ໂດຍແນໃສ່ເລື່ອງທີ່ທ່ານຊິນໂຊະ ອາເບ ນາຍົກລັດຖະມົນຕີຍີ່ປຸ່ນໄດ້ສົ່ງເຄື່ອງເຊັນໄຫວ້ເພື່ອບູຊາຫໍໄຫວ້ຢາຊູຄູນີ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວໃນວັນທີ 15 ສິງຫານີ້ວ່າ, ຈີນເຕືອນໃຫ້ຍີ່ປຸ່ນກົງຜະເຊີນແລະສຳຫຼວດຄືນປະຫວັດສາດການຮຸກຮານຢ່າງຖືກຕ້ອງແລະເລິກເຊິ່ງ, ເພື່ອສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີກໍຄືປະຊາຄົມໂລກດ້ວຍການກະທຳທີ່ເປັນຮູບປະທຳ.
ທ່ານລູ້ຄ່າງກ່າວວ່າ, ຈີນໄດ້ເອົາໃຈໃສ່ແລ້ວວ່າ ປັດຈຸບັນບໍ່ມີສະມາຊິກລັດຖະບານຍີ່ປຸ່ນໄປໄຫວ້ຫໍໄຫວ້ຢາຊູຄູນີ, ແຕ່ທ່ານຊິນໂຊະ ອາເບ ນາຍົກລັດຖະມົນຕີຍີ່ປຸ່ນໄດ້ສົ່ງເຄື່ອງເຊັນໄຫວ້ເພື່ອບູຊາຫໍໄຫວ້ຢາຊູຄູນີ ແລະມີສະມາຊິກສະພາແຫ່ງຊາດຈຳນວນໜຶ່ງໄປໄຫວ້ເຊັ່ນກັນ.
ທ່ານລູ້ຄ່າງກ່າວຕື່ມວ່າ: ຢູ່ຫໍໄຫວ້ຢາຊູຄູນີໄດ້ບູຊາປ້າຍອາຊະຍະກອນສົງຄາມຊັ້ນໜຶ່ງ.ທີ່ມີໜ້າທີ່ຮັບຜິດຊອບໂດຍກົງຕໍ່ສົງຄາມຮຸກຮານ, ພວກຂ້າພະເຈົ້າຄັດຄ້ານການກະທຳອັນຜິດພາດຂອງຍີ່ປຸ່ນຢ່າງເດັດດ່ຽວ. ຈີນເຕືອນໃຫ້ຍີ່ປຸ່ນຜະເຊີນແລະສຳຫຼວດຄືນປະຫວັດການຮຸກຮານຢ່າງຖືກຕ້ອງແລະເລິກເຊິ່ງ, ເພື່ອສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີກໍຄືປະຊາຄົມໂລກດ້ວຍການກະທຳທີ່ເປັນຮູບປະທຳ.