ເວທີປຶກສາຫາລືສາກົນການຮ່ວມມືດ້ານການປົກຄອງດ້ວຍກົດໝາຍ “ໜຶ່ງແລວໜຶ່ງເສັ້ນທາງ”ໄດ້ຈັດຂຶ້ນແຕ່ວັນທີ 2-3 ກໍລະກົດນີ້ຢູ່ນະຄອນຫຼວງປັກກິ່ງ ໂດຍມີເຈົ້າໜ້າທີ່ລັດຖະບານປະເທດເຂົ້າຮ່ວມ“ໜຶ່ງແລວໜຶ່ງເສັ້ນທາງ”, ຜູ້ແທນອົງການຈັດຕັ້ງສາກົນ, ຜູ້ຊ່ຽວຊານ-ນັກວິຊາການພາຍໃນແລະຕ່າງປະເທດ ແລະແຂກຖືກເຊີນທັງໝົດ 350 ກວ່າທ່ານເຂົ້າຮ່ວມ.
ທ່ານຂົງສວນໂຢ້ວ ຮອງລັດຖະມົນຕີກະຊວງການຕ່າງປະເທດຈີນ ແລະ ທ່ານເສີນຈີ້ຜິງ ຮອງປະທານສະມາຄົມກົດໝາຍຈີນ ໄດ້ເປັນປະທານຮ່ວມຂອງກອງປະຊຸມ ແລະ ຫຼັງສຳເລັດກອງປະຊຸມກໍໄດ້ອອກຖະແຫຼງການປະທານຮ່ວມເວທີປຶກສາຫາລືສາກົນການຮ່ວມມືດ້ານການປົກຄອງດ້ວຍກົດໝາຍ“ໜຶ່ງແລວໜຶ່ງເສັ້ນທາງ”ເຊິ່ງຖືວ່າເປັນຜົນສຳເລັດສຳຄັນຂອງກອງປະຊຸມ.
ຖະແຫຼງການລະບຸວ່າ: ຈະຕ້ອງດຳເນີນການຮ່ວມມືດ້ານການປົກຄອງດ້ວຍກົດໝາຍບົນພື້ນຖານປຶກສາຫາລືກັນ, ກໍ່ສ້າງຮ່ວມກັນ ແລະຊົມໃຊ້ຮ່ວມກັນ, ສ້າງພື້ນຖານການປົກຄອງດ້ວຍກົດໝາຍໃຫ້ແກ່“ໜຶ່ງແລວໜຶ່ງເສັ້ນທາງ”; ຕ້ອງເຄົາລົບແລະປັບປຸງລະບົບກະຕິກາສາກົນທີ່ກ່ຽວຂ້ອງໃຫ້ສົມບູນ, ຊຸກຍູ້ການປະສານງານແລະການຮ່ວມມືດ້ານກົດໝາຍໃນຂົງເຂດຕ່າງໆ ເຊັ່ນ: ການຄ້າ, ການລົງທຶນ, ການເງິນ, ສ່ວຍສາອາກອນ, ຊັບສິນທາງປັນຍາ ແລະ ການອະນຸລັກສິ່ງແວດລ້ອມ ເພື່ອສ້າງກະຕິກາແລະຂອບລະບຽບການທີ່ໝັ້ນທ່ຽງ, ທ່ຽງທຳ, ໂປ່ງໃສ ແລະບໍ່ສ້າງການຈຳແນກ ໃຫ້ແກ່“ໜຶ່ງແລວໜຶ່ງເສັ້ນທາງ”; ຕ້ອງຕັ້ງໜ້າປ້ອງກັນແລະແກ້ໄຂຄວາມຂັດແຍ້ງທີ່ກ່ຽວຂ້ອງດ້ານການຄ້າ, ການລົງທຶນ ແລະອື່ນໆໃຫ້ເໝາະສົມ ລວມທັງການນຳໃຊ້ກົນໄກແກ້ໄຂຄວາມຂັດແຍ້ງທີ່ມີຢູ່ໃນປັດຈຸບັນ ແລະ ຄົ້ນຄວ້າສ້າງກົນໄກໃໝ່ ເພື່ອສ້າງສະພາບແວດລ້ອມທຸລະກິດທີ່ປົກຄອງດ້ວຍກົດໝາຍແລະມີຄວາມໝັ້ນທ່ຽງ, ຍຸຕິທຳ, ໂປ່ງໃສ ແລະ ສາມາດຄາດການໄດ້; ຕ້ອງລົງເລິກການແລກປ່ຽນດ້ານການປົກຄອງດ້ວຍກົດໝາຍໃນຂອບ“ໜຶ່ງແລວໜຶ່ງເສັ້ນທາງ”, ຊຸກຍູ້ການຮ່ວມມືໃນຂົງເຂດຕ່າງໆ ເຊັ່ນ: ລະບຽບກົດໝາຍ, ວັດທະນະທຳກົດໝາຍ, ກົດໝາຍສຶກສາ ແລະ ການບໍລິການດ້ານກົດໝາຍ, ເພີ່ມທະວີການສ້າງກົນໄກແລກປ່ຽນຂໍ້ມູນຂ່າວສານແລະການປະຕິບັດຕົວຈິງດ້ານກົດໝາຍ ພ້ອມທັງຊຸກຍູ້ການສ້າງຄວາມສາມາດແລະການອົບຮົມສ້າງບຸກຄະລາກອນດ້ານການປົກຄອງດ້ວຍກົດໝາຍ.