ວັນທີ 5 ກັນຍານີ້ຢູ່ນະຄອນຫຼວງປັກກິ່ງ, ທ່ານເວີ້ຍເຟີ້ງເຮີ ທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນປະເທດຈີນໄດ້ພົບປະກັບທ່ານ ເມນວິງ ອອງ ຜູ້ບັນຊາການສູງສຸດກອງທັບສິງກະໂປ.
ທ່ານເວີ້ຍເຟີ້ງເຮີກ່າວວ່າ: ພາຍໃຕ້ການນຳພາຮ່ວມຂອງທ່ານປະທານສີຈິ້ນຜິງແລະທ່ານນາຍົກລີຊຽນລົງ, ການພົວພັນຈີນ-ສິງກະໂປໄດ້ຮັບການປັບປຸງໃຫ້ກ້າວເຂົ້າສູ່ລວງເລິກຢ່າງຕໍ່ເນື່ອງ. ຈີນຍິນດີຮ່ວມກັບສິງກະໂປເພີ່ມທະວີການແລກປ່ຽນທາງຍຸດທະສາດລະຫວ່າງການນຳຂັ້ນສູງ, ຊຸກຍູ້ການຝຶກຊ້ອມແລະຊ້ອມຮົບຮ່ວມ, ການແລກປ່ຽນກັນລະຫວ່າງສະຖາບັນຄັງປັນຍາແລະການຮ່ວມມືຕົວຈິງອື່ນໆ, ລົງເລິກການຮ່ວມມືແລະປະສານງານເພື່ອຄວາມໝັ້ນຄົງຫຼາຍຝ່າຍໃນພາກພື້ນໃຫ້ກ້າວສູ່ລວງເລິກຢ່າງຕໍ່ເນື່ອງ, ເສີມຂະຫຍາຍສາຍພົວພັນຄູ່ຮ່ວມມືຮອບດ້ານຈີນ-ສິງກະໂປໃຫ້ກ້າວໜ້າໄປພ້ອມຍຸກສະໄໝ,ຕັ້ງໜ້າປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ທ່ານ ເມນວິງ ອອງ ກ່າວວ່າ, ສິງກະໂປຕີລາຄາຢ່າງສູງຕໍ່ ບົດບາດສຳຄັນຂອງຈີນໃນວຽກງານສາກົນແລະພາກພື້ນ, ຍິນດີເພີ່ມທະວີການຮ່ວມມືກັບຈີນ, ເພີ່ມຄວາມໄວ້ເນື້ອເຊື່ອໃຈກັນທາງຍຸດທະສາດ, ເສີມຂະຫຍາຍການພົວພັນລະຫວ່າງສອງປະເທດກໍຄືສອງກອງທັບ.