ເລີ່ມຕົ້ນສັບປະດາແລກປ່ຽນການສຶກສາຈີນ-ອາຊຽນຄັ້ງທີ 11
ພິທີເປີດສັບປະດາແລກປ່ຽນການສຶກສາຈີນ-ອາຊຽນຄັ້ງທີ 11 ໄດ້ຈັດຂຶ້ນຢູ່ເຂດພັດທະນາໃໝ່ກຸ້ຍອ່ານ ແຂວງກຸ້ຍໂຈ່ວ ສປ ຈີນ ໃນວັນທີ 26 ກໍລະກົດນີ້ ໂດຍມີຜູ້ຊ່ຽວຊານ, ນັກວິຊາການ, ນັກສຶກສາປະເທດອາຊຽນທີ່ສຶກສາຕໍ່ຢູ່ຈີນ ແລະ ແຂກຮັບເຊີນຈາກຈີນ, ລາວ, ໄທ, ມຽນມາ ແລະ ສິງກະໂປເປັນຕົ້ນທັງໝົດ 1.000 ກວ່າຄົນເຂົ້າຮ່ວມ.
ສັບປາດາແລກປ່ຽນຄັ້ງນີ້ມີຂົວຂໍ້ວ່າ “ຈຸດເລີ່ມຕົ້ນໃໝ່ຂອງການຮ່ວມມືດ້ານການສຶກສາ, ອະນາຄົດແຫ່ງການແລກປ່ຽນດ້ານວັດທະນະທຳ”, ໃນພິທີດັ່ງກ່າວໄດ້ເປີດນຳໃຊ້ບິກດາຕາການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ໂດຍຖືກຂະໜານນາມວ່າເປັນ “ເສັ້ນທາງສາຍໄໝເທິງບິກດາຕາ” ທັງເປີດປ້າຍສ້າງຕັ້ງສະຖາບັນວັດທະນະທຳອາຊຽນ ມະຫາວິທະຍາໄລຊົນເຜົ່າກຸ້ຍໂຈ່ວ ແລະ ສະຫະພັນການສຶກສາການຄ້າເອເລັກໂຕຣນິກຂ້າມຊາດອາລີບາບາ.
ຂ່າວລາຍງານຕື່ມວ່າ: ສັບປະດາແລກປ່ຽນການສຶກສາຈີນ-ອາຊຽນໄດ້ເລີ່ມສ້າງຕັ້ງຂຶ້ນເມື່ອປີ 2008 ໂດຍໄດ້ສ້າງເວທີອັນກວ້າງໃຫຍ່ໃຫ້ແກ່ການແລກປ່ຽນດ້ານການສຶກສາແລະວັດທະນະທຳລະຫວ່າງຈີນ-ອາຊຽນ ແລະ ຊຸກຍູ້ການແລກປ່ຽນດ້ານບຸກຄະນລາກອນແລະການຊົມໃຊ້ຊັບພະຍາກອນມະນຸດຮ່ວມກັນລະຫວ່າງຈີນແລະອາຊຽນ.