ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 16 ກໍລະກົດນີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວຕອບໂຕ້ອາເມຣິກາທີ່ອອກຖະແຫຼງການວ່າດ້ວຍການກວດກາຕາມມາດຕາ 301 ໂດຍມີເນື້ອໃນຕຳໜິຈີນເຮັດການຄ້າບໍ່ຍຸຕິທຳໃນໄລຍະຜ່ານມານີ້. ທ່ານນາງຮວ້າຊຸ່ນຢິງຊີ້ໃຫ້ເຫັນວ່າ: ຄຳຕຳໜິທີ່ກ່ຽວຂ້ອງກັບການຄ້າຂອງອາເມລິກາເປັນການບິດເບື້ອນຄວາມຈິງທັງໝົດ ແລະບໍ່ມີຫຼັກອ້າງອີງແຕ່ຢ່າງໃດ. ໃນເວລາຕອບຄຳຖາມຂອງນັກຂ່າວກ່ຽວກັບຖ້ອຍຄຳຂອງອາເມລິກາທີ່ວ່າ ຈີນໄດ້ປຽບແຕ່ອາເມຣິກາເສຍປຽບນັ້ນ, ທ່ານນາງຮວ້າຊຸນຢິງໄດ້ຕັ້ງຄຳຖາມຄືນອາເມຣິກາ 3 ຂໍ້ຄື ໜຶ່ງ, ໃຜໆກໍຮູ້ແລ້ວວ່າ, ອາເມຣິກາເປັນປະເທດສຳຄັນໃນການສ້າງກົດລະບຽບການຄ້າໂລກ, ເງິນໂດລາສະຫະລັດເປັນເງິນຕາຊຳລະສະສາງຕົ້ນຕໍໃນການຄ້າສາກົນ, ສ່ວນຈີນເປັນຜູ້ມາລຸນຫຼັງໃນການຄ້າສາກົນແລະເປັນຜູ້ຮັບເອົາກົດລະບຽບອົງການການຄ້າໂລກ. ມີໃຜເຊື່ອບໍ່ວ່າ ຜູ້ທີ່ສ້າງກົດລະບຽບຂຶ້ນມານັ້ນໄດ້ສ້າງກົດລະບຽບ ເພື່ອຫາຜົນປະໂຫຍດໃຫ້ຜູ້ອື່ນແຕ່ບໍ່ສ້າງຜົນປະໂຫຍດໃຫ້ຕົນເອງ? ສອງ,ໃນຕະຫຼອດໄລຍະ 40 ປີຜ່ານມາ, ມູນຄ່າການຄ້າລະຫວ່າງຈີນ-ອາເມຣິກາໄດ້ເພີ່ມຂຶ້ນຫຼາຍກວ່າ 230 ເທົ່າ, ຄັນຊັ້ນ, ອາເມຣິກາໄດ້ເຮັດການຄ້າກັບຈີນແບບເສຍປຽບໃນຕະຫຼອດໄລຍະ 40 ປີມານີ້ຊັ້ນຫວາ? ສາມ, ທຸກມື້ນີ້, ຈີນໄດ້ກາຍເປັນຄູ່ການຄ້າໃຫຍ່ທີ່ສຸດຂອງ 120 ກວ່າປະເທດແລະເຂດແຄວ້ນໃນໂລກ, ເປັນຕະຫຼາດສົ່ງອອກສຳຄັນທີ່ຂະຫຍາຍຕົວໄວທີ່ສຸດໃນໂລກ, ປີ2017ຜ່ານມາ, ຈີນໄດ້ດຶງດູດທຶນຕ່າງປະເທດຫຼາຍເປັນອັນດັບສອງຂອງໂລກ. ຄັນຊັ້ນມີປະເທດຈຳນວນຫຼາຍປານນີ້ຕ່າງກໍກຳລັງແລະສືບຕໍ່ເຮັດການຄ້າກັບຈີນແບບເສຍປຽບຊັ້ນຫວາ?
ທ່ານນາງຮວ້າຊຸ່ນຢິງຊີ້ໃຫ້ເຫັນວ່າ: ການຄ້າບໍ່ກ້ຳເກິ່ງກັນບໍ່ໄດ້ໝາຍເຖິງຄວາມບໍ່ຍຸຕິທຳ. ຖ້າຢາກມີຄວາມຍຸຕິທຳກໍຕ້ອງໃຫ້ທຸກຝ່າຍປຶກສາຫາລືຢ່າງສະເໝີພາບກັນເພື່ອສ້າງກົດລະບຽບສາກົນ, ຫາກບໍ່ແມ່ນຕັດສິນດ້ວຍຕົນເອງໂດຍບໍ່ຫົວຊາຕໍ່ຄວາມເຫັນຂອງຜູ້ອື່ນ ແລ້ວສ້າງມາດຕະຖານອີງຕາມຜົນປະໂຫຍດຕົນເອງ ຍິ່ງໄປກວ່ານັ້ນກໍຄືນຳເອົາການທຳລາຍຄວາມຍຸຕິທຳແລະຜົນປະໂຫຍດຂອງປະເທດອື່ນເປັນຄ່າຕອບແທນເພື່ອແລກເອົາຜົນປະໂຫຍດໃຫ້ແກ່ຕົນເອງຫຼາຍທີ່ສຸດ.