ໂຄສົກກະຊວງການຄ້າຈີນ ໄດ້ໃຫ້ສຳພາດຂ່າວກ່ຽວກັບຖະແຫຼງການຂອງທຳນຽບຂາວອາເມຣິກາໃນວັນທີ 18 ມິຖຸນານີ້ວ່າ: ພາຍຫຼັງອາເມຣິກາເປີດເຜີຍບັນຊີເກັບພາສີທີ່ເປັນມູນຄ່າ 50 ຕື້ໂດລາສະຫະລັດແລ້ວ, ກໍໄດ້ນາບຂູ່ວ່າຈະຈັດວາງບັນຊີເກັບພາສີທີ່ເປັນມູນຄ່າ 200 ຕື້ໂດລາສະຫະລັດອີກ. ການກະທຳທີ່ກົດດັນແລະຂູ່ຂວັນເຖິງເສັ້ນຕ່ຳສຸດແບບນີ້ ເປັນການລະເມີດຄວາມເປັນເອກະພາບກັນລະຫວ່າງສອງຝ່າຍຫຼັງການເຈລະຈາຫຼາຍເທື່ອ, ທັງເຮັດໃຫ້ປະຊາຄົມໂລກຜິດຫວັງທີ່ສຸດ. ຖ້າຫາກວ່າອາເມຣິກາເສຍສະຕິໄປແລະເປີດເຜີຍບັນຊີດັ່ງກ່າວ, ຈີນກໍຈຳເປັນຕ້ອງໃຊ້ມາດຕະການສົມທົບກັນລະຫວ່າງປະລິມານແລະຄຸນນະພາບເພື່ອຕອບໂຕ້ຢ່າງແຂງແຮງ.
ໂຄສົກຊີ້ອອກວ່າ, ອາເມຣິກາກໍ່ສົງຄາມການຄ້າ, ເປັນການລະເມີດກົດເກນຕະຫຼາດ, ບໍ່ສອດຄ່ອງກັບກະແສແຫ່ງການພັດທະນາຂອງໂລກໃນປັດຈຸບັນ, ເປັນການທຳລາຍຜົນປະໂຫຍດຂອງປະຊາຊົນແລະວິສາຫະກິດຂອງສອງປະເທດຈີນ-ອາເມຣິກາ ແລະທຳລາຍຜົນປະໂຫຍດຂອງປະຊາຊົນທົ່ວໂລກ. ການຕອບໂຕ້ຂອງຈີນ ກໍເພື່ອປົກປັກຮັກສາແລະປົກປ້ອງຜົນປະໂຫຍດຂອງປະເທດຊາດແລະປະຊາຊົນ, ທັງເພື່ອປົກປັກຮັກສາແລະປົກປ້ອງໂຄງປະກອບການຄ້າເສລີ, ປົກປັກຮັກສາແລະປົກປ້ອງຜົນປະໂຫຍດຮ່ວມຂອງມວນມະນຸດ. ບໍ່ວ່າສະພາບແວດລ້ອມພາຍນອກຈະປ່ຽນແປງແນວໃດ, ຈີນລ້ວນແຕ່ຈະອີງຕາມຈັງຫວະຂອງເປົ້າໝາຍທີ່ກຳນົດໄວ້ລ່ວງໜ້າ, ຍຶດໝັ້ນຖືປະຊາຊົນເປັນໃຈກາງ, ຊຸກຍູ້ການປະຕິຮູບແລະໄຂປະຕູສູ່ພາຍນອກຢ່າງເດັດດ່ຽວ, ຊຸກຍູ້ເສດຖະກິດໃຫ້ພັດທະນາດ້ວຍຄຸນນະພາບສູງຢ່າງເດັດດ່ຽວ ແລະເລັ່ງລັດສ້າງລະບົບເສດຖະກິດທັນສະໄໝໃຫ້ໄວຂຶ້ນກວ່າເກົ່າ.