ການສຳມະນາຫຼຸດຜ່ອນຄວາມສ່ຽງໄພພິບັດຈີນ-ອາຊຽນໄດ້ຈັດຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນແຕ່ວັນທີ 5-6 ກັນຍານີ້ ໂດຍມີເຈົ້າໜ້າທີ່ອົງການຄຸ້ມຄອງໄພພິບັດ, ຜູ້ຊ່ຽວຊານຈາກຈີນ,ລາວ,ຫວຽດນາມ, ມຽນມາ,ຟີລິບປິນແລະປະເທດອື່ນໆໄດ້ເຂົ້າຮ່ວມກອງປະຊຸມເພື່ອຄົ້ນຄວ້າແລະແລກປ່ຽນຄວາມເຫັນກ່ຽວກັບການປ້ອງກັນແລະຫຼຸດຜ່ອນໄພພິບັດກໍຄືການກູ້ໄພຂອງພາກພື້ນ.
ເຈົ້າໜ້າທີ່ຫ້ອງການຄຸ້ມຄອງໄພພິບັດແລະການຊ່ວຍເຫຼືອມະນຸດສະທຳຂອງກອງເລຂາອາຊຽນກ່າວວ່າ: ໃນຊຸມປີມໍ່ໆມານີ້, ຈີນໄດ້ຕັ້ງໜ້າຖ່າຍທອດເຕັກນິກ, ການສ້າງຊັບພະຍາກອນມະນຸດແລະໃຫ້ການບໍລິການຍົກລະດັບຄວາມຮູ້ດ້ານການປ້ອງກັນແລະຫຼຸດຜ່ອນໄພພິບັດໃຫ້ອາຊຽນ, ອຸປະກອນທີ່ກ້າວໜ້າທັນສະໄໝເຊັ່ນ:ເຮືອບິນບໍ່ມີຄົນຂັບທີ່ຈີນສະໜອງໃຫ້ໄດ້ກາຍເປັນພາຫະນະສຳຄັນສຳລັບອາຊຽນໃນການຕິດຕາມສະພາບການໃນເຂດປະສົບໄພໄດ້ຢ່າງວ່ອງໄວແລະຫຼຸດຜ່ອນຜົນສະທ້ອນຈາກໄພທຳມະຊາດ.
ຂ່າວແຈ້ງວ່າ: ການສຳມະນາຄັ້ງນີ້ ປິ່ນອ້ອມຫົວຂໍ້ດ້ານຕ່າງໆເຊັ່ນ:ວິທະຍາສາດດ້ານຄວາມສ່ຽງໄພພິບັດ, ເຕັກນິກກັບນະໂຍບາຍ, ວິທີແລະພາຫະນະໃນການຄຸ້ມຄອງຄວາມສ່ຽງໄພພິບັດ, ຄັງສຳຮອງເຂົ້າຂອງເຄື່ອງໃຊ້ກັບອຸປະກອນເຕັກນິກປ້ອງກັນໄພພິບັດ, ການເພີ່ມທະວີການກຽມພ້ອມຮັບມືໄພພິບັດກໍຄືການຟື້ນຟູຄືນໃໝ່ຫຼັງໄພພິບັດແລະອື່ນໆ. ໃນໄລຍະດຳເນີນກອງປະຊຸມ, ບັນດາຝ່າຍຍັງຈະສຳມະນາກ່ຽວກັບແຜນດຳເນີນງານໂຄງການຮ່ວມມືຊ່ວຍເຫຼືອການປ້ອງກັນແລະຫຼຸດຜ່ອນໄພພິບັດອາຊຽນອີກດ້ວຍ.