ທ່ານສີຈິ້ນຜິງຮຽກຮ້ອງໃຫ້ພະຍາຍາມສ້າງສະພາບໃໝ່ທາງການທູດຂອງປະເທດໃຫຍ່ທີ່ມີສີສັນພິເສດຂອງຈີນ
ກອງປະຊຸມວຽກງານການຕ່າງປະເທດສູນກາງຈີນໄດ້ໄຂຂຶ້ນຢູ່ນະຄອນຫຼວງປັກກິ່ງແຕ່ວັນທີ 22 ຫາວັນທີ 23 ມິຖຸນານີ້. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສທີ່ສຳຄັນໃນກອງປະຊຸມດັ່ງກ່າວ ໂດຍເນັ້ນວ່າ: ວຽກງານຕ່າງປະເທດຂອງປະເທດຕົນຕ້ອງຍຶດໝັ້ນນຳພາໂດຍແນວຄິດການຕ່າງປະເທດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ວາງແຜນສະພາບລວມທັງພາຍໃນ ແລະຕ່າງປະເທດຢ່າງເປັນເອກະພາບກັນ, ກຳແໜ້ນຈຸດປະສົງຕົ້ນຕໍທີ່ບໍລິການການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນຄືນໃໝ່ ແລະຊຸກຍູ້ຄວາມກ້າວໜ້າຂອງມວນມະນຸດ, ຊຸກຍູ້ສ້າງປະຊາຄົມຮ່ວມຊາຕາກຳຂອງມວນມະນຸດ, ເດັດດ່ຽວປົກປັກຮັກສາອະທິປະໄຕ, ຄວາມໝັ້ນຄົງ ແລະຜົນປະໂຫຍດການພັດທະນາຂອງປະເທດຊາດ, ຕັ້ງໜ້າເຂົ້າຮ່ວມການນຳພາການປະຕິຮູບລະບົບ ບໍລິຫານທົ່ວໂລກ, ສ້າງເຄືອຂ່າຍສາຍພົວພັນຄູ່ຮ່ວມທົ່ວໂລກທີ່ດີກວ່າເກົ່າ, ພະຍາຍາມສ້າງສະພາບໃໝ່ທາງການທູດຂອງປະເທດໃຫຍ່ທີ່ມີສີສັນພິເສດຂອງຈີນ, ສ້າງເງື່ອນໄຂເອື້ອອຳນວຍ ແລະປະກອບສ່ວນເທົ່າທີ່ຄວນເຂົ້າໃນການສ້າງສັງຄົມທີ່ອີ່ມໜຳສຳລານຢ່າງຮອບດ້ານໃຫ້ສຳເລັດ ແລ້ວສ້າງປະເທດສັງຄົມນິຍົມທີ່ທັນສະໄໝ ແລະເຂັ້ມແຂງຢ່າງຮອບດ້ານ.
ທ່ານສີຈິ້ນຜິງຊີ້ໃຫ້ເຫັນວ່າ: ນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນນິດຈີນເປັນຕົ້ນມາ, ໂດຍຜະເຊີນໜ້າກັບຄວາມສະຫຼັບສັບຊ້ອນຂອງສະຖານະການສາກົນ, ວຽກງານການຕ່າງປະເທດຂອງປະເທດຕົນໄດ້ແກ້ໄຂຄວາມຫຍຸ້ງຍາກຕ່າງໆນາໆ ແລະໄດ້ຮັບຄວາມກ້າວໜ້າຢ່າງສະຫງ່າຜ່າເຜີຍ, ໄດ້ຊຸກຍູ້ວຽກງານການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນຢ່າງມີຫົວຄິດປະດິດສ້າງ ເຊິ່ງໄດ້ຜ່ານຜ່າຄວາມສ່ຽງ ແລະການທົດສອບຢ່າງຫຼວງຫຼາຍ, ຍາດມາໄດ້ໄຊຊະນະຢ່າງຫຼວງຫຼາຍ, ໄດ້ສຳເລັດໜ້າທີ່ໃຫຍ່ໜ້າທີ່ສຳຄັນຢ່າງຫຼວງຫຼາຍ ແລະໄດ້ຮັບຜົນສຳເລັດເປັນຄັ້ງປະຫວັດສາດ. ພ້ອມກັນນັ້ນໄດ້ດຳເນີນການປະດິດສ້າງໃໝ່ທີ່ສຳຄັນຕ່າງໆດ້ານທິດສະດີ ແລະພຶດຕິກຳກ່ຽວກັບວຽກງານທາງການທູດ ເຊິ່ງໄດ້ກໍ່ຕົວເປັນແນວຄິດການທູດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່.
