ທ່ານເຈັມສ ມາຕິສ ລັດຖະມົນຕີກະຊວງປ້ອງກັນປະເທດອາເມລິກາໄດ້ຢ້ຽມຢາມຈີນແຕ່ວັນທີ 26 ຫາ 28 ມິຖຸນານີ້. ທ່ານອູຊ່ຽນ ໂຄສົກກະຊວງປ້ອງກັນປະເທດຈີນໄດ້ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນວັນທີ 28 ມິຖຸນານີ້ວ່າ: ການຢ້ຽມຢາມຂອງທ່ານມາຕິສໄດ້ຮັບຜົນສຳເລັດທີ່ດີແລະມີລັກສະນະສ້າງສັນ. ນອກນີ້, ທ່ານຍັງເປີດເຜີຍວ່າ ທ່ານເວີ້ຍເຟິ້ງເຮີ ລັດຖະມົນຕີກະຊວງປ້ອງກັນປະເທດຈີນຈະໄປຢ້ຽມຢາມອາເມລິກາໃນປີນີ້ຕາມຄຳເຊີນ. ທ່ານອູຊ່ຽນກ່າວວ່າ:
“ໃນໄລຍະການຢ້ຽມຢາມເທື່ອນີ້, ທ່ານປະທານສີຈິ້ນຜິງໄດ້ຕ້ອນຮັບການເຂົ້າຢ້ຽມຄຳນັບຂອງທ່ານມາຕິສ, ທ່ານສວີຊີລ້ຽງ ກຳມະການກົມການເມືອງສູນກາງພັກກອມມູນິດຈີນ, ຮອງປະທານຄະນະກຳມະການການທະຫານສູນກາງຈີນ, ທ່ານຢາງເຈສື ກຳມະການກົມການເມືອງສູນກາງພັກກອມມູນິດຈີນ, ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງພັກກອມມູນິດຈີນ, ທ່ານເວີ້ຍເຟິ້ງເຮີ ທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນປະເທດຈີນ ຕ່າງກໍໄດ້ພົບປະຫາລືກັບທ່ານມາຕິສ. ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບ ສະຖານະການໃນສາກົນແລະພາກພື້ນ, ການພົວພັນສອງປະເທດແລະສອງກອງທັບກໍຄືບັນຫາທີ່ສົນໃຈຮ່ວມກັນເຊັ່ນ ແຫຼມເກົາຫຼີ, ໄຕ້ຫວັນ,ຄວາມໝັ້ນຄົງທາງທະເລແລະອື່ນໆ, ທັງໄດ້ບັນລຸຄວາມເປັນເອກະພາບກັນສຳຄັນຫຼາຍຢ່າງເປັນຕົ້ນ ເພີ່ມທະວີການໄປມາຫາສູ່ກັນທຸກຂັ້ນຂອງສອງກອງທັບ, ເພີ່ມຄວາມໄວ້ເນື້ອເຊື່ອໃຈກັນທາງການທະຫານ,ລົງເລິກການຮ່ວມມືທີ່ຕິດແທດຕົວຈິງ, ຄຸ້ມຄອງແລະຄວບຄຸມຄວາມສ່ຽງແລະສິ່ງທ້າທາຍໃນບາດກ້າວຕໍ່ໄປແລະອື່ນໆເຊິ່ງການຢ້ຽມຢາມຄັ້ງນີ້ໄດ້ຮັບຜົນງານທີ່ດີແລະມີລັກສະນະສ້າງສັນ.”