ທ່ານວາງຢີ້ ພົບປະກັບລັດຖະມົນຕີການຕ່າງປະເທດຣັດເຊຍ
ວັນທີ 3 ມິຖຸນານີ້, ໃນໄລຍະດຳເນີນກອງປະຊຸມການພົບປະຢ່າງເປັນທາງການຂອງລັດຖະມົນຕີການຕ່າງປະເທດບຣິກສ ທີ່ຈັດຂຶ້ນຢູ່ນະຄອນເປຣໂຕຣີ ປະເທດອາຟຣິກກາໃຕ້, ທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານເຊີເກ ລັຟຣົຟ ລັດຖະມົນຕີກະຊວງການຕ່າງປະເທດຣັດເຊຍ.
ທ່ານວາງຢີ້ຢືນຢັນວ່າ: ປະທານາທິບໍດີປູຕິນຈະຢ້ຽມຢາມຈີນທາງລັດຖະກິດທັງເຂົ້າຮ່ວມກອງປະຊຸມສຸດຍອດອົງການຮ່ວມມືຊຽງໄຮຊິ່ງຕາວແຕ່ວັນທີ 8-10 ມິຖຸນານີ້. ຖືວ່າເປັນເທື່ອທຳອິດທີ່ທ່ານປະທານາທິບໍດີປູຕິນຢ້ຽມຢາມຈີນໃນອາຍຸການດຳລົງຕຳແໜ່ງວາລະໃໝ່ ທັງເປັນການພົບປະຄັ້ງທຳອິດໃນປີນີ້ລະຫວ່າງ ປະທານສີຈິ້ນຜິງແລະ ປະທານາທິບໍດີປູຕິນ ເຊິ່ງມີຄວາມໝາຍສຳຄັນຕໍ່ການວາງແຜນພັດທະນາສາຍພົວພັນຈີນ-ຣັດເຊຍໃນໄລຍະຕໍ່ໜ້າ. ຈີນຍິນດີປະສານສົມທົບກັບຣັດເຊຍຢ່າງໃກ້ຊິດເພື່ອຮັບປະກັນໃຫ້ການຢ້ຽມຢາມຈີນຂອງທ່ານປູຕິນໄດ້ຮັບຜົນສຳເລັດຢ່າງຫຼວງຫຼາຍແລະຈົບງາມ, ເພື່ອເພີ່ມພະລັງໃໝ່ຂັບເຄື່ອນການຂະຫຍາຍຕົວຂອງສາຍພົວພັນຈີນ-ຣັດເຊຍ.
ທ່ານລັຟຣົຟຢືນຢັນວ່າ: ຣັດເຊຍໃຫ້ຄວາມສຳຄັນສູງຕໍ່ທ່ານປະທານາທິບໍດີປູຕິນຈະເດີນທາງໄປຢ້ຽມຢາມຈີນທາງລັດຖະກິດໃນໄວໆນີ້ ແລະຮູ້ສຶກເພິ່ງພໍໃຈຕໍ່ຄວາມຄືບໜ້າດ້ານວຽກງານກະກຽມໃນປັດຈຸບັນ ແລະຍິນດີຮ່ວມກັບຈີນພະຍາຍາມເພື່ອຮັບປະກັນໃຫ້ການຢ້ຽມຢາມຄັ້ງນີ້ປະສົບຜົນສຳເລັດຕາມເປົ້າໝາຍທີ່ວາງໄວ້.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບສະຖານະການຢູ່ແຫຼມເກົາຫຼີອີກດ້ວຍ.