ທ່ານລູ້ຄາງ ໂຄສົກກະຊວງການຕ່າງປະເທດຈີນຢືນຢັນໃນວັນທີ 14 ສິງຫານີ້ວ່າ, ຈີນສະແດງຄວາມບໍ່ພໍໃຈຢ່າງແຮງຕໍ່ອາເມຣິກາເຈດຕະນາຮັບຮອງແລະລົງນາມໃນ “ກົດໝາຍວ່າດ້ວຍການມອບສິດປ້ອງກັນປະເທດສົກງົບປະມານປີ 2019” ໂດຍບໍ່ຫົວຊາຕໍ່ການຄັດຄ້ານຢ່າງເດັດດ່ຽວຂອງຈີນ, ຈີນເຕືອນໃຫ້ອາເມຣິກາຈົ່ງປະຖິ້ມແນວຄິດສົງຄາມເຢັນແລະແນວຄິດຝ່າຍໄດ້ຝ່າຍເສຍໃນການແຂ່ງຂັນ, ບໍ່ຄວນປະຕິບັດມາດຕາທີ່ພົວພັນເຖິງປະເທດຈີນໃນທາງລົບ.
ທ່ານລູ້ຄ່າງ ກ່າວຕື່ມວ່າ, ຈີນເຕືອນໃຫ້ອາເມຣິກາຈົ່ງປະຕິບັດຕໍ່ຈີນແລະສາຍພົວພັນລະຫວ່າງຈີນ-ອາເມຣິກາຢ່າງຖືກຕ້ອງແລະບໍ່ອະຄະຕິ, ປະຕິບັດຕາມຫຼັກການປະເທດຈີນດຽວແລະຖະແຫຼງການຮ່ວມສາມສະບັບລະຫວ່າງຈີນແລະອາເມຣິກາຢ່າງຈິງຈັງ, ບໍ່ຄວນປະຕິບັດ ມາດຕາທີ່ພົວພັນເຖິງປະເທດຈີນໃນທາງລົບ, ເພື່ອຫຼີກເວັ້ນບໍ່ໃຫ້ສ້າງຄວາມເສຍຫາຍຕໍ່ການພົວພັນລະຫວ່າງສອງປະເທດແລະການຮ່ວມມືໃນຂົງເຂດສຳຄັນລະຫວ່າງສອງຝ່າຍ.