ຕໍ່ກໍລະນີທີ່ເຈົ້າໜ້າທີ່ອາເມລິກາຕຳໜິຈີນສ້າງເຂື່ອນໄຟຟ້າຢູ່ຍ່ານເໜືອແມ່ນ້ຳຂອງເປັນການສ້າງຜົນກະທົບຕໍ່ປະເທດອື່ນ, ທ່ານ ເກີງສວງ ໂຄສົກກະຊວງການຕ່າງປະເທດຈີນໄດ້ຕອບໂຕ້ຢູ່ນະຄອນຫຼວງປັກກິ່ງໂດຍກ່າວວ່າ, ຄຳເວົ້າທີ່ກ່ຽວຂ້ອງຂອງຝ່າຍອາເມຣິກາບໍ່ມີຫຼັກຖານອ້າງອີງແຕ່ຢ່າງໃດ,ຫາກມີຈຸດປະສົງທີ່ແອບແຝງຕ່າງຫາກ.
ທ່ານ ເກີງສວງ ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດັ່ງກ່າວວ່າ: ໃນຖານະເປັນປະເທດຢູ່ຍ່ານເໜືອແມ່ນ້ຳຂອງ,ຈີນໃຫ້ຄວາມສຳຄັນສູງຕໍ່ຄວາມຕ້ອງການແລະຄວາມສົນໃຈຂອງບັນດາປະເທດຢູ່ຍ່ານໃຕ້ມາໂດຍຕະຫຼອດ ແລະຮັກສາການພົວພັນຢ່າງໃກ້ຊິດກັບປະເທດຍ່ານໃຕ້ມາໂດຍຕະຫຼອດ,ໄດ້ສຸມໃສ່ຮ່ວມມືດ້ານຊັບພະຍາກອນນ້ຳກັບປະເທດທີ່ກ່ຽວຂ້ອງໂດຍຊົມໃຊ້ຂໍ້ມູນອຸທົກກະສາດຮ່ວມກັນ,ການຕ້ານໄພນ້ຳຖ້ວມແລະໄພແຫ້ງແລ້ງແລະອື່ນໆມາໂດຍຕະຫຼອດ. ຈີນໄດ້ສະໜອງຕົວເລກອຸທົກກະສາດຍາມນ້ຳຂຶ້ນຂອງແມ່ນ້ຳລ້ານຊ້າງໃຫ້ແກ່ປະເທດທີ່ກ່ຽວຂ້ອງເປັນ 15 ປີລຽນຕິດ,ໄດ້ເສີມຂະຫຍາຍບົດບາດຢ່າງຈະແຈ້ງໃນການພັດທະນາເຂື່ອນໄຟຟ້ານ້ຳຕົກແບບນາຂັ້ນໄດຢູ່ຕາມແມ່ນ້ຳລ້ານຊ້າງເພື່ອປັບລະດັບນ້ຳຍາມນ້ຳຂຶ້ນແລະປ່ອຍນ້ຳຍາມນ້ຳບົກ,ໄດ້ເສີມຂະຫຍາຍບົດບາດທີ່ສຳຄັນໃນການຊ່ວຍຕ້ານໄພນ້ຳຖ້ວມແລະໄພແຫ້ງແລ້ງຂອງປະເທດຍ່ານໃຕ້. ຈີນຍິນດີໃຫ້ປະເທດຢູ່ນອກພາກພື້ນເຂົ້າຮ່ວມການຮ່ວມມືການພັດທະນາໃນອະນຸພາກພື້ນ ແລະຫວັງວ່າເຂົາເຈົ້າສາມາດເສີມຂະຫຍາຍບົດບາດຢ່າງສ້າງສັນໃນການຊຸກຍູ້ການພັດທະນາຂອງປະເທດອະນຸພາກພື້ນ,ຫາກບໍ່ແມ່ນສ້າງຄວາມຂັດແຍ້ງກັນແລະວາງອຸປະສັກ.