ໂດຍຕອບສະໜອງຕາມຄຳເຊື້ອເຊີນຂອງທ່ານຫຼີເຄີ້ສຽງ ນາຍົກລັດຖະມົນຕີຈີນ, ທ່ານ ຊິນໂຊະ ອະເບະ ນາຍົກລັດຖະມົນຕີຍີ່ປຸ່ນຈະຢ້ຽມຢາມຈີນຢ່າງເປັນທາງການໃນວັນທີ 25 ຫາວັນທີ 27 ຕຸລານີ້.
ການຢ້ຽມຢາມຂອງທ່ານຊິນໂຊະ ອະເບະຄັ້ງນີ້, ແມ່ນນາຍົກລັດຖະມົນຕີຍີ່ປຸ່ນຢ້ຽມຢາມຈີນຢ່າງເປັນທາງການອີກຄັ້ງໜຶ່ງຕັ້ງແຕ່ທ່ານໂນດະ ໂຢຊິຮິໂກະ ອະດີດນາຍົກລັດຖະມົນຕີຍີ່ປຸ່ນຢ້ຽມຢາມຈີນໃນປີ 2011 ເປັນຕົ້ນມາ. ທ່ານຊຸກະ ໂຢຊິຮິເດະ ຫົວໜ້າຄະນະເລຂາທິການລັດຖະບານຍີ່ປຸ່ນກ່າວວ່າ: ຫວັງວ່າການຢ້ຽມຢາມຄັ້ງນີ້ຈະມີຜົນດີຕໍ່ການຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວຕໍ່ໄປ ແລະມີຜົນສຳເລັດໃນຂົງເຂດທີ່ກວ້າງຂວາງ.
ອີງຕາມວາລະການຢ້ຽມຢາມ, ຕອນບ່າຍວັນທີ 25 ຕຸລານີ້, ທ່ານຊິນໂຊະ ອະເບະຈະເຂົ້າຮ່ວມກິດຈະກຳລະລຶກວັນເຊັນ “ສົນທິສັນຍາສັນຕິພາບແລະມິດຕະພາບຈີນ-ຍີ່ປຸ່ນ” ຄົບຮອບ 40 ປີທີ່ຈັດຂຶ້ນຢູ່ຫໍສະພາປະຊາຊົນຈີນ. ຕອນເຊົ້າວັນທີ 26 ຕຸລາ, ທ່ານຈະເຂົ້າຮ່ວມພິທີຕ້ອນຮັບຂອງຈີນຢູ່ຫໍສະພາປະຊາຊົນຈີນ, ຈາກນັ້ນ ຈະເຂົ້າຮ່ວມກອງປະຊຸມເວທີປຶກສາຫາລືການຮ່ວມມືຕະຫຼາດຝ່າຍທີສາມຂອງລັດແລະເອກະຊົນຈີນ-ຍີ່ປຸ່ນຄັ້ງທຳອິດ, ຜູ້ຕາງໜ້າລັດຖະບານ, ສະຖາບັນການເງິນ ແລະ ວິສາຫະກິດຂະໜາດໃຫຍ່ຂອງສອງປະເທດຈະເຂົ້າຮ່ວມກອງປະຊຸມເຊັ່ນກັນ ແລະຄາດວ່າຜູ້ຮ່ວມປະຊຸມໃນວົງການຕ່າງໆຂອງສອງປະເທດຈະເຂົ້າຮ່ວມຫຼາຍກວ່າ 1000 ຄົນ. ກອງປະຊຸມຄັ້ງນີ້ຈະຈັດໃຫ້ມີຫົວຂໍ້ຍ່ອຍຕ່າງໆ ເຊັ່ນ: ຄົມມະນາຄົມແລະການຈໍລະຈອນສິນຄ້າ, ສິ່ງແວດລ້ອມແລະພະລັງງານ, ການຍົກລະດັບອຸດສາຫະກຳ ແລະອື່ນໆ.