ງານວາງສະແດງປຶ້ມຈີນອາຊີຕາເວັນອອກສຽງໃຕ້ຄັ້ງທີ 2 ທີ່ຈະດຳເນີນໄປເປັນເວລາ 2 ວັນໄດ້ໄຂຂຶ້ນຢູ່ນະຄອນຫຼວງພະນົມເປັນ ປະເທດກຳປູເຈຍໃນວັນທີ 21 ຕຸລານີ້.
ທ່ານເຊີ່ນສ້ຽນຢາງ ຮອງຫົວໜ້າຄະນະວາງສະແດງປຶ້ມຈີນ, ຜູ້ອຳນວຍການໃຫຍ່ກຸ່ມບໍລິສັດປຶ້ມພາສາຕ່າງປະເທດເຊ້ຍເມີນຈຳກັດກ່າວວ່າ, ງານວາງສະແດງຄັ້ງນີ້ໄດ້ຄັດເລືອກປຶ້ມ 563 ຫົວກ່ຽວກັບການຮຽນພາສາຈີນ, ວັດທະນະທຳຈີນແລະປຶ້ມອື່ນໆ. ທ່ານກ່າວວ່າ, ເປົ້າໝາຍທີ່ຈັດກິດຈະກຳເທື່ອນີ້ແມ່ນເພື່ອໃຫ້ປະຊາຊົນກຳປູເຈຍຖືປຶ້ມເປັນຂົວຕໍ່, ຊອກຮູ້ປະເທດຈີນທີ່ເປັນບ້ານໃກ້ເຮືອນຄຽງທີ່ດີ, ມີຄວາມເຊື່ອໝັ້ນຕົນເອງດ້ານວັດທະນະທຳໃນຫຼາຍດ້ານ, ຫຼາຍແງ່ມູນຢ່າງເລິກເຊິ່ງ, ດຳເນີນການແລກປ່ຽນແລະຮ່ວມມືດ້ານວັດທະນະທຳລະຫວ່າງສອງປະເທດ ໃຫ້ທີ່ເລິກເຊິ່ງກວ່າເກົ່າແລະກວ້າງຂວາງກວ່າເກົ່າ.
ນັກຮຽນຂອງໂຮງຮຽນດ່ວນຮວາຄົນໜຶ່ງທີ່ເຂົ້າຮ່ວມງານວາງສະແດງບອກຕໍ່ນັກຂ່າວວ່າ, ຕົນເອງມັກອ່ານປຶ້ມ “ຊຸນຫງໍຄົງ”, ແຕ່ນັກຮຽນອີກຄົນໜຶ່ງພັດກ່າວວ່າຕົນເອງມັກອ່ານປຶ້ມ “ນິທານສຸພາສິດຂອງຈີນ” ຫຼາຍກວ່າ, ມວນກວ່າປຶ້ມ “ຊຸນຫງໍຄົງ” ອີກ.
ມື້ດຽວກັນ, ຄະນະວາງສະແດງປຶ້ມດັ່ງກ່າວຍັງໄດ້ຈັດພິທີມອບປຶ້ມໃຫ້ແກ່ກະຊວງວັດທະນະທຳກຳປູເຈຍ, ສະຖາບັນຂົງຈື້ກຳປູເຈຍ, ໂຮງຮຽນສອນພາສາຈີນແລະແຫ່ງອື່ນໆອີກດ້ວຍ.