ລາວຈີນເພີ່ມທະວີການຮ່ວມມືດ້ານຮູບເງົາ ເພື່ອຊຸກຍູ້ວັດທະນະທຳໃຫ້ພັດທະນາໄປຮ່ວມກັນ
ຫວ່າງມໍ່ໆນີ້ ກົມຮູບເງົາກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ສປປ ລາວກັບກຸ່ມບໍລິສັດຮູບເງົາຈີນໄດ້ເຊັນບົດບັນທຶກການຮ່ວມມືດ້ານຮູບເງົາຢູ່ທີ່ນະຄອນຫຼວງປັກກິ່ງ ເພື່ອລົງເລິກການຮ່ວມມືລະຫວ່າງສອງປະເທດໃນດ້ານວັດທະນະທຳ ແລະສ້າງຜົນປະໂຫຍດຫຼາຍກວ່າເກົ່າໃຫ້ແກ່ປະຊາຊົນລາວໃນການສ້າງສາວັດທະນະທຳຕາມ “ໜຶ່ງແລວ ໜຶ່ງເສັ້ນທາງ” ຫຼາຍກວ່າເກົ່າໃຫ້ແກ່ປະຊາຊົນລາວ.
ອີງຕາມບົດບັນທຶກການຮ່ວມມືດ້ານຮູບເງົາດັ່ງກ່າວ, ກົມຮູບເງົາກະຊວງ ຖວທ ແລະກຸ່ມບໍລິສັດຮູບເງົາຈີນຈະເພີ່ມທະວີການແລກປ່ຽນການຢ້ຽມຢາມເຊິ່ງກັນແລະກັນ, ເພື່ອຮ່ຳຮຽນແລະ ຖອດຖອນບົດຮຽນນຳກັນ, ຮ່ວມກັນສ້າງແຜນປະຕິບັດງານ ດ້ານຮູບເງົາ, ເພື່ອສະໜອງຮູບເງົາ, ອຸປະກອນເຕັກນິກແລະໃຫ້ຄຳແນະນຳໃນການສາຍຮູບເງົາຢູ່ຊົນນະບົດລາວ. ບົດບັນທຶກດັ່ງກ່າວຍັງໄດ້ວາງແຜນໃຫ້ສອງຝ່າຍຮ່ວມມືກັນຜະລິດຮູບເງົາເລື່ອງ, ຮູບເງົາເດັກແລະຮູບເງົາສາລະຄະດີ, ສ້າງໂຮງຮູບເງົາເພື່ອການຄ້າ ແລະຝຶກອົບຮົມຊັບພະຍາກອນມະນຸດດ້ານຮູບເງົາ.
ທ່ານວິທູນ ສູນດາລາ ຫົວໜ້າກົມຮູບເງົາ ກະຊວງ ຖວທ ໄດ້ສະແດງຄວາມຊົມເຊີຍຜົນສຳເລັດຕ່າງໆບົນເສັ້ນທາງການຫັນເປັນທັນສະໄໝສັງຄົມນິຍົມທີ່ມີສີສັນພິເສດຈີນທີ່ນຳພາໂດຍພັກກອມມູນິດຈີນຕະຫຼອດໄລຍະ 40 ປີ ແຫ່ງການປະຕິຮູບ ແລະໄຂປະຕູສູ່ພາຍນອກ. ທ່ານວິທູນກ່າວວ່າ, ໃນຖານະເປັນປະເທດໜຶ່ງທີ່ນອນຢູ່ໃນຂອບການຮ່ວມມື ໜຶ່ງແລວໜຶ່ງເສັ້ນທາງ, ເຖິງວ່າປະເທດລາວເປັນປະເທດນ້ອຍ ແຕ່ກໍ່ເປັນປະຕູທີ່ອອກສູ່ອາຊີຕາເວັນອອກສຽງໃຕ້ແຫ່ງໜຶ່ງ, ລາວ-ຈີນມີພື້ນຖານວັດທະນະທຳແລະລະບອບສັງຄົມທີ່ຄ້າຍຄືກັນ, ການເຊັນສັນຍາຮ່ວມມືດ້ານຮູບເງົາກັບຈີນ, ຈະຊ່ວຍຊຸກຍູ້ຂະແໜງການຮູບເງົາຂອງລາວພັດທະນາຂຶ້ນ ແລະຈະນຳເອົາຜົນປະໂຫຍດຕົວຈິງຫຼາຍຢ່າງມາໃຫ້ປະຊາຊົນລາວ.