ວັນທີ 29 ສິງຫານີ້, ທ່ານ ວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ທິກິໂອະ ອາກິບະ ຮອງລັດຖະມົນຕີກະຊວງການຕ່າງປະເທດຍີ່ປຸ່ນທີ່ມາຢ້ຽມຢາມຈີນຢູ່ທຳນຽບຈົ່ງນານໄຫທີ່ນະຄອນຫຼວງປັກກິ່ງ.
ທ່ານ ວາງຢີ້ ກ່າວວ່າ: ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ຢ້ຽມຢາມຍີ່ປຸ່ນຢ່າງສຳເລັດຜົນໃນເດືອນພຶດສະພາປີນີ້,ການພົວພັນລະຫວ່າງສອງປະເທດໄດ້ກັບເຂົ້າສູ່ສະພາບປົກກະຕິຄືນໃໝ່. ການພົວພັນລະຫວ່າງສອງປະເທດໄດ້ຜ່ານຜ່າຄວາມຫຍຸ້ງຍາກແລະໄດ້ຮັບການປັບປຸງໃຫ້ດີຂຶ້ນເປັນສິ່ງທີ່ໜ້າທະໜຸຖະໜອມທີ່ສຸດຂອງສອງຝ່າຍ. ປີນີ້ແມ່ນປີເຊັນສົນທິສັນຍາສັນຕິພາບແລະມິດຕະພາບຈີນ-ຍີ່ປຸ່ນຄົບຮອບ 40 ປີ. ສອງຝ່າຍຄວນຍຶດໝັ້ນຄວາມຮັບຮູ້ຢ່າງເປັນເອກະພາບກັນລະຫວ່າງຈີນ-ຍີ່ປຸ່ນບົນຫຼັກການແລະເອກະສານການເມືອງ 4 ສະບັບ,ປົກປັກຮັກສາພື້ນຖານການເມືອງຂອງການພົວພັນລະຫວ່າງສອງປະເທດໃຫ້ດີ. ຈີນຍິນດີຮ່ວມກັບຍີ່ປຸ່ນເປີດກວ້າງການຮ່ວມມືທີ່ແທ້ຈິງໃນຂົງເຂດການປະດິດສ້າງໃໝ່,ຕະຫຼາດຝ່າຍທີ 3 ແລະຂົງເຂດອື່ນໆ,ຊຸກຍູ້ການສ້າງປະຊາຄົມເສດຖະກິດອາຊີຕາເວັນອອກແລະຂະບວນການເຊື່ອມໂຍງພາກພື້ນ.
ທ່ານ ທາກິໂອະ ອາກິບະ ກ່າວວ່າ: ຍີ່ປຸ່ນຮູ້ສຶກດີໃຈທີ່ໄດ້ເຫັນການພົວພັນລະຫວ່າງສອງປະເທດກັບເຂົ້າສູ່ສະພາບປົກກະຕິຄືນໃໝ່,ຍິນດີຮ່ວມກັບຈີນຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວໄປໜ້າຢ່າງບໍ່ຢຸດຢັ້ງ.