ວັນທີ 12 ກັນຍານີ້, ງານວາງສະແດງຈີນ-ອາຊຽນຄັ້ງທີ 15 ທີ່ຈະດຳເນີນເປັນເວລາ 4 ວັນແລະກອງປະຊຸມສຸດຍອດການຄ້າ ແລະການລົງທຶນຈີນ-ອາຊຽນໄດ້ຈັດຂຶ້ນຢູ່ນະຄອນນານນີງ ເຂດກວາງຊີຈີນ. ງານວາງສະແດງຄັ້ງນີ້ມີຫົວຂໍ້ວ່າ “ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ສ້າງປະຊາຄົມປະດິດສ້າງໃໝ່ຈີນ-ອາຊຽນ”. ໃນພິທີເປີດ, ຜູ້ນຳບັນດາປະເທດອາຊຽນຕ່າງກໍໄດ້ຕີລາຄາສູງຕໍ່ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ງານວາງສະແດງຈີນ-ອາຊຽນ.
ທ່ານສົມດີ ດວງດີ, ຮອງນາຍົກລັດຖະມົນຕີລາວໄດ້ປະກອບຄຳເຫັນໂດຍກ່າວວ່າ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ໄດ້ປະກອບສ່ວນສຳຄັນໃຫ້ແກ່ການເສີມຂະຫຍາຍສາຍພົວພັນການຄ້າອາຊຽນ ແລະສປຈີນ, ເຮັດໃຫ້ເສດຖະກິດພາກພື້ນມີການຂະຫຍາຍຕົວຂຶ້ນຕື່ມ, ໂດຍສະເພາະບັນດາໂຄງການພາຍໃຕ້ “ໜຶ່ງແລວໜຶ່ງເສັ້ນທາງ” ເປັນຕົ້ນແມ່ນການຂົນສົ່ງທາງນ້ຳ ທາງບົກ ທາງລົດໄຟ ແລະໂຄງການຕິດພັນອື່ນໆປະສົບຜົນສຳເລັດ. ຫວັງວ່າອາຊຽນ ແລະຈີນສືບຕໍ່ສ້າງເຄືອຂ່າຍ ແລະຮັດແໜ້ນການເຊື່ອມຈອດລະຫວ່າງອາຊຽນກັບຈີນໃຫ້ສຳເລັດໂດຍໄວ, ໂດຍເຊື່ອມສານ “ໜຶ່ງແລວໜຶ່ງເສັ້ນທາງ” ກັບແຜນແມ່ບົດເຊື່ມອຈອດອາຊຽນ 2025 ເພື່ອອຳນວຍຄວາມສະດວກໃຫ້ແກ່ການຄ້າ ແລະການລົງທຶນໃນພາກພື້ນ.
ທ່ານມິນສະເວ, ຮອງປະທານາທິບໍດີມຽນມາກ່າວວ່າ, ມຽນມາໃຫ້ຄວາມສຳຄັນສູງຕໍ່ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ເຫັນວ່າຂໍ້ລິເລີ່ມດັ່ງກ່າວມີຄວາມໝາຍສຳຄັນຕໍ່ການຊຸກຍູ້ມິດຕະພາບລະຫວ່າງປະຊາຊົນບັນດາປະເທດ, ສ້າງສັນຕິພາບ ແລະຄວາມໝັ້ນຄົງຂອງພາກພື້ນ. ມຽນມາຫວັງວ່າ ການສ້າງ “ເສັ້ນທາງສາຍໄໝທາງທະເລສະຕະວັດທີ 21”ທີ່ເປັນພາກສ່ວນສຳຄັນຂອງ “ໜຶ່ງແລວໜຶ່ງເສັ້ນທາງ”ນັ້ນສາມາດຊຸກຍູ້ການສ້າງເຄືອຂ່າຍການຄ້າທາງທະເລ, ປັບປຸງ ແລະ ເຊື່ອມໂຍງເຊື່ອມຈອດພື້ນຖານໂຄງລ່າງ, ຍົກລະດັບຄວາມສະດວກຂອງການຂົນສົ່ງທາງທ່າກຳປັ່ນ, ການເດີນເຮືອ ແລະການຄ້າລະຫວ່າງປະເທດລຽບຕາມ “ໜຶ່ງແລວໜຶ່ງເສັ້ນທາງ”.