ທ່ານກ່າວຕື່ມວ່າ: ປັດຈຸບັນ, ປະເທດຕົນພວມຢູ່ໃນໄລຍະການພັດທະນາທີ່ດີທີ່ສຸດນັບແຕ່ປີ 1840 ເປັນຕົ້ນມາ, ທົ່ວໂລກພວມຢູ່ໄລຍະການປ່ຽນແປງໃຫຍ່ທີ່ບໍ່ເຄີຍມີມາກ່ອນໃນຮອບຮ້ອຍປີຜ່ານມາ, ສະພາບທັງສອງດ້ານດັ່ງກ່າວກໍໄດ້ປົນກັນ ແລະຊຸກຍູ້ເຊິ່ງກັນ ແລະກັນ. ພວກເຮົາຕ້ອງວິເຄາະກົດເກນການປ່ຽນແປງຂອງສະຖານະການສາກົນໃນໄລຍະຂ້າມຜ່ານຢ່າງເລິກເຊິ່ງ, ກຳແໜ້ນຈຸດພິເສດພື້ນຖານຂອງສະພາບແວດລ້ອມພາຍນອກຂອງປະເທດຕົນໃນໄລຍະຂ້າມຜ່ານໃນປະຫວັດສາດຢ່າງຖືກຕ້ອງ, ວາງແຜນ ແລະຊຸກຍູ້ວຽກງານການຕ່າງປະເທດຢ່າງເປັນເອກະພາບກັນ. ຕ້ອງຊູຄັນທຸງແຫ່ງການສ້າງປະຊາຄົມຮ່ວມຊາຕາກຳຂອງມວນມະນຸດ, ຊຸກຍູ້ລະບົບບໍລິຫານທົ່ວໂລກໃຫ້ພັດທະນາຕາມທິດທີ່ຍຸດຕິທຳ ແລະສົມເຫດສົມຜົນກວ່າເກົ່າ. ຕ້ອງຍຶດໝັ້ນປຶກສາຫາລືຮ່ວມກັນ, ສ້າງສາຮ່ວມກັນ ແລະຊົມໃຊ້ຮ່ວມກັນ, ຊຸກຍູ້ການກໍ່ສ້າງ “ໜຶ່ງແລວໜຶ່ງເສັ້ນທາງ” ໃຫ້ມີການພັດທະນາຢ່າງໝັ້ນທ່ຽງ ແລະຍາວນານ ແລະຊຸກຍູ້ການເປີດປະຕູສູ່ພາຍນອກຂຶ້ນສູ່ລະດັບໃໝ່. ຕ້ອງວາງແຜນການກ່ຽວກັບການພົວພັນກັບປະເທດໃຫຍ່ເປັນຢ່າງດີ, ຊຸກຍູ້ການສ້າງຂອບການພົວພັນລະຫວ່າງປະເທດໃຫຍ່ທີ່ມີຄວາມໜັກແໜ້ນໂດຍລວມ ແລະມີການພັດທະນາຢ່າງສະໝ່ຳສະເໝີກັນ. ຕ້ອງເຮັດວຽກງານການຕ່າງປະເທດກັບປະເທດອ້ອມຂ້າງໃຫ້ດີ, ຊຸກຍູ້ສະພາບແວດລ້ອມທີ່ຢູ່ອ້ອມຂ້າງມີໄມຕີຈິດມິດຕະພາບທີ່ດີກວ່າເກົ່າ ແລະມີຜົນປະໂຫຍດຫຼາຍກວ່າເກົ່າ. ຕ້ອງລົງເລິກຄວາມສາມັກຄີ ແລະການຮ່ວມມືກັບປະເທດທີ່ກຳລັງພັດທະນາ, ຊຸກຍູ້ສ້າງສະພາບການໃໝ່ທີ່ມີຄວາມກ້າວໜ້າຮ່ວມກັນ ແລະພັດທະນາຮ່ວມກັນ. ປະເທດທີ່ກຳລັງພັດທະນາອັນໄພສານແມ່ນພັນທະມິດທຳມະຊາດໃນວຽກງານສາກົນຂອງປະເທດຕົນ, ຕ້ອງຍຶດໝັ້ນທັດສະນະກ່ຽວກັບຄວາມເປັນທຳ ແລະຜົນປະໂຫຍດທີ່ຖືກຕ້ອງ, ປະຕິບັດການຮ່ວມມື ແລະຄວາມສາມັກຄີີກັບປະເທດທີ່ກຳລັງພັດທະນາເປັນຢ່າງດີ. ຕ້ອງລົງເລິກຊຸກຍູ້ປະເທດຕົນແລກປ່ຽນກັບໂລກຢ່າງເລິກເຊິ່ງ ແລະຖອດຖອນບົດຮຽນເຊິ່ງກັນ ແລະກັນ.