ໂດຍແນໃສ່ຖ້ອຍຄວາມຝ່າຍດຽວຂອງອາເມຣິກາທີ່ວ່າ ຈີນໄດ້ຄວບຄຸມອັດຕາແລກປ່ຽນເງິນຢວນຈີນ, ທ່ານມໍຣີສ ອັບສະເຟວ ຫົວໜ້ານັກເສດຖະສາດອົງການກອງທຶນເງິນຕາສາກົນ ຫຼື IMF ໄດ້ໃຫ້ສຳພາດຕໍ່ສື່ມວນຊົນອາເມຣິກາໃນຫວ່າງມໍ່ໆມານີ້ວ່າ: “ພວກເຮົາບໍ່ມີຫຼັກຖານໃດໆທີ່ສາມາດຢືນຢັນໄດ້ວ່າ ຈີນໄດ້ຄວບຄຸມອັດຕາແລກປ່ຽນເງິນຕາ.”
ໂດຍອີງຕາມການໃຫ້ນິຍາມຂອງ IMF, “ການຄວບຄຸມອັດຕາແລກປ່ຽນ” ເປັນການກະທຳຂອງປະເທດໜຶ່ງ ທີ່ຄວບຄຸມອັດຕາແລກປ່ຽນຂອງເງິນຕາປະເທດຕົນຢ່າງຫຼວງຫຼາຍ, ເປັນໄລຍະຍາວນານ ແລະ ແຕ່ຝ່າຍດຽວ ເພື່ອສ້າງຜົນປະໂຫຍດໃຫ້ແກ່ການຄ້າຂອງປະເທດຕົນ ແລະ ສະແຫວງຫາຜົນປະໂຫຍດທີ່ບໍ່ຊອບທຳໃນການຄ້າ.
ນັກວິເຄາະເຫັນວ່າ, ຈີນບໍ່ມີສິ່ງຈູງໃຈ ແລະ ຈຳເປັນ ທີ່ນຳໃຊ້ການຄວບຄຸມອັດຕາແລກປ່ຽນ ເພື່ອກະຕຸ້ນການສົ່ງອອກຂອງຕົນ ເຊິ່ງມີມູນເຫດຕົ້ນຕໍທັງ 3 ດ້ານຕໍ່ໄປນີ້:
1, ການບໍລິໂພກພາຍໃນປະເທດຈີນໄດ້ກາຍເປັນກຳລັງຊຸກຍູ້ຕົ້ນຕໍສຳລັບການເຕີບໂຕຂອງເສດຖະກິດຈີນ. 2, ການເປີດກວ້າງການເປີດປະຕູສູ່ພາຍນອກຈະເປັນສິ່ງຄ້ຳປະກັນທີ່ໝັ້ນແກ່ນສຳລັບຊັບສິນທີ່ເປັນເງິນຢວນຈີນ. 3, ຈີນເຮັດໃຫ້ອັດຕາແລກປ່ຽນເງິນຢວນຕົກຕ່ຳລົງຈະພາໃຫ້ເກີດຜົນເສຍຫຼາຍກວ່າຜົນໄດ້.
ຄັນຊັ້ນ, ຄວນພິຈາລະນາຈັງຫວະລອຍຕົວຂອງອັດຕາແລກປ່ຽນເງິນຢວນໃນໄລຍະມໍ່ໆມານີ້ແນວໃດ?
ກ່ອນອື່ນ, ມີສ່ວນກ່ຽວຂ້ອງກັບປັດໄຈບໍ່ແນ່ນອນໃນຂອບເຂດທົ່ວໂລກສູງຂຶ້ນ. ລັດທິປົກປ້ອງການຄ້າຂອງລັດຖະບານທຣຳໄດ້ເຮັດໃຫ້ເກີດປັດໄຈບໍ່ແນ່ນອນໃນຂອບເຂດທົ່ວໂລກສູງຂຶ້ນ ແລະ ກະທົບກະເທືອນເຖິງຕະຫຼາດແລກປ່ຽນເງິນຕາທົ່ວໂລກ. ອັດຕາແລກປ່ຽນເງິນຢວນຈີນໄດ້ເໜັງຕິງຂຶ້ນລົງໃນໄລຍະມໍ່ໆມານີ້ ກໍໄດ້ສະທ້ອນເຖິງປັດໄຈບໍ່ແນ່ນອນໃນຕະຫຼາດແລກປ່ຽນເງິນຕາ.
ສອງ, ມີສ່ວນກ່ຽວຂ້ອງກັບດັດສະນີໂດລາສະຫະລັດອາເມຣິກາຖີບຕົວສູງຂຶ້ນ.
ສາມ, ມີສ່ວນກ່ຽວຂ້ອງກັບທະນາຄານກາງຂອງອາເມຣິກາ ຫຼື Fed ຂຶ້ນອັດຕາດອກເບ້ຍສະຫະລັດອາເມລິກາ.
ຄືກັນກັບຄວາມເວົ້າຂອງນັກວິເຄາະເຫຼົ່ານີ້, ອັດຕາລອຍຕົວຂອງອັດຕາແລກປ່ຽນເງິນຢວນຈີນໃນໄລຍະມໍ່ໆມານີ້ບໍ່ໄດ້ລື່ນກາຍຂອບເຂດອັນສົມເຫດສົມຜົນ, ເງິນຢວນຈີນຍັງເປັນເງິນຕາປະເພດແຂງໃນໝູ່ເງິນຕາທົ່ວໂລກ. ອັດຕາແລກປ່ຽນສູງຂຶ້ນ ຫຼື ຕ່ຳລົງຂຶ້ນກັບຕະຫຼາດ. ພາຍໃຕ້ສະພາບການທີ່ເສດຖະກິດຈີນກ້າວເດີນເປັນຢ່າງດີ, ການສະໜອງແລະຄວາມຕ້ອງການດ້ານເງິນຕາຕ່າງປະເທດຂອງຈີນດຸນດ່ຽງກັນ, ຈີນຈະບໍ່ມີຄວາມຈຳເປັນໃນການຄວບຄຸມອັດຕາແລກປ່ຽນເງິນຢວນ.