ທ່ານສີຈິ້ນຜິງໄດ້ພົບປະກັບທ່ານລຽນຈ້ານ ພ້ອມດ້ວຍຄະນະ
ຕອນເຊົ້າວັນທີ 13 ກໍລະກົດນີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ພົບປະກັບທ່ານລຽນຈ້ານ ອະດີດປະທານພັກກົກມິນຕັງຈີນ ພ້ອມດ້ວຍຄະນະບຸກຄົນວົງການຕ່າງໆໄຕ້ຫວັນຢູ່ຫໍສະພາປະຊາຊົນນະຄອນຫຼວງປັກກິ່ງ ແລະເນັ້ນວ່າ: ພວກເຮົາມີຄວາມໝັ້ນໃຈຢ່າງເຕັມປ່ຽມ ແລະຄວາມສາມາດຢ່າງພຽງພໍ, ກຳແໜ້ນທິດທາງທີ່ຖືກຕ້ອງ, ເດັດດ່ຽວຊຸກຍູ້ສາຍພົວພັນສອງຝັ່ງໃຫ້ພັດທະນາໂດຍສັນຕິ ແລະຊຸກຍູ້ຂະບວນການທ້ອນໂຮມປະເທດຊາດໃຫ້ເປັນເອກະພາບກັນ. ຫວັງວ່າພີ່ນ້ອງຮ່ວມຊາດສອງຝັ່ງພະຍາຍາມຮ່ວມກັນ, ຍຶດໝັ້ນ “ຄວາມເຫັນເປັນເອກະພາບກັນ 1992” ທີ່ສະແດງໃຫ້ເຫັນເຖິງຫຼັກການປະເທດຈີນດຽວ , ເດັດດ່ຽວຄັດຄ້ານ ແລະສະກັດກັ້ນອິດທິກຳລັງແບ່ງຍາກໄຕ້ຫວັນເປັນເອກະລາດ, ເປີດກວ້າງ ແລະລົງເລິກການຮ່ວມມື ແລະການແລກປ່ຽນດ້ານຂົງເຂດຕ່າງໆລະຫວ່າງສອງຝັ່ງ, ເພີ່ມທະວີຄວາມຮັກແພງ ແລະຄວາມສຸກຂອງພີ່ນ້ອງຮ່ວມຊາດ ແລະຮ່ວມກັນຂຽນໜ້າໃໝ່ໃນປັ້ມປະຫວັດສາດແຫ່ງການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນຄືນໃໝ່.
ທ່ານລຽນຈ້ານໄດ້ສະເໜີຄວາມເຫັນ 4 ຂໍ້ ຄື: ປະເທດຈີນດຽວ, ສັນຕິພາບຂອງສອງຝັ່ງ, ເຊື່ອມໂຍງເຂົ້າກັນແບບຕ່າງຝ່າຍຕ່າງມີຜົນປະໂຫຍດ, ຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນຄືນໃໝ່. ທ່ານກ່າວວ່າ: ປະຊາຊົນສອງຝັ່ງລ້ວນແຕ່ຂຶ້ນກັບປະຊາຊາດຈີນ, ຄວນຮ່ວມກັນປະກອບສ່ວນເຂົ້າໃນການສະແຫວງຫາສັນຕິພາບ ແລະຄວາມຈະເລີນຮຸ່ງເຮືອງຂອງສອງຝັ່ງ ເພື່ອສ້າງຊ່ອງແຄບທີ່ມີສັນຕິພາບ ແລະສອງຝັ່ງທີ່ມີຄວາມຈະເລີນຮຸ່ງເຮືອງຮ່ວມກັນ.