ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ ໄດ້ໃຫ້ການຊີ້ນຳທີ່ສຳຄັນຕໍ່ວຽກງານປາບປາມຢາເສບຕິດຫວ່າງມໍ່ໆນີ້ ໂດຍຊີ້ເນັ້ນວ່າ: ຕ້ອງເພີ່ມທະວີການນຳພາຂອງພັກ, ເສີມຂະຫຍາຍທ່າແຮງທາງການເມືອງ ແລະ ທາງລະບອບແບບແຜນຢ່າງເຕັມສ່ວນ, ປັບປຸງລະບົບການບໍລິຫານໃຫ້ສົມບູນ, ມອບຄວາມຮັບຜິດຊອບໃນໜ້າທີ່ວຽກງານໃຫ້ດີ, ລະດົມຂົນຂວາຍມວນຊົນອັນໄພສານ ແລະ ເດີນຕາມເສັ້ນທາງການປາບປາມແລະແກ້ໄຂບັນຫາຢາເສບຕິດທີ່ມີສີສັນພິເສດຂອງຈີນ, ມີຄວາມເດັດດ່ຽວເອົາຊະນະບັ້ນຮົບປະຊາຊົນປາບປາມຢາເສບຕິດໃນຍຸກໃໝ່.
ທ່ານສີຈິ້ນຜິງ ກ່າວເນັ້ນອີກວ່າ: ວຽກງານປາບປາມຢາເສບຕິດໄດ້ຕິດພັນກັບຄວາມໝັ້ນຄົງຂອງປະເທດ, ຄວາມຈະເລີນຮຸ່ງເຮືອງຂອງຊົນຊາດ ແລະ ຄວາມຜາສຸກຂອງປະຊາຊົນຈີນ ສະນັ້ນ, ເມື່ອໃດທີ່ບັນຫາຢາເສບຕິດຍັງບໍ່ສາມາດແກ້ໄຂໄດ້ ເມື່ອນັ້ນກໍບໍ່ສາມາດຈະໂຍະຍານໄດ້ໃນການປາບປາມຢາເສບຕິດ. ຕ້ອງຕໍ່ຕ້ານກັບອາຊະຍາກຳທີ່ຕິດພັນກັບຢາເສບຕິດຢ່າງເຂັ້ມງວດຕາມກົດໝາຍ, ເພີ່ມຄວາມເຂັ້ມງວດຢູ່ເຂດຈຸດສຸມ, ເດັດດ່ຽວທຳລາຍເຄືອຂ່າຍກຸ່ມແກ້ງລັກຜະລິດແລະຄ້າຂາຍຢາເສບຕິດ, ສືບສວນ-ສອບສວນອິດທິກຳລັງມືດແລະຮ້າຍກາດທີ່ພົວພັນກັບຢາເສບຕິດ ພ້ອມພວກທີ່ໃຫ້ການອາລັກຂາຢູ່ເບື້ອງຫຼັງ ເພື່ອກຳຈັດແຫຼ່ງກຳເນີດບັນຫາຢາເສບຕິດ; ຕ້ອງຖືການປ້ອງກັນເປັນສຳຄັນ, ຖືເອົາຊາວໜຸ່ມເຍົາວະຊົນ ແລະອື່ນໆເປັນເປົ້າໝາຍປ້ອງກັນທີ່ສຳຄັນ, ໂຄສະນາ ແລະສຶກສາການປ້ອງກັນຢາເສບຕິດໃຫ້ທົ່ວເຖິງ ເພື່ອສ້າງບັນຍາກາດອັນເຂັ້ມຂຸ້ນໃນທົ່ວສັງຄົມເພື່ອຕ້ານກັບຢາເສບຕິດຢ່າງເປັນເຈົ້າການ.