ຫ້ອງການຊີ້ນຳການກະກຽມງານວາງສະແດງສວນສາກົນຈີນ(ໜານໜິງ)ຄັ້ງທີ 12 ໄດ້ຈັດພິທີຖະແຫຼງຂ່າວໃນວັນທີ 10 ຕຸລານີ້ໂດຍເປີດເຜີຍວ່າ: ງານວາງສະແດງສວນຄັ້ງນີ້ຈະຈັດຂຶ້ນຢູ່ນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີໃນເດືອນທັນວາປີນີ້ ແລະ ໄດ້ເປີດປະຕູໃຫ້ບັນດາປະເທດອາຊຽນມາວາງສະແດງວັດທະນະທຳທີ່ມີເອກະລັກສະເພາະຂອງຕົນ.
ທ່ານລານລານ ຮອງຫົວໜ້າຄະນະປະສານງານລວມຫ້ອງການຊີ້ນຳກະກຽມງານວາງສະແດງສວນສາກົນຄັ້ງທີ 12 ເປີດເຜີຍວ່າ: ເຂດເນື້ອທີ່ສວນຄັ້ງນີ້ມີເກືອບ 658 ເຮັກຕາ, ຈະແບ່ງອອກເປັນ 6 ເຂດໃຫຍ່ ເຊັ່ນ: ເຂດວາງສະແດງຕົວເມືອງຕ່າງໆຂອງຈີນ, ເຂດວາງສະແດງອາຊຽນ, ເຂດວາງສະແດງເສັ້ນທາງສາຍໄໝ ແລະ ເຂດວາງສະແດງກວາງຊີເປັນຕົ້ນ ລວມທັງໝົດມີສວນວາງສະແດງ 80 ແຫ່ງ. ປັດຈຸບັນ, ໄດ້ສ້າງສຳເລັດ 18 ແຫ່ງແລ້ວ, ຍັງມີ 42 ແຫ່ງໄດ້ສ້າງສຳເລັດ 90% ຂຶ້ນໄປ.
ຂ່າວແຈ້ງວ່າ, ງານວາງສະແດງຄັ້ງນີ້ມີຫົວຂໍ້ວ່າ “ສ້າງຕົວເມືອງທີ່ໜ້າຢູ່ແລະມີສະພາບນິເວດທີ່ດີ ເພື່ອຄວາມສົມຫວັງດ້ວຍສວນ” ໂດຍເນັ້ນໃສ່ສ້າງ “ງານວາງສະແດງສວນທີ່ມີນິເວດທີ່ດີ ມີວັດທະນະທຳ ແລະ ຊົມໃຊ້ຮ່ວມກັນ”, ໃນງານວາງສະແດງຄັ້ງນີ້ຍັງໄດ້ເຊື້ອເຊີນເອົາຕົວເມືອງສຳຄັນລຽບຕາມ “ໜຶ່ງແລວໜຶ່ງເສັ້ນທາງ” ແລະ ເມືອງແຮກສ່ຽວຕ່າງປະເທດມາຮ່ວມກັນສ້າງສວນໃນງານວາງສະແດງຄັ້ງນີ້.