ວັນທີ 8 ຕຸລານີ້ແມ່ນວັນລະນຶກແຫ່ງການສ້າງຕັ້ງສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນແລະອາຊຽນຄົບຮອບ 15 ປີ. ທ່ານຫວງຊີລຽນ ເອກອັກຄະລັດຖະທູດຈີນປະຈຳອາຊຽນໄດ້ພິມບົດຄວາມທີ່ມີຫົວຂໍ້ວ່າ “ຊຸກຍູ້ໃຫ້ການຮ່ວມມືຍຸດທະສາດລະຫວ່າງຈີນແລະອາຊຽນໃຫ້ໝັ້ນທ່ຽງແລະຍາວນານ” ລົງໜັງສືພິມປະຊາຊົນລາຍວັນຂອງຈີນ.
ບົດຄວາມລະບຸວ່າ, ກ່ອນນີ້ 15 ປີ, ຜູ້ນຳຈີນແລະອາຊຽນໄດ້ລົງນາມ “ຖະແຫຼງການຮ່ວມກ່ຽວກັບການພົວພັນຄູ່ຮ່ວມຍຸດທະສາດລະຫວ່າງຈີນແລະອາຊຽນທີ່ຫັນໜ້າສູ່ສັນຕິພາບແລະຄວາມຈະເລີນຮຸ່ງເຮືອງ” ຢູ່ເກາະບາຫຼີຂອງອິນໂດເນເຊຍ, ສອງຝ່າຍໄດ້ຕົກລົງຍົກການພົວພັນລະຫວ່າງຈີນແລະອາຊຽນຂຶ້ນເປັນການພົວພັນຄູ່ຮ່ວມຍຸດທະສາດ, ຈີນໄດ້ກາຍເປັນປະເທດຄູ່ຮ່ວມສົນທະນາທຳອິດທີ່ສ້າງການພົວພັນຄູ່ຮ່ວມຍຸດທະສາດກັບອາຊຽນ. ຕະຫຼອດ 15 ປີຜ່ານມາ, ມູນຄ່າການຄ້າລະຫວ່າງສອງຝ່າຍຈາກ 55,2 ຕື້ໂດລາເພີ່ມຂຶ້ນເປັນ 514,8 ຕື້ໂດລາ, ເພີ່ມຂຶ້ນເກືອບ 10 ເທົ່າ. ຈຳນວນຄົນໄປມາຫາສູ່ກັນລະຫວ່າງສອງຝ່າຍຈາກ 3,870,000 ເທື່ອຄົນເພີ່ມຂຶ້ນເປັນ 49,000,000 ເທື່ອຄົນ, ເພີ່ມຂຶ້ນເກືອບ 13 ເທົ່າ. ຈີນໄດ້ກາຍເປັນຄູ່ຄ້າໃຫຍ່ອັນດັບໜຶ່ງຂອງອາຊຽນ 9 ປີລຽນຕິດ, ການລົງທຶນໂດຍກົງລະຫວ່າງສອງຝ່າຍໄດ້ມີຫຼາຍກວ່າ 200 ຕື້ໂດລາ. ຄວາມຈິງໄດ້ຢືນຢັນວ່າ, ການພົວພັນລະຫວ່າງຈີນແລະອາຊຽນທີ່ພັດທະນາເປັນຢ່າງດີໄດ້ສ້າງຄວາມຜາສຸກຢ່າງໃຫຍ່ຫຼວງໃຫ້ແກ່ປະຊາຊົນ 2 ຕື້ຄົນຂອງສອງຝ່າຍ, ທັງໄດ້ຊຸກຍູ້ສັນຕິພາບແລະສະຖຽນລະພາບຂອງພາກພື້ນຢ່າງແຂງແຮງ.
ບົດຄວາມລະບຸວ່າ, ຈີນແລະອາຊຽນສາມາດກາຍເປັນຄູ່ຮ່ວມມືທີ່ໃກ້ຊິດກວ່າເກົ່າເພື່ອປົກປ້ອງການປົກປັກຮັກສາສັນຕິພາບແລະຄວາມໝັ້ນຄົງຮ່ວມກັນ.
ຈີນແລະອາຊຽນສາມາດກາຍເປັນຄູ່ຮ່ວມມືທີ່ໃກ້ຊິດກວ່າເກົ່າທີ່ຮັກສາການຄ້າເສລີແລະຂະບວນການໂລກາພິວັດຂອງໂລກ.
ຈີນແລະອາຊຽນສາມາດກາຍເປັນຄູ່ຮ່ວມມືທີ່ໃກ້ຊິດກວ່າເກົ່າເພື່ອສົ່ງເສີມອາລະຍະທຳທີ່ມີຄວາມຫຼາກຫຼາຍ, ກົມກຽວແລະກວມລວມ.
ບົດຄວາມລະບຸໃນຕອນສຸດທ້າຍວ່າ, ບົດຮຽນລ້ຳຄ່າທີ່ສຸດໃນຂະບວນການພັດທະນາການພົວພັນຈີນແລະອາຊຽນໃນ 15 ປີຜ່ານມາກໍຄື, ສອງຝ່າຍສະແຫວງຫາເປົ້າໝາຍທີ່ເປັນບ້ານໃກ້ເຮືອນຄຽງທີ່ດີຕໍ່ກັນແລະພັດທະນາໂດຍສັນຕິ, ຮ່ວມກັນປະຕິບັດຫຼັກການຢູ່ຮ່ວມກັນທີ່ມີຄວາມຊື່ສັດ, ປະຕິບັດຕໍ່ກັນຢ່າງສະເໝີພາບ, ເປີດປະຕູສູ່ພາຍນອກແລະກວມລວມ, ແລະຕ່າງຝ່າຍຕ່າງມີຜົນປະໂຫຍດ. ພ້ອມກັນມຸ້ງໜ້າໄປສູ່ອະນາຄົດ, ຈີນຍິນດີຮ່ວມກັບອາຊຽນກ້າວໄປຂ້າງໜ້າ, ສືບທອດອັນເກົ່າແລະພັດທະນາອັນໃໝ່, ເພື່ອສ້າງອະນາຄົດທີ່ດີງາມກວ່າເກົ່າ.