ວັນທີ 25 ກັນຍານີ້ໃນໂອກາດໃຫ້ສຳພາດຕໍ່ນັກຂ່າວຢູ່ນະຄອນຫຼວງປັກກິ່ງ ສປ ຈີນ, ທ່ານວາງໂຊ້ເວີນ ຮອງລັດຖະມົນຕີກະຊວງການຄ້າທັງເປັນຮອງຫົວໜ້າການເຈລະຈາການຄ້າສາກົນຈີນກ່າວວ່າ, ກອງປະຊຸມປຶກສາຫາລືເສດຖະກິດການຄ້າລະດັບສູງຈີນ-ອາເມຣິກາຈະເປີດຄືນໃໝ່ໃນເວລາໃດນັ້ນຂຶ້ນກັບຄວາມປາດຖະໜາຂອງອາເມຣິກາ.
ທ່ານວາງໂຊ້ເວີນກ່າວວ່າ, ຢາກໃຫ້ການເຈລະຈາໄດ້ຮັບຜົນ, ກ່ອນອື່ນຕ້ອງມີທ່າທີສະເໝີພາບກັນແລະເຄົາລົບນັບຖືເຊິ່ງກັນແລະກັນ. ປັດຈຸບັນ, ອາເມຣິກາໄດ້ປະຕິບັດມາດຕະການກີດກັນທາງການຄ້າຂະໜາດໃຫຍ່ປານນີ້, ປານເອົາມີດຈີ້ຄໍຂອງຄົນອື່ນ, ເຮັດໃຫ້ການເຈລະຈາແລະການປຶກສາຫາລືບໍ່ສະເໝີພາບ. ຂະນະດຽວກັນ, ການເຈລະຈາແລະການປຶກສາຫາລືຕ້ອງມີຄວາມຈິງໃຈແລະປະຕິບັດຕາມຄຳໝັ້ນສັນຍາ. ການປຶກສາຫາລືລະດັບສູງຈີນແລະອາເມຣິກາໄດ້ດຳເນີນເປັນ 4 ຮອບແລ້ວ, ການປຶກສາຫາລືເຫຼົ່ານີ້ໄດ້ກ້າວເຖິງຄວາມເປັນເອກະພາບບໍ່ໜ້ອຍ, ຍິ່ງກວ່ານັ້ນ, ສອງຝ່າຍໄດ້ອອກຖະແຫຼງການຮ່ວມ, ແຕ່ວ່າອາເມຣິກາຊ້ຳພັດປະຖິ້ມຄວາມເປັນເອກະພາບກັນເຫຼົ່ານີ້, ແລະໄດ້ປະຕິບັດມາດຕະການກີດກັນທາງການຄ້າ, ສົ່ງຜົນເຮັດໃຫ້ການເຈລະຈາບໍ່ສາມາດດຳເນີນຕໍ່ໄປໄດ້ອີກ.
ທ່ານວາງໂຊ້ເວີນ ກ່າວເນັ້ນວ່າ, ຕ້ອງມີຄວາມຈິງໃຈ, ແລະມີຄວາມສະເໝີພາບກັນໃນການເຈລະຈາ, ຂະນະດຽວກັນນັ້ນກໍປະຕິບັດຕາມຄຳໝັ້ນສັນຍາ, ຈິ່ງຈະສາມາດຊອກເຫັນທາງອອກຂອງການເຈລະຈາ.