ປີນີ້ແມ່ນປີທີ່ຈີນ-ອາຊຽນສ້າງສາຍພົວພັນຄູ່ຮ່ວມຍຸດທະສາດຄົບຮອບ 15ປິ, ພໍດີແມ່ນປີທີ່ຈີນ-ກຳປູເຈຍສ້າງສາຍພົວພັນທາງການທູດຄົບຮອບ 60 ປີ. ກຳປູເຈຍເປັນປະເທດກິຕິມະສັກຂອງງານວາງສະແດງຈີນ-ອາຊຽນປີນີ້. ທ່ານຮຸນແຊນ, ນາຍົກລັດຖະມົນຕີກຳປູເຈຍກ່າວວ່າ, ໃນ 15 ປີຜ່ານມາ, ງານວາງສະແດງຈີນ-ອາຊຽນໄດ້ກາຍເປັນເວທີສຳຄັນ ແລະມີປະສິດທິພາບສູງສຳລັບການແລກປ່ຽນດ້ານການເມືອງ, ການທູດ ແລະເສດຖະກິດການຄ້າລະຫວ່າງຜູ້ນຳ, ນັກທຸລະກິດ ແລະຜູ້ລົງທຶນບັນດປະເທດ, ເສີມຂະຫຍາຍບົດບາດສຳຄັນໃນການລົງເລິກການຮ່ວມມືດ້ານການຄ້າ ແລະການລົງທຶນລະຫວ່າງຈີນກັບປະເທດອາຊຽນ, ລົງເລິກການຊຸກຍູ້ຂະບວນການເຊື່ອມໂຍງເສດຖະກິດພາກພື້ນ. ທ່ານຫວັງວ່າຈີນຈະຖ່າຍທອດເຕັກນິກ ແລະບົດຮຽນດ້ານວິທະຍາສາດເຕັກໂນໂລຊີ ແລະ ປະດິດສ້າງໃໝ່ໃຫ້ບັນດາປະເທດອາຊຽນ, ປັບປຸງ ແລະຂະຫຍາຍການຮ່ວມມືຈີນ-ອາຊຽນໃນຂົງເຂດວິທະຍາສາດເຕັກໂນໂລຊີ ແລະການປະດິດສ້າງໃໝ່, ຊ່ວຍໃຫ້ບັນດາປະເທດອາຊຽນໄດ້ຮັບຜົນປະໂຫຍດອັນໃຫຍ່ຫຼວງ, ກ້າວໄປເຖິງການບັນລຸເປົ້າໝາຍທີ່ສ້າງປະຊາຄົມປະດິດສ້າງໃໝ່ຈີນ-ອາຊຽນ.
ທ່ານວອງດິນຮວາຍ, ຮອງນາຍົກລັດຖະມົນຕີຫວຽດນາມກ່າວວ່າ, ຍາມໃດຫວຽດນາມກໍໃຫ້ຄວາມສຳຄັນ ແລະ ຕັ້ງໜ້າຊຸກຍູ້ການຮ່ວມມືຈີນ-ອາຊຽນ, ສ້າງເງື່ອນໄຂເອື້ອອຳນວຍໃຫ້ວິສາຫະກິດຈີນ ແລະ ປະເທດອາຊຽນທີ່ລົງທຶນ ຮ່ວມມື ແລະພັດທະນາຢູ່ຫວຽດນາມມີຄວາມສະດວກສະບາຍ, ສອດຄ່ອງກັບຜົນປະໂຫຍດຂອງບັນດາປະເທດ. ປີນີ້ຫວຽດນາມມີຮ້ານວາງສະແດງຫຼາຍກວ່າ 250 ຮ້ານ, ເຊິ່ງສືບຕໍ່ເປັນອັນດັບໜຶ່ງໃນປະເທດອາຊຽນ.
ມີວິສາຫະກິດ 2700 ກວ່າແຫ່ງທີ່ມາຈາກ 29 ປະເທດລຽບຕາມ “ໜຶ່ງແລວໜຶ່ງເສັ້ນທາງ” ເຊິ່ງລວມທັງ 10 ປະເທດອາຊຽນໄດ້ເຂົ້າຮ່ວມງານວາງສະແດງຄັ້ງນີ້.