ເວທີປຶກສາຫາລືການຮ່ວມມືສາກົນດ້ານການປົກຄອງດ້ວຍກົດໝາຍ “ໜຶ່ງແລວໜຶ່ງເສັ້ນທາງ” ທີ່ກະຊວງການຕ່າງປະເທດຈີນ ແລະ ສະມາຄົມກົດໝາຍຈີນຮ່ວມກັນເປັນເຈົ້າພາບນັ້ນ ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 2 ກໍລະກົດນີ້.
ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ເຂົ້າຮ່ວມພິທີເປີດປະຊຸມ ແລະ ກ່າວສຸນທອນພົດ; ທ່ານຫວາງເລີ້ສວນ ປະທານສະມາຄົມກົດໝາຍຈີນ ກ່າວປາໄສ.
ທ່ານຫວາງຢີ້ ກ່າວວ່າ: ທ່ານສີຈິ້ນຜິງ ປະທານປະເທດຈີນສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຕະຫຼອດ 5 ປີຜ່ານມາ ການຮ່ວມມືໃນຂອບ “ໜຶ່ງແລວໜຶ່ງເສັ້ນທາງ” ໄດ້ຮັບໝາກຜົນຢ່າງຫຼວງຫຼາຍ ແລະ ມີຄວາມຄືບໜ້າເກີນຄາດໝາຍ ຈຶ່ງໄດ້ຮັບຄວາມຍິນດີຕ້ອນຮັບທົ່ວໄປຈາກປະຊາຄົມໂລກ ເນື່ອງຈາກວ່າ “ໜຶ່ງແລວໜຶ່ງເສັ້ນທາງ” ໄດ້ຍຶດໝັ້ນຫຼັກການສະເໝີພາບ, ຍຶດໝັ້ນເປົ້າໝາຍການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະ ຖືເອົາການເປີດປະຕູ-ກວມລວມເປັນຈຸດປະສົງ, ຍຶດໝັ້ນການເຊື່ອມຕໍ່ການພັດທະນາ ທັງຖືເອົາກົດລະບຽບ-ການປົກຄອງດ້ວຍກົດໝາຍເປັນພື້ນຖານ. ພວກເຮົາເຫັນວ່າ ກົດລະບຽບ-ການປົກຄອງດ້ວຍກົດໝາຍເໝືອນດັ່ງໜັງສືເດີນທາງກ້າວໄປສູ່ໂລກຂອງ “ໜຶ່ງແລວໜຶ່ງເສັ້ນທາງ” ທັງເປັນວາວນີລະໄພໃນການຮັບມືກັບສິ່ງທ້າທາຍຈາກຄວາມສ່ຽງອີກດ້ວຍ. ພວກເຮົາຕ້ອງຊຸກຍູ້ການເຊື່ອມຈອດພື້ນຖານໂຄງລ່າງ ທັງເພີ່ມທະວີການເຊື່ອມຈອດກົດລະບຽບແລະມາດຕະຖານອີກດ້ວຍໃນຂອບ “ໜຶ່ງແລວໜຶ່ງເສັ້ນທາງ”, ປັບປຸງລະບົບຮັບປະກັນການປົກຄອງດ້ວຍກົດໝາຍ ແລະ ລົງເລິກການແລກປ່ຽນແລະການຮ່ວມມືສາກົນດ້ານການປົກຄອງດ້ວຍກົດໝາຍໃນຂອບດັ່ງກ່າວ. ຈີນຈະອອກທຶນເພື່ອດຳເນີນໂຄງການສຶກສາຄົ້ນຄວ້າການຮ່ວມມືດ້ານການປົກຄອງດ້ວຍກົດໝາຍ “ໜຶ່ງແລວໜຶ່ງເສັ້ນທາງ” ເພື່ອ ສະໜັບສະໜູນປະເທດລຽບຕາມ “ໜຶ່ງແລວໜຶ່ງເສັ້ນທາງ” ໃນການສ້າງຄວາມສາມາດດ້ານການປົກຄອງດ້ວຍກົດໝາຍ ແລະ ການອົບຮົມສ້າງບຸກຄະລາກອນດ້ານກົດໝາຍສາກົນ.