ທີມແພດຂອງກອງທັບປົດປ່ອຍປະຊາຊົນຈີນເດີນທາງສູ່ອັດຕະປືເພື່ອຊ່ວຍກູ້ໄພຢ່າງຂຸ້ນຂ້ຽວ

ສຳລັບອຸປະຕິເຫດການພັງທະລາຍຂອງເຂື່ອນໄຟຟ້າທີ່ແຂວງອັດຕະປື,ໂຄສົກຂອງກະຊວງການຕ່າງປະເທດ ສປ ຈີນ ທ່ານເກິງສວງ ໄດ້ຖະແຫລງໃນວັນທີ 25 ວ່າ,ຝ່າຍຈີນຍິນດີທີ່ຈະອຳນວຍການສະໜັບສະໜູນແລະໃຫ້ຄວາມຊ່ວຍເຫຼືອຢ່າງຫ້າວຫັນໃຫ້ແກ່ວຽກງານການກູ້ໄພຂອງຝ່າຍລາວ,ຝ່າຍຈີນກຳລັງຕິດຕໍ່ສື່ສານກັບຝ່າຍລາວຢ່າງໃກ້ຊິດ.

ເຂື່ອນໄຟຟ້າເຊປຽນ -ເຊນ້ຳນ້ອຍ ທີ່ພາກໃຕ້ຂອງປະເທດລາວແຂວງອັດຕະປືໄດ້ເກີດການພັງທະລາຍໃນຕອນແລງຂອງວັນທີ 23,ພາໃຫ້ມີຫຼາຍຄົນເສຍຊີວິດແລະຍັງມີຄົນສູນຫາຍເປັນຈຳນວນຫຼວງຫຼາຍ.ໃນວັນທີ 25,ທີມແພດຂອງກອງທັບປົດປ່ອຍປະຊາຊົນຈີນທີ່ກຳລັງປະຕິບັດພາລະກິດການຊ້ອມ ກູ້ໄພການແພດດ້ານມະນຸດສະທຳ“ຂະບວນລົດສັນຕິພາບ-2018”ທີ່ນະຄອນຫຼວງວຽງຈັນປະເທດລາວ,ໄດ້ແຕ່ງຕັ້ງໃຫ້ຫນ່ວຍຍ່ອຍການປ້ອງກັນໂລກລະບາດທີ່ປະກອບດ້ວຍແພດ32ຄົນ ເດີນທາງສູ່ເຂດໄພພິບັດຢ່າງທັນທີ, ເປັນຫນ່ວຍກູ້ໄພສາກົນຫນ່ວຍທຳອິດທີ່ຮອດເຂດໄພພິບັດຢ່າງໄວທີ່ສຸດ.

ໂດຍໄດ້ຮັບຮູ້ວ່າ,ທີມແພດຈີນດັ່ງກ່າວຈະປະຕິບັດໜ້າທີ່ກູ້ໄພຮ່ວມກັນກັບຫນ່ວຍແພດຍ່ອຍຂອງປະເທດລາວ.ຕາມເວລາທ້ອງຖິ່ນ,ໃນເວລາ 18 ໂມງ 20 ນາທີຂອງວັນທີ 25（ເວລາປັກກິ່ງແມ່ນ 19 ໂມງ 20 ນາທີຂອງວັນທີ 25）,ຫນ່ວຍຍ່ອຍການປ້ອງກັນໂລກທີ່ໄດ້ຖືກແຕ່ງຕັ້ງ 26 ຄົນເດີນທາງຮອດແຂວງອັດຕະປືແລ້ວ,ເຊິ່ງໄດ້ຕິດຕໍ່ກັບຝ່າຍລາວເພື່ອຮັບຊາບສະພາບຄວາມເສຍຫາຍແລະສະພາບການກູ້ໄພ. ສ່ວນສະມາຊິກອີກ 6 ຄົນໃນທີມແມ່ນຈະນຳເອົາລົດພະຍາບານແລະພາຫະນະທີ່ໃຊ້ໃນການປ້ອງກັນໂລກ ໄປແຕ່ວຽງຈັນຮອດເຂດໄພພິບັດ. ແຕ່ເນື່ອງຈາກສະພາບເສັ້ນທາງແລະອາກາດທີ່ບໍ່ເປັນໃຈ, ຫນ່ວຍຍ່ອຍປ້ອງກັນໂລກລະບາດຈະນັ່ງຍົນເຮລິຄອບເຕີໄປຮອດສູນໃນວັນທີ 26.

ນ້ຳໃຈຂອງປະເທດຈີນໄດ້ເຕົ້າໂຮມຢູ່ເຂດໄພພິບັດ

“ຫຼັງຈາກອຸປະຕິເຫດການພັງທະລາຍຂອງເຂື່ອນເກີດຂຶ້ນ,ສະຖານທູດປະເທດຈີນປະຈຳປະເທດລາວໄດ້ສັ່ງໃຫ້ວິສາຫະກິດປະເທດຈີນໃນເຂດທ້ອງຖິ່ນດຳເນີນການກວດກາຄວາມປອດໄພຢ່າງທັນທີ,ແລະອຳນວຍການຊ່ວຍເຫຼືອຢ່າງສຸດຄວາມສາມາດຂອງຕົນໃຫ້ແກ່ເຂດໄພພິບັັດ.”

ໃນຖານະທີ່ເປັນວິສາຫະກິດຈີນທີ່ໃຫຍ່ທີ່ສຸດໃນປະເທດລາວ,ບໍລິສັດກໍ່ສ້າງພະລັງງານໄຟຟ້າແຫ່ງປະເທດຈີນໄດ້ແຕ່ງຕັ້ງພະນັກງານຂອງໂຄງການທີ່ຢູ່ໃກ້ກັບສະຖານທີ່ເກີດເຫດທີ່ສຸດໃຫ້ຂົນສົ່ງເຄື່ອງອຸປະກອນການຊ່ວຍເຫຼືອໄປສູ່ເຂດໄພພິບັດຢ່າງວ່ອງໄວ.

ວິສາຫະກິດແລະອົງການຈັດຕັ້ງປະເທດຈີນທີ່ຢູ່ລາວກໍໄດ້ບໍລິຈາກເຄື່ອງກູ້ໄພແລະກຳລັງແຮງຂອງຕົນຢ່າງຫ້າວຫັນເພື່ອປະກອບສ່ວນເຂົ້າໃນການກູ້ໄພຄັ້ງນີ້.