ທ່ານເກິງສວງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຖະແຫຼງຂ່າວໃນວັນທີ 13 ມິຖຸນານີ້ວ່າ: ໝາກຜົນຂອງການພົບປະລະຫວ່າງຜູ້ນຳ ສປປ ເກົາຫຼີ ແລະ ອາເມຣິກາຢູ່ສິງກະໂປ ແມ່ນຄວາມຄືບໜ້າທີ່ຖືກຕ້ອງ ແລະສຳຄັນ ທີ່ກ້າວໄປສູ່ການປອດນິວເຄຼຍຢູ່ແຫຼມເກົາຫຼີ, ສິ້ນສຸດການເປັນປໍລະປັກກັນ, ສະແຫວງຫາສັນຕິພາບຖາວອນ ແລະຄວາມຈະເລີນຮຸ່ງເຮືອງຢູ່ແຫຼມດັ່ງກ່າວ. ຈີນຍິນດີຮ່ວມກັບບັນດາຝ່າຍທີ່ກ່ຽວຂ້ອງ ສືບຕໍ່ສຸມໃສ່ຄວາມພະຍາຍາມ ແລະປະກອບສ່ວນເພື່ອບັນລຸການປອດນິວເຄຼຍ-ການສ້າງກົນໄກສັນຕິພາບຢູ່ແຫຼມເກົາຫຼີ, ພ້ອມທັງບັນລຸຄວາມສະຫງົບຖາວອນຢູ່ແຫຼມດັ່ງກ່າວ.
ຂ່າວລາຍງານວ່າ ວັນທີ 12 ມິຖຸນານີ້, ຜູ້ນຳ ສປປ ເກົາຫຼີ ແລະ ອາເມຣິກາ ໄດ້ພົບປະກັນຢູ່ສິງກະໂປ ແລະ ອອກຖະແຫຼງການຮ່ວມ ເຊິ່ງໃນຖະແຫຼງການ ອາເມຣິກາໄດ້ໃຫ້ຄຳໝັ້ນສັນຍາຈະຮັບປະກັນຄວາມໝັ້ນຄົງຕໍ່ ສປປ ເກົາຫຼີ ແລະ ສປປ ເກົາຫຼີກໍໃຫ້ຄຳໝັ້ນສັນຍາຢ່າງເດັດດ່ຽວວ່າຈະສຸມໃສ່ບັນລຸການປອດນິວເຄຼຍຢູ່ແຫຼມເກົາຫຼີ. ຂະນະທີ່ປະຊາຄົມໂລກໂດຍທົ່ວໄປກໍມີທ່າທີສະໜັບສະໜູນຢ່າງຕັ້ງໜ້າຕໍ່ຜົນການພົບປະດັ່ງກ່າວ ແຕ່ກໍມີຄຳວິຈານວ່າ ສປປ ເກົາຫຼີບໍ່ມີທ່າທີປະນີປະນອມຢ່າງແທ້ຈິງ ເພາະໃນຖະແຫຼງການບໍ່ໄດ້ກຳນົດມາດຕະການທີ່ເປັນຮູບປະທຳ ແລະ ຕາຕະລາງເວລາ ການຈັດຕັ້ງປະຕິບັດໃນຕໍ່ໜ້າເຊິ່ງຈະເປັນໜ້າທີ່ໜັກໜ່ວງ ແລະ ເປັນເສັ້ນທາງທີ່ຍາວໄກ ຈຶ່ງເຫັນວ່າຄວາມໝາຍທີ່ແທ້ຈິງມີຈຳກັດ.
ທ່ານເກິງສວງ ກ່າວວ່າ: ບັນຫາແຫຼມເກົາຫຼີມີຄວາມສັບສົນຫຼາຍ ແລະເປັນບັນຫາພິເສດ ຈຶ່ງບໍ່ອາດຈະກະທຳບາດດຽວກໍສາມາດແກ້ໄຂໄດ້ ຕ້ອງໃຫ້ບັນດາຝ່າຍມີມະນາອົດທົນ, ຍຶດໝັ້ນຄວາມພະຍາຍາມຢ່າງບໍ່ລົດລະ ເພື່ອເຮັດໃຫ້ການແກ້ໄຂບັນຫາແຫຼມເກົາຫຼີຜ່ານຊ່ອງທາງການເມືອງນັ້ນ ເປັນຂະບວນການທີ່ຕໍ່ເນື່ອງ ແລະປີ້ນຄືນບໍ່ໄດ້.