ການສາຍຮູບເງົາຢູ່ຊົນນະບົດຂອງຈີນເປັນບົດຮຽນທີ່ດີ. ສະນັ້ນ ພາຍໃຕ້ການຊ່ວຍເຫຼືອ ແລະສະໜັບສະໜຸນຂອງກຸ່ມບໍລິສັດຮູບເງົາຈີນ, ລາວຈະຖອດຖອນເອົາບົດຮຽນທີ່ດີຂອງຈີນເພື່ອຊຸກຍູ້ວຽກງານສາຍຮູບເງົາຢູ່ຊົນນະບົດລາວ ແລະປັບປຸງສະພາບການສາຍຮູບເງົາຢູ່ຊົນນະບົດຂອງລາວໃຫ້ດີຂຶ້ນ, ຊຸກຍູ້ຂະແໜງການວັດທະນະທຳຢູ່ຊົນນະບົດລາວພັດທະນາຂຶ້ນ. ການເຊັນບົດບັນທຶກຮ່ວມມືຄັ້ງນີ້ແມ່ນຄັ້ງທຳອິດທີ່ລາວເຊັນກັບຕ່າງປະເທດກ່ຽວກັບການຮ່ວມມືດ້ານຮູບເງົາ, ເຊິ່ງລັດຖະບານ ກໍ່ຄືກະຊວງ ຖວທ ໄດ້ໃຫ້ຄວາມສຳຄັນຢ່າງສູງ, ຫວັງວ່າສອງຝ່າຍລາວ-ຈີນຈະບັນລຸການຮ່ວມມືເປັນຢ່າງດີໃນດ້ານການຮ່ວມມືກັນສ້າງຮູບເງົາແລະດ້ານອື່ນໆ.
ທ່ານເລີ້ເຄີຊີ ຜູ້ອຳນວຍການໃຫຍ່ກຸ່ມບໍລິສັດຮູບເງົາຈີນກ່າວວ່າ, ພາຍໃຕ້ການຊີ້ນຳນຳພາຕາມແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ກຸ່ມບໍລິສັດຮູບເງົາຈີນພວມປະກອບສ່ວນເຂົ້າໃນການສ້າງປະເທດຈີນຈາກປະເທດຜະລິດຮູບເງົາຫຼາຍກາຍເປັນປະເທດທີ່ມີຊື່ສຽງແລະເຂັ້ມແຂງສຸດໃນການສ້າງຮູບເງົາ, ແລະໄດ້ສ້າງໂຄງການສົ່ງຮູບເງົາຈີນໄປສູ່ທົ່ວໂລກ, ເພື່ອໃຫ້ໂລກໄດ້ຟັງສຽງຈີນ, ໄດ້ເຫັນພາບຈີນ, ແລະຮູ້ກັບເລື່ອງຕ່າງໆກ່ຽວກັບຈີນ. ລະບົບອຸປະກອນການສາຍຮູບເງົາຢູ່ຊົນນະບົດຖືເປັນລະບົບໜຶ່ງທີ່ຈີນມີສິດຊັບສິນທາງປັນຍາຂອງຕົນເອງ ແລະໄດ້ສ້າງລະບຽບການທຸລະກິດເປັນຢ່າງດີ, ຊົນນະບົດຈີນແລະຊົນນະບົດລາວມີຈຸດທີ່ຄ້າຍຄືກັນຫຼາຍຢ່າງ, ລະບົບສາຍຮູບເງົາຢູ່ຊົນນະບົດຂອງຈີນສອດຄ່ອງກັບສະພາບຄວາມເປັນຈິງຂອງລາວ, ການນຳໃຊ້ລະບົບສາຍຮູບເງົາຢູ່ຊົນນະບົດຂອງຈີນ ບວກກັບຮ່ວມມືກັບຈີນໃນການສ້າງໂຮງຮູບເງົາຢູ່ຕົວເມືອງ, ສາມາດກວາມເອົາ 80% ຂອງຜູ້ຊົມຢູ່ ໃນຊົນນະບົດ ແລະ 20% ຢູ່ໃນຕົວເມືອງ, ເຊິ່ງຈະສາມາດຊ່ວຍປັບປຸງພື້ນຖານດ້ານຮູບເງົາຂອງລາວໃຫ້ໜັກແໜ້ນກວ່າເກົ່າ.