ກິດຈະກຳ “ຄ້າຍສ້າງປະສົບການວັດທະນະທຳໃຫ້ຜູ້ນຳໜຸ່ມແມ່ນ້ຳລ້ານຊ້າງ-ແມ່ນ້ຳຂອງ”ໄດ້ຈັດຂຶ້ນຢູ່ນະຄອນຄຸນມິງ ແຂວງຢູນນານ ສປ ຈີນໃນວັນທີ 3 ກັນຍານີ້ໂດຍມີຜູ້ຕາງໜ້າຊາວໜຸ່ມຈີນ, ລາວ, ກຳປູເຈຍ, ມຽນມາ,ໄທແລະຫວຽດນາມລວມທັງໝົດ 120 ຄົນເຂົ້າຮ່ວມ.
ກິດຈະກຳຄັ້ງນີ້ຈັດຂຶ້ນໂດຍມີສະຫະພັນຊາວໜຸ່ມຈີນເປັນເຈົ້າພາບແລະສະຫະພັນຊາວໜຸ່ມແຂວງຢູນນານເປັນຜູ້ຈັດງານ ໂດຍມີຈຸດປະສົງນຳໃຊ້ທ່າແຮງທາງດ້ານພູມີພາກແລະທ່າແຮງດ້ານຊັບພະຍາກອນວັດທະນະທຳຂອງແຂວງຢູນນານທີ່ເປັນປະຕູສູ່ບັນດາປະເທດລຸ່ມແມ່ນ້ຳຂອງ ເພື່ອສົ່ງເສີມມິດຕະພາບ, ການແລກປ່ຽນແລະການຮ່ວມມືກັນລະຫວ່າງຊາວໜຸ່ມບັນດາປະເທດ.
ກິດຈະກຳຄັ້ງນີ້ຈະດຳເນີນໄປເປັນເວລາ 10 ວັນໂດຍຈະຈັດຢູ່ນະຄອນຄຸນມິງແລະນະຄອນຕ້າຫຼີແຂວງຢູນນານ ເຊິ່ງປະກອບດ້ວຍກິດຈະກຳຕ່າງໆເຊັ່ນ ເວທີປຶກສາຫາລືການສ້າງປະຊາຄົມຮ່ວມຊາຕາກຳປະເທດແມ່ນ້ຳລ້ານຊ້າງ-ແມ່ນ້ຳຂອງ, ການໃຫ້ຄວາມຮູ້ກ່ຽວກັບການປະດິດສ້າງແລະການປະກອບທຸລະກິດສຳລັບຊາວໜຸ່ມ, ການຢ້ຽມຢາມທັດສະນະສຶກສາຕົວຈິງ, ການສຳມະນາບົນຈິດໃຈມິດຕະພາບ, ການຍົກລະດັບຄວາມສາມາດແລະອື່ນໆ.