ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຂ່າວທີ່ຈັດຂຶ້ນໃນວັນທີ 9 ຕຸລານີ້ວ່າ, ຈີນເຕືອນໃຫ້ອາເມຣິກາຈົ່ງຢຸດເຊົາການໃສ່ຮ້າຍປ້າຍສີແລະກ່າວຫາຈີນຢ່າງໄຮ້ເຫດຜົນ, ຢຸດເຊົາການແຊກແຊງກິດຈະການພາຍໃນຂອງປະເທດອື່ນ ແລະ ຢຸດເຊົາກິລິຍາວາຈາທີ່ທຳລາຍສາຍພົວພັນລະຫວ່າງຈີນກັບອາເມຣິກາ.
ຕໍ່ກໍລະນີທີ່ຜູ້ນຳອາເມຣິກາໄດ້ກ່າວປາໄສໂດຍກ່າວຫາຈີນແຊກແຊງກິດຈະການພາຍໃນແລະການເລືອກຕັ້ງຂອງອາເມຣິກາໃນຫວ່າງມໍ່ໆມານີ້, ທ່ານ ລູ້ຄ່າງ ຊີ້ໃຫ້ເຫັນວ່າ, ຍາມໃດ ຈີນກໍຍຶດໝັ້ນໃນຫຼັກການບໍ່ແຊກແຊງກິດຈະການພາຍໃນຂອງປະເທດອື່ນ, ແລະກໍບໍ່ມີຄວາມສົນໃຈທີ່ຈະແຊກແຊງກິດຈະການພາຍໃນແລະການເລືອກຕັ້ງຂອງອາເມຣິກາ. ສ່ວນອາເມຣິກາກ່າວວ່າ ຈີນນຳໃຊ້ການຂຶ້ນພາສີເພື່ອສ້າງຜົນກະທົບຕໍ່ການເລືອກຕັ້ງຂອງອາເມຣິການັ້ນ, ຄວາມຈິງແມ່ນຈະແຈ້ງທີ່ສຸດ, ຄືຄວາມຂັດແຍ້ງກັນດ້ານເສດຖະກິດການຄ້າລະຫວ່າງຈີນກັບອາເມຣິກາ ແມ່ນອາເມຣິກາເອງເປັນຜູ້ກໍ່ຂຶ້ນ, ຈີນພຽງແຕ່ຖືກບັງຄັບໃຫ້ຕອບໂຕ້ດ້ວຍຄວາມຈຳເປັນ, ນີ້ແມ່ນການປ້ອງກັນຕົວແລະການຕອບໂຕ້ທີ່ເປັນທຳ.
ທ່ານ ລູ້ຄ່າງ ກ່າວຕື່ມວ່າ, ໃນໂລກນີ້ ແມ່ນປະເທດໃດແທ້ທີ່ຢູ່ໆກໍແຊກແຊງກິດຈະການພາຍໃນຂອງປະເທດອື່ນ, ປະຊາຄົມໂລກໄດ້ຮູ້ຄຳຕອບຢ່າງຈະແຈ້ງມາດົນແລ້ວ. ຈີນເຕືອນໃຫ້ອາເມຣິກາຈົ່ງຢຸດເຊົາການໃສ່ຮ້າຍປ້າຍສີແລະກ່າວຫາຈີນຢ່າງໄຮ້ເຫດຜົນ, ຢຸດເຊົາການແຊກແຊງກິດຈະການພາຍໃນຂອງປະເທດອື່ນ ແລະ ຢຸດເຊົາກິລິຍາວາຈາທີ່ທຳລາຍການພົວພັນຈີນ-ອາເມຣິກາ.