ງານວາງສະແດງສິນຄ້າຈີນ-ອາຊຽນ(ຢາງກຸ້ງ) 2018 ໄດ້ຈັດຂຶ້ນຢູ່ນະຄອນຢາງກຸ້ງ ປະເທດມຽນມາໃນວັນທີ 17 ພຶດສະພານີ້ ໂດຍກົມພັດທະນາການຄ້າຕ່າງປະເທດ ກະຊວງການຄ້າຈີນ, ສຳນັກງານເລຂາງານວາງສະແດງສິນຄ້າຈີນ-ອາຊຽນ ແລະ ອົງການກິດຈະການການຄ້າມຽນມາ ພ້ອມດ້ວຍບໍລິສັດວາງສະແດງແຫ່ງໜຶ່ງຂອງຈີນຮ່ວມກັນຈັດຂຶ້ນ. ງານວາງສະແດງດັ່ງກ່າວກວມເນື້ອທີ່ກວ້າງເຖິງ 4.800 ຕາລາງແມັດ, ມີວິສາຫະກິດຈີນແລະມຽນມາ 103 ແຫ່ງເຂົ້າຮ່ວມ ແລະຈະດຳເນີນເປັນເວລາ 3 ວັນ ຈົນເຖິງວັນທີ 19 ພຶດສະພານີ້. ເພື່ອຕອບສະໜອງຕາມຄວາມຕ້ອງການຂອງຕະຫຼາດມຽນມາ, ຝ່າຍຈີນ ໄດ້ຈັດຕັ້ງວິສາຫະກິດຈີນທີ່ດີເດັ່ນໃນຂົງເຂດວັດສະດຸກໍ່ສ້າງ, ລົດ, ອຸປະກອນກົນຈັກ, ອາຫານ ແລະອື່ນໆເຂົ້າຮ່ວມ, ຂະນະທີ່ສິນຄ້າຕົ້ນຕໍວິສາຫະກິດຂອງມຽນມານຳມາວາງສະແດງແມ່ນ ອາຫານ, ກາເຟ, ຜະລິດຕະພັນປາ, ຜະລິດຕະພັນກະສິກຳ, ເຄື່ອງຫັດຖະກຳ ແລະ ຂະແໜງການບໍລິການ.
ໃນໄລຍະງານວາງສະແດງເທື່ອນີ້, ຍັງຈະມີກິດຈະກຳຕ່າງໆ ເຊັ່ນ ກອງປະຊຸມພົບປະຫາລືການຄ້າ ແລະ ການບັນຍາຍສະພາບແວດລ້ອມທຸລະກິດມຽນມາສີຄຳ ເພື່ອສະໜອງການບໍລິການທີ່ສະດວກໃຫ້ແກ່ການແລກປ່ຽນສອງຝ່າຍລະຫວ່າງວິສາຫະກິດຈີນ-ມຽນມາ.