ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຖະແຫຼງຂ່າວໃນວັນທີ 21 ພຶດສະພານີ້ວ່າ: ຈີນແລະອາເມລິກາບັນລຸຂໍ້ຕົກລົງດ້ານເສດຖະກິດການຄ້າຫຼັງໄດ້ຫາລືກັນ ເຊິ່ງເປັນຜົນທີ່ສອດຄ່ອງກັບຜົນປະໂຫຍດຂອງສອງປະເທດ. ແນ່ນອນແລ້ວ, ຈີນບໍ່ຢາກໃຫ້ມີການປ່ຽນແປງຫຍັງອີກ ແລະກໍມີຄວາມໝັ້ນໃຈ ຂໍພຽງແຕ່ເປັນເລື່ອງທີ່ສອດຄ່ອງກັບຜົນປະໂຫຍດຂອງປະຊາຊົນສອງຊາດ ລັດຖະບານສອງປະເທດກໍມີຄວາມຮັບຜິດຊອບທີ່ຈະປະຕິບັດການໃຫ້ດີ.
ໃນອາທິດຜ່ານມາ, ທ່ານຫຼິວເຮີ້ ກຳມະການກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນ, ຜູ້ຊີ້ນຳໜ່ວຍງານຈີນການເຈລະຈາເສດຖະກິດຮອບດ້ານຈີນ-ອາເມລິກາ ແລະເປັນທູດພິເສດຂອງທ່ານສີຈິ້ນຜິງ ປະທານປະເທດຈີນ ໄດ້ນຳພາຄະນະຜູ້ແທນເດີນທາງໄປອາເມລິກາ ເພື່ອເຂົ້າຮ່ວມກອງປະຊຸມປຶກສາຫາລືເສດຖະກິດການຄ້າຈີນ-ອາເມລິກາ ແລະໃນທີ່ສຸດ, ສອງຝ່າຍກໍສາມາດບັນລຸຄວາມຮັບຮູ້ທີ່ເປັນເອກະພາບກັນ ໂດຍຈະບໍ່ເຮັດສົງຄາມການຄ້າ ແລະ ຢຸດຕິການຂຶ້ນອັດຕາພາສີຕື່ມຕໍ່ກັນ.
ທ່ານລູ້ຄ່າງ ກ່າວຕື່ມວ່າ: ແຕ່ໃດມາ, ຈີນກໍບໍ່ຢາກເຫັນສາຍພົວພັນລະຫວ່າງຈີນ-ອາເມລິກາເຄັ່ງຕຶງຂຶ້ນ ບໍ່ວ່າໃນຂົງເຂດໃດໆກໍຕາມ ເຊິ່ງລວມທັງດ້ານເສດຖະກິດການຄ້າ ສອງປະເທດໃນຖານະເປັນປະເທດໃຫຍ່ ຖ້າວ່າສາມາດຮັກສາສາຍພົວພັນສອງຝ່າຍໃຫ້ດີ, ມີການແລກປ່ຽນແລະຮ່ວມມືທີ່ດີໃນຂົງເຂດຕ່າງໆ ກໍຈະສອດຄ່ອງກັບຜົນປະໂຫຍດຂອງສອງປະເທດ ແລະປະຊາຊົນສອງຊາດຢ່າງແນ່ນອນ ແລະເວົ້າສຳລັບທົ່ວໂລກແລ້ວ ກໍເປັນຂ່າວດີເຊັ່ນດຽວກັນ.
ຂະນະດຽວກັນ, ທ່ານລູ້ຄ່າງ ກໍຊີ້ໃຫ້ເຫັນວ່າ: ເມື່ອເບິ່ງຈາກແງ່ມູມທີ່ຍາວໄກແລ້ວເຫັນວ່າ ສາຍພົວພັນລະຫວ່າງຈີນ-ອາເມລິກາມີການພັດທະນາຕະຫຼອດ 40 ປີຜ່ານມາ ລວມທັງການພົວພັນດ້ານເສດຖະກິດການຄ້າ ໄດ້ເກີດສະພາບຄວາມສັບສົນຂຶ້ນເລື້ອຍໆ ແຕ່ຄຽງຄູ່ກັບສອງຝ່າຍທີ່ເປັນກຸ່ມເສດຖະກິດໃຫຍ່ນີ້ໄປມາຫາສູ່ແລະແລກປ່ຽນກັນນັບມື້ນັບຫຼາຍຂຶ້ນ, ພວກຂ້າພະເຈົ້າກໍບໍ່ສາມາດຮັບປະກັນໄດ້ວ່າ ໃນຕໍ່ໜ້າສອງປະເທດຈະບໍ່ມີຄວາມຂັດແຍ້ງກັນ ແລະ ຄວາມເຫັນທີ່ແຕກຕ່າງກັນອີກ, ຂໍພຽງແຕ່ສອງປະເທດກໍຮັບຮູ້ວ່າ ການພັດທະນາການພົວພັນເສດຖະກິດການຄ້າລະຫວ່າງສອງປະເທດໄດ້ສອດຄ່ອງກັບຜົນປະໂຫຍດຮ່ວມຂອງສອງປະເທດແລະປະຊາຊົນສອງຊາດ ກໍຈະສາມາດຄຸ້ມຄອງ ແລະຄວບຄຸມຄວາມເຫັນທີ່ຂັດແຍ້ງກັນລະຫວ່າງສອງຝ່າຍໄດ້ດີກວ່າເກົ່າ ແລະບໍ່ໃຫ້ເກີດສະພາບດັ່ງກ່າວກັບຄືນມາອີກ.