ທ່ານນາງ ຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວໃນວັນທີ 6 ກັນຍານີ້ວ່າ: ເມື່ອບໍ່ດົນມານີ້, ກຳປັ່ນຮົບອັງກິດໄດ້ລ່ວງເຂົ້ານ່ານນ້ຳໝູ່ເກາະຊີ່ຊ່າ ປະເທດຈີນ ໂດຍບໍ່ໄດ້ຮັບການອະນຸມັດຈາກລັດຖະບານຈີນສາກ່ອນ ຈີນໄດ້ຄັດຄ້ານຕໍ່ເລື່ອງນີ້ຢ່າງເດັດຂາດ ແລະ ໄດ້ທັກທ້ວງອັງກິດຢ່າງເຄັ່ງຂຶມ ທັງສະແດງຄວາມບໍ່ພໍໃຈຢ່າງຮຸນແຮງ.
ທ່ານນາງຮວ້າຊຸ່ນຢິງ ກ່າວວ່າ: ວັນທີ 31 ສິງຫາຜ່ານມາ, ກຳປັ່ນຮົບ Albion ອັງກິດໄດ້ລ່ວງເຂົ້ານ່ານນ້ຳໝູ່ເກາະຊີ່ຊ່າ ປະເທດຈີນ ໂດຍບໍ່ໄດ້ຮັບການອະນຸມັດຈາກລັດຖະບານຈີນສາກ່ອນ. ຈາກນັ້ນ, ກອງທັບເຮືອຈີນກໍໄດ້ກວດກາ-ຈຳແນກກຳປັ່ນຮົບອັງກິດຕາມກົດໝາຍ ແລະໄດ້ຕັກເຕືອນແລ້ວຂັບໄລ່ອອກໄປ.
ທ່ານນາງຮວ້າຊຸ່ນຢິງ ກ່າວຕື່ມວ່າ: ໝູ່ເກາະຊີ່ຊ່າແມ່ນດິນແດນຂອງຈີນມາແຕ່ປະຫວັດສາດ. ເມື່ອເດືອນພຶດສະພາປີ 1996, ລັດຖະບານຈີນໄດ້ຂີດແບ່ງບໍລິເວນນ່ານນ້ຳໝູ່ເກາະຊີ່ຊ່າມາແລ້ວ ໂດຍອີງຕາມກົດໝາຍວ່າດ້ວຍນ່ານນ້ຳແລະເຂດອ້ອມແອ້ມສາທາລະນະລັດປະຊາຊົນຈີນ. ການເຄື່ອນໄຫວຂອງກຳປັ່ນຮົບອັງກິດໄດ້ລະເມີດກົດໝາຍຂອງຈີນແລະກົດໝາຍສາກົນທີ່ກ່ຽວຂ້ອງ, ໄດ້ລ່ວງລ້ຳອຳນາດອະທິປະໄຕຂອງຈີນ ຈີນກ່າວເຕືອນອັງກິດຢ່າງເຄັ່ງຂຶມໃຫ້ຍຸດຕິການກະທຳທ້າທາຍເກາະຜິດແບບນີ້ ເພື່ອຫຼີກເວັ້ນບໍ່ໃຫ້ແຕະຕ້ອງເຖິງການພົວພັນລະຫວ່າງສອງປະເທດ ກໍຄື ສັນຕິພາບແລະສະຖຽນລະພາບຂອງພາກພື້ນຖືກທຳລາຍ. ຈີນຈະສືບຕໍ່ນຳໃຊ້ມາດຕະການທີ່ຈຳເປັນທັງໝົດເພື່ອປົກປ້ອງອຳນາດອະທິປະໄຕແລະຄວາມໝັ້ນຄົງຂອງປະເທດຕົນ.