ກອງປະຊຸມປັນຍາປະດິດ ຫຼື AI ຂອງໂລກ 2018 ໄດ້ໄຂຂຶ້ນຢູ່ກຳແພງນະຄອນຊຽງໄຮໃນວັນທີ 17 ກັນຍານີ້. ທ່ານ ສີຈິ້ນຜິງ ປະທານປະເທດຈີນໄດ້ສົ່ງສານອວຍພອນໃຫ້ກອງປະຊຸມປະສົບຜົນສຳເລັດຢ່າງຈົບງາມ ແລະ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ຜູ້ແທນບັນດາປະເທດ, ຜູ້ຮັບຜິດຊອບອົງການຈັດຕັ້ງສາກົນ, ຜູ້ຊ່ຽວຊານ, ນັກວິຊາການ, ນັກທຸລະກິດ ແລະບຸກຄົນວົງການອື່ນໆທີ່ເຂົ້າຮ່ວມກອງປະຊຸມ.
ໃນສານຂອງທ່ານ ສີຈິ້ນຜິງ ລະບຸວ່າ, ປັນຍາປະດິດຮຸ່ນໃໝ່ ພວມຂະຫຍາຍຕົວຢ່າງຟົດຟື້ນໃນຂອບເຂດທົ່ວໂລກ ເຊິ່ງເປັນກຳລັງໃໝ່ເພື່ອການພັດທະນາເສດຖະກິດສັງຄົມ ແລະພວມປ່ຽນແປງຮູບການການຜະລິດແລະການດຳລົງຊີວິດຂອງຄົນເຮົາຢ່າງເລິກເຊິ່ງ. ການທີ່ກຳໂອກາດການພັດທະນາດັ່ງກ່າວໃຫ້ດີ, ແກ້ໄຂບັນຫາໃໝ່ດ້ານປັນຍາປະດິດທີ່ເກີດຂຶ້ນໃນດ້ານກົດໝາຍ, ຄວາມໝັ້ນຄົງ, ການປະກອບອາຊີບ, ຈະລິຍະທຳ ແລະການປົກຄອງລັດຖະບານນັ້ນ ຕ້ອງການບັນດາປະເທດລົງເລິກຮ່ວມມື ແລະປຶກສາຫາລືພ້ອມກັນ. ຈີນຍິນດີຮ່ວມກັບບັນດາປະເທດ ຊຸກຍູ້ການພັດທະນາ, ຮ່ວມກັນປ້ອງກັນຄວາມໝັ້ນຄົງ ແລະຮ່ວມກັນຊົມໃຊ້ໝາກຜົນໃນຂົງເຂດປັນຍາປະດິດ.
ທ່ານ ສີຈິ້ນຜິງ ກ່າວເນັ້ນວ່າ, ຈີນພວມສຸມໃສ່ການບັນລຸການພັດທະນາທີ່ມີຄຸນນະພາບສູງ, ການພັດທະນາແລະການນຳໃຊ້ປັນຍາປະດິດເພື່ອຍົກສູງລະດັບຄວາມສະມາດຂອງການພັດທະນາເສດຖະກິດສັງຄົມຢ່າງແຂງແຮງ ແລະ ຈະເພີ່ມທະວີຄວາມສາມາດການບໍລິການສາທາລະນະແລະການຄຸ້ມຄອງຕົວເມືອງ. ຈີນຍິນດີດຳເນີນການແລກປ່ຽນແລະການຮ່ວມມືກັບບັນດາປະເທດໃນດ້ານການແລກປ່ຽນເຕັກນິກ, ຊົມໃຊ້ຂໍ້ມູນຮ່ວມກັນ, ການນຳໃຊ້ໃນດ້ານການຕະຫຼາດແລະອື່ນໆ, ຮ່ວມກັນຊົມໃຊ້ໂອກາດການພັດທະນາເສດຖະກິດດິຈິຕອນ. ຫວັງວ່າ, ແຂກທີ່ມາຮ່ວມປະຊຸມຈະປິ່ນອ້ອມຫົວຂໍ້ທີ່ວ່າ “ປັນຍາປະດິດສ້າງຄວາມສາມາດໃນຍຸກໃໝ່”, ລົງເລິກການແລກປ່ຽນຄວາມຄິດເຫັນ, ເຕົ້າໂຮມຄວາມເຫັນທີ່ເປັນເອກະພາບກັນ, ແລະຮ່ວມກັນຊຸກຍູ້ໃຫ້ປັນຍາປະດິດສ້າງຄວາມສຸກໃຫ້ແກ່ມວນມະນຸດ.