໄດ້ຜົນສຳເລັດດ້ານການພັດທະນາປະເທດພາຍໃຕ້ການນຳພາຂອງສູນກາງພັກກອມມູນິດຈີນໂດຍມີສະຫາຍສີຈິ້ນຜິງເປັນແກນກາງ ແລະຢືນຢັນວ່າຍິນດີຮ່ວມກັນຊຸກຍູ້ການຮ່ວມມືຕົວຈິງໃນຂົງເຂດຕ່າງໆ,ເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນໃຫ້ເຂົ້າສູ່ລວງເລິກຢ່າງບໍ່ຢຸດຢັ້ງ.
ມື້ດຽວກັນ,ທ່ານຈ້າວເຄີ້ຈື້ ຍັງໄດ້ພົບປະຫາລືກັບທ່ານຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວແລະທ່ານ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບລາວ.
ໂອກາດພົບປະກັບທ່ານ ສົມແກ້ວ ສີລາວົງ, ສອງຝ່າຍໄດ້ຢືນຢັນວ່າຈະເພີ່ມທະວີການຮ່ວມມືໃນຂົງເຂດການປະຕິບັດກົດໝາຍເພື່ອຮັກສາຄວາມໝັ້ນຄົງລະຫວ່າງຈີນ-ລາວຕື່ມອີກ.ຫຼັງການພົບປະ,ສອງຝ່າຍໄດ້ລົງນາມໃນເອກະສານຮ່ວມມືທີ່ກ່ຽວຂ້ອງ.
ວັນທີ 14 ພຶດສະພານີ້,ທ່ານຈ້າວເຄີ້ຈື້ ຍັງໄດ້ພົບປະຫາລືກັບທ່ານ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບລາວ.