ວັນທີ 29 ຕຸລານີ້, ທ່ານສີຈິ້ນຜິງ ປະທານປະເທດຈີນແລະທ່ານເອມານູເອວ ມາຄຣົງ ປະທານາທິບໍດີຝຣັ່ງໄດ້ສົ່ງສານສະແດງຄວາມຊົມເຊີຍເຊິ່ງກັນແລະກັນກ່ຽວກັບສອງປະເທດປະສົບຜົນສຳເລັດໃນການຮ່ວມມືກັນສົ່ງດາວທຽມທະເລຂຶ້ນສູ່ອະວະກາດ.
ສານຊົມເຊີຍຊອງທ່ານສີຈິ້ນຜິງຂຽນວ່າ: ການຮ່ວມມືດ້ານການບິນອະວະກາດເປັນເນື້ອໃນສຳຄັນຂອງສາຍພົວພັນຄູ່ຮ່ວມຍຸດທະສາດຮອບດ້ານຈີນ-ຝຣັ່ງ. ສອງປະເທດສົ່ງດາວທຽມທະເລຂຶ້ນສູ່ອະວະກາດຢ່າງສຳເລັດຜົນນັ້ນເປັນໝາກຜົນຫຼ້າສຸດແຫ່ງການຮ່ວມມືດ້ານການບິນອະວະກາດຂອງຈີນ-ຝຣັ່ງ ເຊິ່ງຈະເສີມຂະຫຍາຍບົດບາດສຳຄັນໃນຂົງເຂດຕ່າງໆເຊັ່ນ:ການຕິດຕາມວັດແທກສະພາບແວດລ້ອມມະຫາສະໝຸດທົ່ວໂລກ, ການປ້ອງກັນແລະຫຼຸດຜ່ອນໄພພິບັດ, ການຮັບມືກັບການປ່ຽນແປງຂອງດິນຟ້າອາກາດແລະອື່ນໆ. ຈີນໃຫ້ຄວາມສຳຄັນຢ່າງສູງຕໍ່ສາຍພົວພັນຈີນ-ຝຣັ່ງ ແລະຍິນດີຮ່ວມກັບຝຣັ່ງເພື່ອຊຸກຍູ້ການແລກປ່ຽນແລະຮ່ວມມືໃນຂົງເຂດຕ່າງໆລະຫວ່າງສອງປະເທດໃຫ້ເຂົ້າສູ່ລວງເລິກ, ຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານຈີນ-ຝຣັ່ງທີ່ແໜ້ນແຟ້ນຍາວນານນັ້ນໃຫ້ຂະຫຍາຍຕົວຂຶ້ນສູ່ລະດັບສູງກວ່າເກົ່າແລະສ້າງຄວາມຜາສຸກໃຫ້ສອງປະເທດແລະປະຊາຊົນສອງຊາດຫຼາຍຂຶ້ນກວ່າເກົ່າ.
ສານຊົມເຊີຍຂອງທ່ານມາຄຣົງຂຽນວ່າ: ການທີ່ຝຣັ່ງ-ຈີນປະສົບຜົນສຳເລັດໃນການສົ່ງດາວທຽມທະເລຂຶ້ນສູ່ອະວະກາດນັ້ນເປັນຂີດໝາຍສະແດງໃຫ້ເຫັນວ່າ ນີ້ເປັນບາດກ້າວສຳຄັນກ້າວໜຶ່ງຂອງການຮ່ວມມືດ້ານການບິນອະວະກາດລະຫວ່າງສອງປະເທດ. ການຮ່ວມມືດ້ານການບິນອະວະກາດເປັນພາກສ່ວນປະກອບທີ່ສຳຄັນຂອງການຮ່ວມມືທາງຍຸດທະສາດລະຫວ່າງຝຣັ່ງ-ຈີນ, ຝຣັ່ງຍິນດີຮ່ວມກັບຈີນສືບຕໍ່ລົງເລິກການແລກປ່ຽນແລະການຮ່ວມມືກັນລະຫວ່າງສອງປະເທດໃນຂົງເຂດການບິນອະວະກາດແລະການຮັບມືກັບການປ່ຽນແປງຂອງດິນຟ້າອາກາດແລະອື່ນໆ.