ປິດກອງປະຊຸມສຸດຍອດປັກກິ່ງເວທີປຶກສາຫາລືການຮ່ວມມືຈີນ-ອາຟຣິກາ
ກອງປະຊຸມສຸດຍອດປັກກິ່ງເວທີປຶກສາຫາລືການຮ່ວມມືຈີນ-ອາຟຣິກາທີ່ຈັດຂຶ້ນຢູ່ນະຄອນຫຼວງປັກກິ່ງໄດ້ປິດລົງໃນວັນທີ 4 ກັນຍານີ້. ຫຼັງຈາກນັ້ນ, ທ່ານສີຈິ້ນຜິງ ປະທານປະເທດຈີນ, ທ່ານມຕາເມລາ ຊີຣິນ ຣາມາໂຟຊາ ປະທານາທິບໍດີອາຟຣິກາໃຕ້ ອະດີດປະເທດປະທານຮ່ວມ ແລະ ທ່ານແມກກີ ຊອນ ປະທານາທິບໍດີເຊເນການ ປະເທດປະທານຮ່ວມຊຸດໃໝ່ໄດ້ຮ່ວມກັນຖະແຫຼງຂ່າວໃນຫໍສະພາປະຊາຊົນນະຄອນຫຼວງປັກກິ່ງ.
ກອງປະຊຸມໄດ້ອອກ “ຖະແຫຼງການປັກກິ່ງກ່ຽວກັບການສ້າງປະຊາຄົມຮ່ວມຊາຕາກຳຈີນ-ອາຟຣິກາທີ່ແໜ້ນແຟ້ນກວ່າເກົ່າ”, ໄດ້ເຕົ້າໂຮມຄວາມເຫັນເປັນເອກະພາບກັນຂອງຈີນແລະອາຟຣິກາທີ່ມີຕໍ່ບັນຫາສຳຄັນໃນສາກົນ ແລະ ພາກພື້ນໃນປັດຈຸບັນ ແລະ ສົ່ງສັນຍາອັນແຮງກ້າທີ່ຈະເພີ່ມທະວີການຮ່ວມມືລະຫວ່າງສອງຝ່າຍຕໍ່ໂລກ. ກອງປະຊຸມໄດ້ຜ່ານ “ແຜນການດຳເນີນງານປັກກິ່ງຂອງເວທີປຶກສາຫາລືການຮ່ວມມືຈີນ-ອາຟຣິກາປີ 2019 - 2021” ໂດຍໄດ້ກຳນົດວ່າ ຈີນ ແລະ ອາຟຣິກາຈະເນັ້ນໃສ່ການປະຕິບັດ “ແຜນການດຳເນີນງານ 8 ຂໍ້ໃຫຍ່” ໃນ 3 ປີຂ້າງໜ້າ ແລະ ເພີ່ມທະວີການຮ່ວມມືຕົວຈິງໃນທຸກຂົງເຂດຢ່າງຮອບດ້ານ. ທ່ານສີຈິ້ນຜິງກ່າວວ່າ, ຜູ້ນຳຈີນແລະອາຟຣິກາມີຄວາມເຫັນເປັນເອກະພາບກັນໃຫ້ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ອາຟຣິກາ ທີ່ຮັບພາລະໜ້າທີ່ຮ່ວມກັນ, ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ, ຊົມໃຊ້ຄວາມສຸກຮ່ວມກັນ, ພັດທະນາວັດທະນະທຳຂອງສອງຝ່າຍໃຫ້ຈະເລີນຮ່ວມກັນ, ປ້ອງກັນຄວາມໝັ້ນຄົງຮ່ວມກັນ ແລະ ຢູ່ຮ່ວມກັນຢ່າງກົມກຽວ.
ທ່ານຣາມາໂຟຊາ ແລະ ທ່ານແມກກີຊອນໃຫ້ສຳພາດວ່າ, ກອງປະຊຸມສຸດຍອດຄັ້ງນີ້ປະສົບຜົນສຳເລັດຢ່າງງົດງາມ ໂດຍໄດ້ສ່ອງແສງໃຫ້ເຫັນມິດຕະພາບອັນເລິກເຊິ່ງປານອ້າຍນ້ອງລະຫວ່າງອາຟຣິກາກັບຈີນ ແລະ ໄດ້ວາງແຜນພັດທະນາແຫ່ງການພົວພັນອາຟຣິກາ-ຈີນໃນອະນາຄົດ. ອາຟຣິກາຍິນດີພະຍາຍາມຮ່ວມກັບຈີນ, ສ້າງປະຊາຄົມຮ່ວມຊາຕາກຳຈີນ-ອາຟຣິກາທີ່ແໜ້ນແຟ້ນກວ່າເກົ່າ ແລະ ສ້າງຄວາມຜາສຸກໃຫ້ແກ່ປະຊາຊົນທັງສອງຝ່າຍ.