ທ່ານນາງເພີງລີ້ຢວນພົບປະກັບທ່ານບີວເກດ
ວັນທີ 5 ພະຈິກນີ້ຢູ່ກຳແພງນະຄອນຊຽງໄຮ, ທ່ານນາງເພີງລີ້ຢວນ, ພັນລະຍາຂອງທ່ານສີຈິ້ນຜິງ ປະທານປະເທດຈີນ, ທູດພິເສດປ້ອງກັນແລະປິ່ນປົວພະຍາດວັນນະໂລກແລະພະຍາດເອດຂອງອົງການອະນາໄມໂລກໄດ້ພົບປະກັບທ່ານບີວເກດ ປະທານກອງທຶນເກດອາເມຣິກາ.
ທ່ານນາງເພີງລີ້ຢວນ ກ່າວວ່າ, ໃນຫຼາຍປີຜ່ານມາ, ກອງທຶນເກັດສ໌ໄດ້ອອກແຮງລົງທຶນໃນກິດຈະກຳພັດທະນາເພື່ອຫຼຸດຜ່ອນຄວາມທຸກຍາກ, ປິ່ນປົວພະຍາດແລະອື່ນໆ, ທັງໄດ້ຮັກສາການພົວພັນອັນດີງາມແລະດຳເນີນການຮ່ວມມືຢ່າງມີປະສິດທິຜົນກັບພາກສ່ວນທີ່ກ່ຽວຂ້ອງຂອງຈີນໃນຂົງເຂດປ້ອງກັນແລະປິ່ນປົວພະຍາດເອດ, ຫຼຸດຜ່ອນຄວາມທຸກຍາກຢ່າງແຂງແຮງ, ການກໍ່ສ້າງຄວາມສາມາດດ້ານສາທາລະນະສຸກຂອງທົ່ວໂລກແລະອື່ນໆ. ພວກເຮົາສະໜັບສະໜູນກອງທຶນເກດໃຫ້ສືບຕໍ່ເພີ່ມທະວີການຮ່ວມມືສອງຝ່າຍແລະສາມຝ່າຍກັບຈີນ, ລວມທັງຍົກສູງການສ້າງຄວາມສາມາດຂອງພະນັກງານສາທາລະນະສຸກຂອງຈີນແລະຖັນແຖວວິຊາການດ້ານສາທາລະນະສຸກຂອງໂລກ.
ທ່ານເກດ ຊົມເຊີຍຈີນຈັດພິທີໄຂງານວາງສະແດງສິນຄ້ານຳເຂົ້າສາກົນຈີນຢ່າງສຳເລັດຜົນ. ທ່ານກ່າວວ່າ, ມະນຸດເຮົາພວມຜະເຊີນກັບສິ່ງທ້າທາຍຮ້າຍແຮງລັກສະນະທົ່ວໂລກໃນຂົງເຂດສຸຂະພາບ, ຕົນເອງຍ້ອງຍໍຢ່າງສູງຕໍ່ຈີນທີ່ໄດ້ຮັບຜົນງານອັນໃຫຍ່ຫຼວງໃນຂົງເຂດການພັດທະນາແລະຫຼຸດຜ່ອນຄວາມທຸກຍາກແລະການປະກອບສ່ວນອັນພົ້ນເດັ່ນຂອງຈີນໃນພາລະກິດ ຊຸກຍູ້ວຽກງານສາທາລະນະສຸກແລະສຸຂະພາບພະອານາໄມຂອງໂລກ. ກອງທຶນເກດ ຍິນດີສືບຕໍ່ເພີ່ມທະວີການຮ່ວມມືກັບຈີນໃນຂົງເຂດດັ່ງກ່າວ.