ນາຍົກຈີນເຂົ້າຢ້ຽມຄຳນັບທ່ານບຸນຍັງ ວໍລະຈິດ
ຕອນບ່າຍວັນທີ 31 ພຶດສະພາຜ່ານມາຢູ່ ນະຄອນຫຼວງປັກກິ່ງ, ທ່ານຫຼີເຄີ້ສຽງ ກຳມະການປະຈຳກົມການເມືອງສູນກາງພັກກອມມູນິດຈີນ, ນາຍົກລັດຖະມົນຕີຈີນໄດ້ເຂົ້າຢ້ຽມຄຳນັບທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງສປປ ລາວ.
ທ່ານຫຼີເຄີ້ສຽງ ຊີ້ໃຫ້ເຫັນວ່າ: ຈີນຍິນດີປະສານສົມທົບກັບລາວຢ່າງໃກ້ຊິດ, ຊຸກຍູ້ການຮ່ວມມືໃນຂົງເຂດສຳຄັນຕ່າງໆເປັນຕົ້ນ ພື້ນຖານໂຄງລ່າງຄົມມະນາຄົມ,ກະສິກຳ, ການສຶກສາ,ທ່ອງທ່ຽວແລະອື່ນໆເພື່ອຮ່ວມກັນເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໃຫ້ໄດ້ຮັບຄວາມຄືບໜ້າໃໝ່ໃນຫຼາຍຂົງເຂດແລະຫຼາຍລະດັບ. ຈີນສະໜັບສະໜູນບໍລິສັດຈີນທີ່ມີກຳລັງຕົວຈິງແລະຊື່ສັດໄປລົງທຶນແລະດຳເນີນທຸລະກິດຢູ່ລາວເພື່ອບັນລຸໃຫ້ຕ່າງຝ່າຍຕ່າງມີຜົນປະໂຫຍດຫຼາຍຂຶ້ນ.
ທ່ານບຸນຍັງ ວໍລະຈິດຢືນຢັນວ່າ: ລາວ-ຈີນເປັນຄູ່ຮ່ວມມືຍຸດທະສາດຮອບດ້ານ. ລາວຮູ້ສຶກປິຕິຊົມຊື່ນຕໍ່ຜົນສຳເລັດດ້ານການພັດທະນາຢ່າງໃຫຍ່ຫຼວງຂອງຈີນ ແລະຂອບໃຈຕໍ່ຈີນທີ່ໄດ້ໃຫ້ການຊ່ວຍເຫຼືອຢ່າງຈິງໃຈແລະການສະໜັບສະໜູນອັນປະເສີດເພື່ອການພັດທະນາເສດຖະກິດ-ສັງຄົມລາວໃນໄລຍະຍາວນານມານີ້, ແລະລາວຍິນດີສືບຕໍ່ປະຕິບັດຕາມທິດ "4 ດີ", ຊຸກຍູ້ການຮ່ວມມືລະຫວ່າງສອງຝ່າຍໃນຂົງເຂດພື້ນຖານໂຄງລ່າງ,ກະສິກຳ,ການສຶກສາ,ສາທາລະນະສຸກແລະອື່ນໆ, ຮັດແໜ້ນການແລກປ່ຽນລະຫວ່າງປະຊາຊົນສອງຊາດຕື່ມອີກ, ເສີມຂະຫຍາຍສາຍພົວພັນສອງພັກ-ລັດແລະການຮ່ວມມືລະຫວ່າງສອງຝ່າຍໃຫ້ໄດ້ຮັບຜົນສຳເລັດໃໝ່ໃຫຍ່ຫຼວງກວ່າເກົ່າ.