ວັນທີ 16 ພຶດສະພານີ້, ຢູ່ປັກກິ່ງ, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດ ປະທານປະເທດຈີນໄດ້ຕ້ອນຮັບການເຂົ້າຢ້ຽມຂອງຄະນະທັດສະນະມິດຕະພາບຂອງພັກແຮງງານເກົາຫຼີ ທີ່ນຳໂດຍທ່ານ ປັກເຕຊຸງ ກຳມະການກົມການເມືອງສູນກາງພັກແຮງງານ ຮອງປະທານຄະນະກຳມະການສູນກາງຂອງ ສປປ ເກົາຫຼີ.
ທ່ານ ສີຈິ້ນຜິງ ຊີ້ວ່າ, ຈີນໄດ້ສະໜັບສະໜູນປັບປຸງການພົວພັນລະຫວ່າງເໜືອ-ໃຕ້ໃຫ້ດີຂຶ້ນ,ຊຸກຍູ້ການເຈລະຈາລະຫວ່າງ ສປປ ເກົາຫຼີ-ອາເມລິກາ,ບັນລຸການປອດນິວເຄລຍຂອງແຫຼມເກົາຫຼີ,ສະໜັບສະໜູນ ສປປ ເກົາຫຼີໃນການພັດທະນາເສດຖະກິດແລະການປັບປຸງສະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນ,ສະໜັບສະໜູນທ່ານ ກິມເຈີງອູນ ນຳພາພັກແລະປະຊາຊົນຂອງປະເທດຕົນເດີນຕາມເສັ້ນທາງແຫ່ງການພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ,ຍິນດີຮ່ວມກັບ ສປປ ເກົາຫຼີ ລົງເລິກການແລກປ່ຽນແລະຖອດຖອນບົດຮຽນດ້ານການປົກຄອງປະເທດແລະການຄຸ້ມຄອງພັກ,ຊຸກຍູ້ວຽກງານການສ້າງສັງຄົມນິຍົມຂອງສອງປະເທດໃຫ້ໄດ້ຮັບການພັດທະນາອັນໃໝ່ແລະໃຫຍ່ຫຼວງກວ່າເກົ່າ.
ທ່ານ ປັກເຕຊຸງ ກ່າວວ່າ, ຄະນະທັດສະນະມິດຕະພາບປະກອບດ້ວຍປະທານຄະນະກຳມະການຂອງແຂວງແລະນະຄອນທັງໝົດຂອງ ສປປ ເກົາຫຼີ ໄດ້ຮັບການແຕ່ງຕັ້ງຈາກທ່ານ ກິມເຈີງອູນ ມາຢ້ຽມຢາມຈີນ ໂດຍມີຈຸດປະສົງເພື່ອຈັດຕັ້ງປະຕິບັດຄວາມຮັບຮູ້ຢ່າງເປັນເອກະພາບທີ່ສຳຄັນຂອງຜູ້ນຳສູງສຸດຂອງສອງປະເທດ,ຖອດຖອນບົດຮຽນສຳເລັດຜົນດ້ານການສ້າງສາເສດຖະກິດແລະການປະຕິຮູບແລະເປີດປະຕູຂອງຈີນ, ເພື່ອປະກອບສ່ວນອັນໃໝ່ຕໍ່ການປັບປຸງມິດຕະພາບ ສປປ ເກົາຫຼີ-ຈີນໃຫ້ມີຄວາມໝັ້ນແກ່ນ.