ວັນທີ 2 ສິງຫານີ້, ທ່ານ ວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດຈີນ-ອາຊຽນຢູ່ສິງກະໂປ.
ທ່ານ ວາງຢີ້ ກ່າວວ່າ: ເມື່ອກີ້ນີ້, ລັດຖະມົນຕີກະຊວງການຕ່າງປະເທດສິງກະໂປໄດ້ປະກາດວ່າຈີນແລະປະເທດອາຊຽນໄດ້ບັນລຸຄວາມເປັນເອກະພາບກ່ຽວກັບຮ່າງເນື້ອໃນປຶກສາຫາລືສະບັບໜຶ່ງຂອງ “ກົດແຫ່ງການປະພຶດຂອງທະເລຈີນໃຕ້”ຫຼືCOC. ນີ້ແມ່ນຄວາມຄືບໜ້າທີ່ສຳຄັນແລະໃຫຍ່ຫຼວງທີ່ສຸດອີກອັນໜຶ່ງທີ່ໄດ້ຮັບຜົນສຳເລັດໃນການປຶກສາຫາລືກົດດັ່ງກ່າວ. ຄວາມຈິງໄດ້ຢັ້ງຢືນວ່າ, ຈີນແລະປະເທດອາຊຽນມີຄວາມສາມາດປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້,ມີຄວາມສາມາດບັນລຸຫຼັກການພາກພືນທີ່ປະຕິບັດຮ່ວມກັນໄດ້ໂດຍຜ່ານການປຶກສາຫາລື.
ທ່ານ ວາງຢີ້ ກ່າວຕື່ມວ່າ, ໃນຫຼາຍມື້ກ່ອນ, ຈີນໄດ້ສົ່ງກຳປັ່ນຊ່ວຍເຫຼືອທາງທະເລທີ່ກ້າວໜ້າທີ່ສຸດຂອງຈີນ,ພ້ອມທັງໄດ້ຈັດສັນໜ່ວຍຄົ້ນຫາແລະຊ່ວຍເຫຼືອວິຊາການນຳອີກເດີນທາງໄປປະຈຳການຢູ່ນານຊ່າ,ເພື່ອຈະສາມາດໃຫ້ການບໍລິການດ້ານການຊ່ວຍເຫຼືອທາງທະເລແກ່ເຮືອຂອງບັນດາປະເທດທີ່ມີຄວາມຕ້ອງການໄດ້ໃນເວລາທັນການ. ໃນຕໍ່ໜ້າ,ຈີນຍັງຈະໃຫ້ການບໍລິການສາທາລະນະປະໂຫຍດສາກົນແກ່ປະເທດໃນພາກພື້ນຕາມລຳດັບເຊັ່ນ:ການຄົ້ນຄວ້າວິທະຍາສາດແລະອຸຕຸນິຍົມເປັນຕົ້ນ.