ທ່ານສີຈິ້ນຜິງຢ້ຽມຢາມນາຍົກລັດຖະມົນຕີໂມຣີຕຸດສ໌
ວັນທີ 28 ກໍລະກົດນີ້, ທ່ານສີຈິ້ນຜິງ ປະທານປະເທດຈີນໄດ້ຢ້ຽມຢາມໂມຣີຕຸດສ໌ ແລະພົບປະກັບທ່ານພຣະວິນດ໌ ຈາກນາດ ນາຍົກລັດຖະມົນຕີໂມຣີຕຸດສ໌.
ທ່ານສີຈິ້ນຜິງໄດ້ຕີລາຄາສູງຕໍ່ໝາກຜົນທີ່ບໍ່ທຳມະດາທີ່ໂມຣີຕຸດສ໌ໄດ້ຮັບນັບແຕ່ການເປັນເອກະລາດ 50 ປີຜ່ານມາ ແລະຍ້ອງຍໍຊົມເຊີຍລັດຖະບານໂມຣີຕຸດສ໌ທີ່ຍຶດໝັ້ນປະຕິບັດນະໂຍບາຍທີ່ມີມິດຕະພາບຕໍ່ຈີນຢ່າງສະເໝີຕົ້ນສະເໝີປາຍ. ທ່ານຊີ້ໃຫ້ເຫັນວ່ານັບແຕ່ການສ້າງສາຍສຳພັນການທູດ 46 ປີຜ່ານມາ, ສອງຝ່າຍຈີນ-ໂມຣີຕຸດສ໌ໄດ້ລົງເລິກຄວາມໄວ້ເນື້ອເຊື່ອໃຈກັນທາງການເມືອງຢ່າງບໍ່ຢຸດຢັ້ງ, ການຮ່ວມມືດ້ານຂົງເຂດຕ່າງໆກໍໄດ້ຮັບໝາກຜົນຢ່າງຫຼວງຫຼາຍ. ຈີນຍິນດີເປັນເພື່ອນມິດທີ່ດີ ແລະຄູ່ຮ່ວມທີ່ດີກັບໂມຣີຕຸດສ໌ຢ່າງສະເໝີຕົ້ນສະເໝີປາຍ, ຊຸກຍູ້ສາຍພົວພັນມິດຕະພາບ ແລະການຮ່ວມມືລະຫວ່າງສອງປະເທດໃຫ້ກ້າວເຂົ້າສູ່ລະດັບໃໝ່ຢ່າງບໍ່ຢຸດຢັ້ງ. ທ່ານສີຈິ້ນຜິງກ່າວຕື່ມວ່າ: ຈີນ ແລະອາຟຣິກາເປັນປະຊາຄົມຮ່ວມຊາຕາກຳ ແລະເປັນຄູ່ຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ບໍ່ວ່າສະຖານະການສາກົນຈະມີການປ່ຽນແປງແນວໃດ, ຫຼືວ່າຈີນຈະພັດທະນາຮອດລະດັບໃດກໍຕາມ, ຈີນຈະຢູ່ກໍຮ່ວມກັບບັນດາປະເທດທີ່ກຳລັງພັດທະນາ ຄື ບັນດາປະເທດອາຟຣິກາ ແລະອື່ນໆ ແລະເປັນເພື່ອນມິດຢ່າງຈິງໃຈ ແລະຄູ່ຮ່ວມທີ່ໄວ້ໃຈໄດ້ຂອງອາຟຣິກາຈົນເທົ່າໃດໆ.
ທ່ານຈາກນາດໄດ້ສະແດງຄວາມຍິນດີຕ້ອນຮັບອີກເທື່ອໜຶ່ງຕໍ່ທ່ານສີຈິ້ນຜິງ ປະທານປະເທດຈີນມາຢ້ຽມຢາມສັນທະວະໄມຕີໂມຣີຕຸດສ໌ ເຊິ່ງເປັນການຢ້ຽມຢາມຄັ້ງປະຫວັດສາດ ແລະກ່າວວ່າ: ປະເທດຕົນຂອບອົກຂອບໃຈການສະໜັບສະໜູນ ແລະການຊ່ວຍເຫຼືອຢ່າງແຂງແຮງຂອງຈີນໃນໄລຍະດົນນານມານີ້, ເອົາໃຈໃສ່ຢ່າງສູງຕໍ່ການພັດທະນາຂອງຈີນ ທີ່ໄດ້ກ້າວເຂົ້າສູ່ຍຸກສະໄໝໃໝ່, ເຄົາລົບນັບຖືໝາກຜົນຍິ່ງໃຫຍ່ຂອງຈີນ ແລະຕີລາຄາສູງຕໍ່ຄວາມຄຶດເຫັນການສ້າງປະຊາຄົມຮ່ວມຊາຕາກຳຂອງມວນມະນຸດທີ່ສະເໜີໂດຍທ່ານສີຈິ້ນຜິງ ປະທານປະເທດຈີນ. ໂມຣີຕຸດສ໌ຈະສືບຕໍ່ເດັດດ່ຽວປະຕິບັດຕາມນະໂຍບາຍປະເທດຈີນດຽວ, ຍິນດີຕ້ອນຮັບຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະຍິນດີລົງເລິກການຮ່ວມມືກັບຈີນໃຫ້ຕ່າງຝ່າຍຕ່າງມີຜົນປະໂຫຍດ.