ກອງປະຊຸມເວທີປຶກສາຫາລືເຈົ້າຄອງຕົວເມືອງຈີນ-ອາຊຽນ 2018 ໄດ້ຈັດຂຶ້ນຢູ່ນະຄອນນານນິງເຂດກວາງຊີຂອງຈີນໃນວັນທີ 8 ກັນຍານີ້, ໂດຍມີແຂກທີ່ມີກຽດປະມານ 300 ທ່ານທີ່ມາຈາກຮ້ອຍກວ່າຕົວເມືອງຂອງຈີນແລະອາຊຽນເຂົ້າຮ່ວມກອງປະຊຸມ, ເພື່ອປຶກສາຫາລືການພັດທະນາຕົວເມືອງແລະການຮ່ວມມືດ້ານການປະດິດສ້າງໃໝ່ລະຫວ່າງຈີນແລະອາຊຽນ.
ໃນໂອກາດໃຫ້ສຳພາດຕໍ່ນັກຂ່າວ, ທ່ານນາງກລໍເຣຍ ມາກາປາກັນ ອາໂລໂຢ ອະດີດປະທານາທິບໍດີ, ປະທານສະພາຕ່ຳຊຸດປັດຈຸບັນຂອງຟີລິບປິນກ່າວວ່າ, ຫຼັງຈາກໄດ້ພັດທະນາຢ່າງວ່ອງໄວມາເປັນເວລາ 40 ປີ, ຈີນໄດ້ກາຍເປັນກຸ່ມເສດຖະກິດໃຫຍ່ອັນດັບທີສອງຂອງໂລກ, ແລະໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະອື່ນໆເພື່ອຊຸກຍູ້ການເຊື່ອມໂຍງເສດຖະກິດພາກພື້ນ, ເຊິ່ງຈະເຮັດໃຫ້ຜົນການພັດທະນາເສດຖະກິດຂອງຈີນຂະຫຍາຍກວ້າງອອກຕື່ມອີກ, ແລະເຮັດໃຫ້ບັນດາປະເທດອາຊຽນທີ່ຢູ່ໃກ້ຄຽງໄດ້ຮັບຜົນປະໂຫຍດ.
ທ່ານນາງອາໂລໂຍ ຫວັງວ່າ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ສາມາດເຮັດໃຫ້ປະເທດອາຊຽນລວມທັງຟີລິບປີນໄດ້ຮັບການສະໜັບສະໜູນດ້ານເຕັກນິກຫຼາຍກວ່າເກົ່າ, ພ້ອມກັນນັ້ນ, ປັດຈຸບັນ, ການຮ່ວມມືທາງບົກລະຫວ່າງຈີນແລະອາຊຽນນັບມື້ນັບໃກ້ຊິດກວ່າເກົ່າ, ຂະນະດຽວກັນກໍເພີ່ມທະວີການເຊື່ອມຈອດການເດີນເຮືອທາງທະເລຢ່າງບໍ່ຢຸດຢັ້ງ, ຊຸກຍູ້ໃຫ້ການຄົມມະນາຄົມທາງທະເລສະດວກຍິ່ງຂຶ້ນ.
ທ່ານນາງອາໂລໂຍ ຍັງກ່າວຕື່ມວ່າ, “ໃນຂະບວນການຮ່ວມມືລະຫວ່າງຈີນແລະອາຊຽນ, ພວກເຮົາຄວນຮັດແໜ້ນມິດຕະພາບຢ່າງບໍ່ຢຸດຢັ້ງ, ເພີ່ມທະວີການຮ່ວມມື, ແລະບັນລຸຄວາມຈະເລີນຮຸ່ນເຮືອງຮ່ວມກັນໂດຍຜ່ານການສ້າງຄວາມໄວ້ເນື້ອເຊື່ອໃຈກັນ.”