ກິດຈະກຳ “ມອບແສງສະຫວ່າງ” ທີ່ແຂວງຢຸນນານ ສປ ຈີນຈັດຂຶ້ນຢູ່ນະຄອນຢາງກຸ້ງ ປະເທດມຽນມາ ໄດ້ເລີ່ມຕົ້ນແລ້ວໃນວັນທີ 25 ຕຸລານີ້ ໂດຍຄາດວ່າຈະຜ່າຕັດໃຫ້ຜູ້ເປັນແກ່ນຕາຂຸ້ນ ຊາວມຽນມາ 200 ຄົນເພື່ອໃຫ້ພວກເຂົາເຈົ້າເຫັນແສງສະຫວ່າງໄດ້ອີກ.
ທີມແພດທີ່ເຂົ້າຮ່ວມກິດຈະກຳດັ່ງກ່າວແມ່ນສະມາຄົມມິດຕະພາບແຂວງຢຸນນານຈັດຕັ້ງຂຶ້ນໃນນາມມູນນິທິແລກປ່ຽນມິດຕະພາບກັບສາກົນຂອງປະຊາຊົນຢຸນນານ, ສະມາຄົມຊຸກຍູ້ການແລກປ່ຽນກັບສາກົນຂອງອົງການຈັດຕັ້ງທາງສັງຄົມແຂວງຢຸນນານ, ຄະນະກຳມະການສາທາລະນະສຸກແລະການວາງແຜນຄອບຄົວແຂວງຢຸນນານ ແລະ ໂຮງໝໍເລກ 1 ທີ່ຂຶ້ນກັບມະຫາວິທະຍາໄລແພດສາດຄຸນມິງ.
ພິທີເລີ່ມຕົ້ນກິດຈະກຳດັ່ງກ່າວໄດ້ຈັດຂຶ້ນຢູ່ນະຄອນຢາງກຸ້ງ ແລະ ໃນພິທີ, ທີມແພດຈີນຍັງໄດ້ມອບຢາປົວພະຍາດ, ອຸປະກອນການແພດ ແລະ ເງິນອຸດໜູນໃຫ້ຄົນເຈັບ ມີມູນຄ່າທັງໝົດ 53 ລ້ານຈາດ ຫຼື ປະມານ 36.000 ໂດລາສະຫະລັດໃຫ້ແກ່ໂຮງໝໍມຽນມາ.
ຂ່າວລາຍງານຕື່ມວ່າ ນັບແຕ່ປີ 2013 ເປັນຕົ້ນມາ, ກິດຈະກຳ “ມອບແສງສະຫວ່າງ” ທີ່ແຂວງຢຸນນານ ສປ ຈີນດຳເນີນຢູ່ມຽນມາ ໄດ້ຊ່ວຍໃຫ້ຜູ້ເປັນແກ່ນຕາຂຸ້ນຊາວມຽນມາ 2.200 ກວ່າຄົນສາມາດເຫັນແສງສະຫວ່າງໄດ້ອີກຄັ້ງ.