ແຫຼ່ງຂ່າວຈາກເວັບໄຊກະຊວງການເງິນຈີນໃຫ້ຮູ້ໃນວັນທີ 18 ກັນຍານີ້ວ່າ: ວັນທີ 11 ກໍລະກົດຜ່ານມາ, ລັດຖະບານອາເມຣິກາໄດ້ປະກາດຂຶ້ນພາສີ 10% ຕໍ່ສິນຄ້ານຳເຂົ້າຈາກຈີນໃນມູນຄ່າປະມານ 200 ຕື້ໂດລາສະຫະລັດ ແລະ ວັນທີ 2 ສິງຫາຜ່ານມາ ກໍໄດ້ຂຶ້ນພາສີເປັນ 25% ອີກ. ມາເຖິງວັນທີ 18 ກັນຍານີ້, ລັດຖະບານອາເມຣິກາໄດ້ປະກາດປະຕິບັດມາດຕະການຂຶ້ນພາສີຕໍ່ສິນຄ້ານຳເຂົ້າຈາກຈີນປະມານ 200 ຕື້ໂດລາ ໂດຍຈະຂຶ້ນພາສີ 10% ນັບແຕ່ວັນທີ 24 ກັນຍານີ້ເປັນຕົ້ນໄປ ແລະ ຈະເພີ່ມຂຶ້ນເປັນ 25% ນັບແຕ່ວັນທີ 1 ມັງກອນປີ 2019 ເປັນຕົ້ນໄປ. ອາເມຣິກາເຮັດຕາມລຳພັງໃຈແຕ່ຝ່າຍດຽວ, ສົ່ງຜົນເຮັດໃຫ້ຄວາມຂັດແຍ້ງ ທາງການຄ້າລະຫວ່າງຈີນ-ອາເມຣິກາຮຸນແຮງຂຶ້ນເລື້ອຍໆ. ເພື່ອປົກປ້ອງການຄ້າເສລີ ແລະ ລະບົບຫຼາຍຝ່າຍ, ປົກປ້ອງສິດແລະຜົນປະໂຫຍດອັນຊອບດ້ວຍກົດໝາຍຂອງຕົນ ຈີນກໍຈຳເປັນຕ້ອງປະກາດການໃຊ້ມາດຕະການຂຶ້ນພາສີຕໍ່ສິນຄ້ານຳເຂົ້າຈາກອາເມຣິກາໃນມູນຄ່າປະມານ 60 ຕື້ໂດລາໃນລາຍການສິນຄ້າທີ່ໄດ້ປະກາດມາແລ້ວກ່ອນໜ້ານີ້ ແລະ ຈະມີຜົນບັງຄັບໃຊ້ນັບແຕ່ 12:01 ໂມງຂອງວັນທີ 24 ກັນຍານີ້ເປັນຕົ້ນໄປ. ຖ້າວ່າອາເມຣິກາດື້ດຶງທີ່ຈະຂຶ້ນພາສີອີກ, ຈີນກໍຈະຕອບໂຕ້ໄປຄຽງຄູ່ກັນ ແລະ ຈະມີການປະກາດມາດຕະການລະອຽດຕ່າງຫາກ.
ຈີນຂໍກ່າວຢ້ຳອີກເທື່ອໜຶ່ງວ່າ: ການໃຊ້ມາດຕະການຂຶ້ນພາສີດັ່ງກ່າວ ກໍເພື່ອສະກັດກັ້ນບໍ່ໃຫ້ຄວາມຂັດແຍ້ງທາງການຄ້າຮຸນແຮງຂຶ້ນ ແລະກໍເປັນການຕອບໂຕ້ຕໍ່ລັດທິຝ່າຍດຽວ ແລະ ລັດທິປົກປ້ອງການຄ້າຂອງອາເມຣິກາດ້ວຍຄວາມຈຳເປັນ.