ທ່ານ ສີຈິ້ນຜິງ ພົບປະກັບທ່ານ ນາງ ແອງເຈີລາ ເມີແຄວ
ທ່ານ ສີຈິ້ນຜິງ ປະທານປະເທດຈີນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງ ແອງເຈີລາ ເມີແຄວ ນາຍົກລັດຖະມົນຕີເຢຍລະມັນຢູ່ນະຄອນຫຼວງປັກກິ່ງໃນວັນທີ 24 ພຶດສະພານີ້.
ໂອກາດນີ້, ທ່ານ ສີຈິ້ນຜິງ ເນັ້ນວ່າ, ສອງປະເທດຈີນແລະເຢຍລະມັນ ຕ້ອງເປັນແບບຢ່າງແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ເປັນຜູ້ນຳພາສາຍພົວພັນຈີນ-ເອີຣົບ, ເປັນຜູ້ຊຸກຍູ້ການພົວພັນລະຫວ່າງຊາດແບບໃໝ່ ແລະເປັນຜູ້ຮ່ວມມືທີ່ລື່ນກາຍຄວາມແຕກຕ່າງກັນດ້ານຮູບຖານຈິດສຳນຶກ. ທັງນີ້ຄວນແມ່ນທິດທາງແຫ່ງຄວາມພະຍາຍາມຮ່ວມລະຫວ່າງສອງຝ່າຍໃນການຊຸກຍູ້ສາຍພົວພັນສອງປະເທດໃນໄລຍະຕໍ່ໄປ. ສອງຝ່າຍຕ້ອງຮັກສາການໄປມາຫາສູ່ກັນໃນລະດັບສູງຢ່າງໃກ້ຊິດ, ເພີ່ມທະວີການອອກແບບສາຍພົວພັນສອງປະເທດຈາກຂັ້ນເທິງ, ສົ່ງເສີມການແລກປ່ຽນແລະການຮ່ວມມືລະຫວ່າງສອງປະເທດໃນທຸກຂົງເຂດ; ຕ້ອງສະແດງໃຫ້ເຫັນເຖິງໜ້າທີ່ຮັບຜິດຊອບແລະຄວາມກ້າຫານຂອງສອງປະເທດ, ຮ່ວມກັນຮັບມືກັບສິ່ງທ້າທາຍລັກສະນະທົ່ວໂລກຊະນິດຕ່າງໆ, ພວກເຮົາຍິນດີຮ່ວມກັບເຢຍລະມັນ, ຊຸກຍູ້ການບໍລິຫານທົ່ວໂລກແລະລັດທິຫຼາຍຝ່າຍພາຍໃຕ້ຂອບຫຼາຍຝ່າຍ, ທັງເພີ່ມທະວີການແລກປ່ຽນຄວາມເຫັນແລະການຮ່ວມມືກັນໃນການຊຸກຍູ້ແກ້ໄຂບັນຫາຈຸດເດັ່ນແລະບັນຫາຫຍຸ້ງຍາກ. ຈີນຊົມເຊີຍເຢຍລະມັນທີ່ສະໜັບສະໜູນຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ແລະຍິນດີຕ້ອນຮັບວິສາຫະກິດເຢຍລະມັນມາເຂົ້າຮ່ວມການສ້າງ "ໜຶ່ງແລວໜຶ່ງເສັ້ນທາງ".
ທ່ານ ສີຈິ້ນຜິງ ກ່າວຕື່ມວ່າ, ຍາມໃດ, ຈີນກໍເດັດດ່ຽວສະໜັບສະໜູນເສັ້ນທາງເຊື່ອມໂຍງເປັນເອກະພົບດຽວທີ່ເອີຣົບຄັດເລືອກຢ່າງເປັນເຈົ້າການ, ຫວັງວ່າສະຫະພາບເອີຣົບ ຈະຮັກສາຄວາມສາມັກຄີ, ສະຖຽນລະພາບ, ການເປີດປະຕູສູ່ພາຍນອກ ແລະຄວາມຈະເລີນຮຸ່ງເຮືອງ.
ທ່ານນາງ ເມີແຄວ ກ່າວວ່າ, ສາຍພົວພັນເຢຍລະມັນ-ຈີນ ໄດ້ເຂົ້າສູ່ຍຸກໃໝ່, ປະເທດຕົນຍິນດີກຳໂອກາດໃໝ່ທີ່ຈີນລົງເລິກການເປີດປະຕູສູ່ພາຍ ນອກ, ເປີດກວ້າງການຮ່ວມມືດ້ານການລົງທຶນແລະການຄ້າລະຫວ່າງສອງປະເທດ ແລະເປີດກວ້າງການແລກປ່ຽນດ້ານວັດທະນະທຳ. ພາຍໃຕ້ເບື້ອງຫຼັງທີ່ສະຖານະການໂລກປັດຈຸບັນເກີດມີການປ່ຽນແປງຢ່າງໃຫຍ່ຫຼວງ, ສອງປະເທດເຢຍລະມັນແລະຈີນຄວນເພີ່ມທະວີການຕິດຕໍ່ພົວພັນແລະການປະສານງານໃນວຽກງານສາກົນ, ເພີ່ມທະວີການຮ່ວມມືທີ່ບັງເກີດຜົນພາຍໃຕ້ຂອບຫຼາຍຝ່າຍ ເຊັ່ນກຸ່ມ 20 ປະເທດເປັນຕົນຢ່າງໃກ້ຊິດ. ເຢຍລະມັນສະໜັບສະໜູນການເພີ່ມທະວີສາຍພົວພັນການຮ່ວມມືເອີຣົບ-ຈີນ.