ຈີນ-ຫວຽດນາມຈັດກອງປະຊຸມຈັດຄະນະກຳມະການຊີ້ນຳການຮ່ວມມືສອງຝ່າຍ ຄັ້ງທີ 11
ກອງປະຊຸມຄັ້ງທີ 11 ຂອງຄະນະກຳມະການຊີ້ນຳການຮ່ວມມືສອງຝ່າຍຈີນ-ຫວຽດນາມ ໄດ້ໄຂຂຶ້ນຢູ່ນະຄອນໂຮ່ຈິມິນໃນວັນທີ 16 ກັນຍານີ້ ໂດຍມີທ່ານ ວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ແລະ ທ່ານ ຟາມບິງມິງ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການຕ່າງປະເທດຫວຽດນາມເປັນປະທານຮ່ວມກອງປະຊຸມ.
ໂອກາດດັ່ງກ່າວ, ທ່ານ ວາງຢີ້ ໄດ້ມີຄຳເຫັນສະເໜີ 4 ຂໍ້ຄື: ໜຶ່ງ, ຕ້ອງຍຶດໝັ້ນການຊີ້ນຳທາງຍຸດທະສາດຂອງການໄປມາຫາສູ່ກັນລະຫວ່າງການນຳຂັ້ນສູງ, ກຳແໜ້ນທິດທາງທີ່ຖືກຕ້ອງຂອງການພົວພັນສອງປະເທດ; ສອງ, ຕ້ອງຍຶດໝັ້ນການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ຊຸກຍູ້ການຮ່ວມມືດ້ານພື້ນຖານໂຄງລ່າງ, ການສ້າງເຂດການຮ່ວມມືເສດຖະກິດຂ້າມຊາດ ແລະ ການຮ່ວມມືດ້ານຄວາມສາມາດການຜະລິດໂດຍໄວ; ສາມ, ຍຶດໝັ້ນພື້ນຖານຄວາມຄິດເຫັນຂອງປະຊາຊົນສອງຝ່າຍໃຫ້ໝັ້ນຄົງ, ເປີດກວ້າງຊ່ອງທາງຢ່າງບໍ່ຢຸດຢັັ້ງ ແລະ ຈັດຕັ້ງປະຕິບັດວຽກງານຕົວຈິງໃຫ້ຫຼາຍກວ່າເກົ່າເພື່ອເພີ່ມຄວາມເຂົ້າໃຈກັນແລະຄວາມສາມັກຄີຮັກແພງກັນລະຫວ່າງປະຊາຊົນສອງຊາດ; ອັນສຸດທ້າຍ, ຕ້ອງແກ້ໄຂຄວາມເຫັນຂັດແຍ້ງກັນຢ່າງເໝາະສົມ, ປ້ອງກັນບໍ່ໃຫ້ເກີດເຫດການທີ່ທຳລາຍຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງຝ່າຍ, ມີວິໄສທັດອັນກວ້າງໄກ ແລະ ຊຸກຍູ້ການຮ່ວມມືທາງທະເລຢ່າງໜັກແໜ້ນ.
ທ່ານ ຟາມບິງມິງ ໄດ້ສະແດງຄວາມເຫັນເປັນເອກະພາບກັບທ່ານ ວາງຢີ້ ທີ່ໄດ້ຕີລາຄາຢ່າງຕັ້ງໜ້າຕໍ່ສາຍພົວພັນສອງຝ່າຍແລະມີຂໍ້ສະເໜີກ່ຽວກັບວຽກງານໃນໄລຍະຕໍ່ໜ້າ ແລະ ກ່າວວ່າ, ນັບແຕ່ກອງປະຊຸມຄັ້ງຜ່ານມາ, ສາຍພົວພັນຫວຽດນາມ-ຈີນໄດ້ຮັກສາທ່າຂະຫຍາຍຕົວທີ່ດີໂດຍລວມ, ການນຳຂັ້ນສູງລະຫວ່າງສອງພັກສອງລັດ ໄດ້ມີການໄປມາຫາສູ່ກັນຢ່າງສະໜິດແໜ້ນ, ເຊິ່ງເປັນການເສີມຂະຫຍາຍບົດບາດທີ່ສຳຄັນໃນການປັບປຸງມິດຕະພາບອັນເປັນມູນເຊື້ອ, ຄວບຄຸມຄວາມເຫັນຂັດແຍ້ງກັນ ແລະ ຮັບປະກັນການຂະຫຍາຍການພົວພັນສອງປະເທດຢ່າງປອດໃສແລະໜັກແໜ້ນ. ຂະນະດຽວກັນ, ມູນຄ່າການຄ້າລະຫວ່າງສອງຝ່າຍ ໄດ້ສ້າງສະຖິຕິໃໝ່ໃນປະຫວັດສາດ, ການຮ່ວມມືໃນຂົງເຂດຕ່າງໆໄດ້ຮັບຄວາມຄືບໜ້າຢ່າງແທ້ຈິງ, ການໄປມາຫາສູ່ກັນລະຫວ່າງປະຊາຊົນແລະການຮ່ວມມືລະຫວ່າງທ້ອງຖິ່ນ ໄດ້ເປີດກວ້າງອອກຢ່າງບໍ່ຢຸດຢັ້ງ, ບັນຫາດິນແດນຢູ່ຊາຍແດນ ກໍໄດ້ຮັບການຄວບຄຸມຢ່າງບັງເກີດຜົນໂດຍລວມ.
